Акафист Пресвятой Богородице пред иконой «Попская»

Взбранной Воеводе, Владычице нашей Богородице, Святую Гору Афонскую в достояние Свое избравшей и иноческия обители в ней умножившей, благодарственная возглашаем пения. Ты же, о Пречистая, яко имущая державу непобедимую, от всяких нас бед свободи и от враг видимых и невидимых защити, да зовем Ти: Радуйся, Пресвятая Богородице Дево, всего мира Благая Заступнице.

Ангелов Царице и всея твари Владычице, Пречистая Дево Богородице, преславным явлением дивныя иконы Твоея Гору Афонскую озарила еси, струи чудес от нея источающи. Темже и мы, грешнии, радости и благодарения исполняеми, с любовию и усердием к Тебе благохваления наша дерзаем возносити:

Радуйся, благословенная отрасле от корене Давидова.

Радуйся, Дщи Богоданная Иоакима и Анны.

Радуйся, в храме Божием во смирении и чистоте воспитанная.

Радуйся, о рождении Бога Слова Ангельское благовестие приимшая.

Радуйся, свыше силою Духа Святаго осененная.

Радуйся, тайне Боговоплощения послужившая.

Радуйся, Богомладенца Христа на спасение роду человеческому рождшая.

Радуйся, всему миру радость велию Рождеством Твоим возвестившая.

Радуйся, Пресвятая Богородице Дево, всего мира Благая Заступнице.

Видящи, Всенепорочная, милосердие Твое неизреченное и чудеса многая, чрез святыя иконы Твоя присноявляемыя, величаем Тя, род наш благоволением Твоим возвеличившую, и с любовию покланяяся пречистому лика Твоего изображению, зовем о Тебе Сыну Твоему и Богу нашему: Аллилуиа.

Разум человеческий постигнути не может великаго Твоего милосердия к людем, искупленным Кровию Сына Твоего, Христа Бога нашего, ниже исчислити множество благодеяний Твоих, богатно на ны изливаемых, но припадая пред чудотворною иконою Твоею, смиренно приносим Ти похвалы сицевыя:

Радуйся, на путь спасения нас наставляющая.

Радуйся, к Богопознанию приводящая.

Радуйся, скорая христианом Помощнице.

Радуйся, пред Сыном Твоим о нас милостивая Ходатаице.

Радуйся, страх Божий в сердца наша вселяющая.

Радуйся, благоговети пред святынею нас научающая.

Радуйся, чистоты и целомудрия Поборнице.

Радуйся, добродетельному житию Споспешнице.

Радуйся, Пресвятая Богородице Дево, всего мира Благая Заступнице.

Силу благодати Божественныя даруеши, Пречистая Дево, всем, с верою и усердием Сыну Твоему и Богу нашему служащим, вся бо можеши испросити у Него матерним дерзновением Твоим. Сего ради, благодаряще Господа за вся великия милости Его, Тобою щедро нам низпосылаемыя, умиленно вопием Ему: Аллилуиа.

Имеют Тя воистину Верховную Игумению Горы Афонския иночествующии в жребии Твоем, имже Ты в залог благоволения Твоего милостиво даровала еси многия чудотворныя иконы Твоя, лучами чудес мир весь озаряющия; сего ради вопием Ти:

Радуйся, Гору Афонскую в жребий Себе избравшая.

Радуйся, чудотворныя иконы Твоя в ней умножившая.

Радуйся, обителем иноческим благодетельствующая.

Радуйся, токи чудес от икон Твоих источающая.

Радуйся, иноков Благая Покровительнице.

Радуйся, пустынножителей вожделенная Посетительнице.

Радуйся, затворников сладкая Собеседнице.

Радуйся, подвижников всемощная Укрепительнице.

Радуйся, Пресвятая Богородице Дево, всего мира Благая Заступнице.

Бури житейския избегающи, в тихое пристанище спасения под осенение иконы Твоея во обитель Хилендарскую иноцы Афонстии притекают, и зде благодатное утешение и помощь Твою, Пречистая Дево, обретши, теплыя моления своя пред нею возносят, Богу же, тако о них промышляющему, из глубины сердец взывают: Аллилуиа.

Слышаще и видяще иноцы обители Хилендарския яко нечестивый иерей внезапу в море утоплен бысть, да не дерзает прочее священнодействовати, зело удивляхуся. Мы же молим Тя, Ходатаице нашего спасения: просвети сердца наша светом истинныя веры, да оставив вся прегрешения наша, праведно и добродетельно поживем. Сего ради, уповая Твое милостивое заступление, взываем:

Радуйся, еретичествующих грозная Обличительнице.

Радуйся, неправедных скорая Наказательнице.

Радуйся, заблуждших на путь истинный наставляющая.

Радуйся, нерадивых и ленивых вразумляющая.

Радуйся, бедствующих скорое услышание.

Радуйся, погибающих чудное спасение.

Радуйся, за род христианский Предстательнице.

Радуйся, грешных надежная Споручнице.

Радуйся, Пресвятая Богородице Дево, всего мира Благая Заступнице.

Боготечней звезде подобна икона Твоя, Пречистая Дево Богородице, мрак греховный в сердцах наших разгоняющая и умы наша просвещающая, да во свете матерния любве Твоея узрим истиннаго Бога, спасающаго всякаго человека, грядущаго к Нему, и возопиим Ему благодарно: Аллилуиа.

Видяще преславная чудеса и пречудная знамения, бываемыя не токмо от иконы Твоея «Иерейския», во обители Хилендарстей пребывающия, но и от изображений по подобию сея иконы списанных, во умилении сердечнем вопием Ти:

Радуйся, благодатию Святаго Духа нас озаряющая.

Радуйся, огнем матерния любве Твоея души наша согревающая.

Радуйся, яко любовь к Богу в нас воспламеняеши.

Радуйся, яко ревностию ко спасению нас воодушевляеши.

Радуйся, на всех путех жития нашего нас подкрепляющая.

Радуйся, благодарити Бога за вся нас научающая.

Радуйся, Ты бо истину познавати помогаеши.

Радуйся, Ты бо душевредная учения низлагаеши.

Радуйся, Пресвятая Богородице Дево, всего мира Благая Заступнице.

Проповедует милости и чудеса Твоя, Преблагословенная Богородице Дево, Гора Афонская и множеством чудотворных икон Твоих красуется, среди коих икона Твоя «Иерейская», яко луна пресветлая, чудесными лучами Божественныя благодати просвещает души наша, подвизая прославльшему Тя Богу нашему хвалебно пети: Аллилуиа.

Возсияла еси, Пречистая Мати Божия, в чудотворней иконе Твоей, яко свет спасения блуждающим во тьме греховней, скорую помощь подающи всем, с упованием на милосердие Божие пред нею молящимся и вопиющим Ти сице:

Радуйся, любве Божия к человеком проявление.

Радуйся, рода христианскаго возвышение.

Радуйся, милосердная всем нам о Христе Мати.

Радуйся, Преблагословенная и Препрославленная в женах.

Радуйся, Бога с человеки соединившая.

Радуйся, девство и материнство пречудно в Себе сочетавшая.

Радуйся, яко велие дерзновение к Сыну Твоему и Богу имаши.

Радуйся, яко выну за род человеческий пред Ним ходатайствуеши.

Радуйся, Пресвятая Богородице Дево, всего мира Благая Заступнице.

Хотяй всем человеком спастися, Премилосердный Господь усынови нас Пречистей и Преблагословенней Матери Своей: да будет болящим Целительницею, печальным Утешительницею, заблуждшим Наставницею, грешным Споручницею, да всех от бед и напастей избавит, вопиющих: Аллилуиа.

Новое чудо зрим, Пресвятая Богородице, в явлении святаго образа Твоего, пред нимже архиереев сословие, монаси и мирстии проповедуют великия милости Твоя, и ведущи Тя воистину Помощницу всесильную, со слезами приносят Ти благохваления сия:

Радуйся, Царице Небесная, Ангельскими лики воспеваемая.

Радуйся, Владычице небесе и земли, земнородными прославляемая.

Радуйся, православно воспевати Бога во святых Его научающая.

Радуйся, благоговейное пение в уста наша влагающая.

Радуйся, благ земных и небесных всещедрая Подательнице.

Радуйся, рода человеческаго милостивая Питательнице.

Радуйся, источниче непрестающия радости.

Радуйся, чаше неизреченныя благости.

Радуйся, Пресвятая Богородице Дево, всего мира Благая Заступнице.

Странники и пришельцы есмы на земли и не имамы зде пребывающаго града, обаче Града Небеснаго непрестанно взыскуем; в скорбех же жития нашего к Тебе единей Владычице нашей прибегаем. Темже на милосердие Твое уповая, молим Тя: приими нас, Мати Божия, в вечныя кровы Своя, да радостно вопием о Тебе Богу: Аллилуиа.

Всем верным утешительно есть взирати на святую икону Твою, Преблагословенная, на нейже зрим Тя, на руку Твоею держащую Богомладенца Христа, Сына Твоего и Бога нашего, Емуже покланяющеся, Тебе, истинней Богородице, благоговейно взываем:

Радуйся, Свет миру – Христа Бога рождшая.

Радуйся, двери Царствия Христова верным отверзающая.

Радуйся, всем призывающим Тя скоропредстательная Помощнице.

Радуйся, усердно Тебе молящихся скорая Услышательнице.

Радуйся, Ангельских сил непрестающее ликование.

Радуйся, притекающих к Тебе непостыдное упование.

Радуйся, из глубины отчаяния возводящая.

Радуйся, печали наша утоляющая.

Радуйся, Пресвятая Богородице Дево, всего мира Благая Заступнице.

Всякаго естества Ангельскаго превысшая явилася еси, Пресвятая Дево: Невместимаго бо Бога вместила еси во утробе Твоей; темже на небеси прехвально имя Твое и на земли блажат Тя вси роди. Мы же грешными устами дерзаем возвеличившему Тя Богу взывати о Тебе: Аллилуиа.

Витийствующий язык не возможет по достоянию восхвалити Тя, Богомати Пречистая, за великия и премногия благодеяния Твоя, яже на нас милостиво изливаеши. Сего ради, вся чудеса от икон Твоих бываемая видяще, присно ублажаем Тя и хвалебно вопием сице:

Радуйся, печаль нашу в радость претворяющая.

Радуйся, от бед и скорбей нас избавляющая.

Радуйся, Неувядаемый Цвете чистоты и нетления.

Радуйся, Рачительнице целомудрия и воздержания.

Радуйся, Богородицею величаемая.

Радуйся, от всех родов ублажаемая.

Радуйся, благочестия Наставнице.

Радуйся, поющих во славу Божию Попечительнице.

Радуйся, Пресвятая Богородице Дево, всего мира Благая Заступнице.

Спасти хотя всякаго человека, Сын Твой и Бог наш милостиво внимает Тебе, Заступнице и Ходатаице нашей, о нас молящейся; темже вси вернии в скорбех и напастех с несумненною верою к Тебе прибегают и благодарственно вопиют о Тебе: Аллилуиа.

Стена нерушима еси, Богородице Дево, всем усердно Тя почитающим и иконе Твоей чудотворней благоговейно покланяющимся: Тебе бо дадеся от Господа благодать всемирнаго заступления, верных же во благочестии и чистоте утверждения. Темже и нас под матерний Твой покров приими, с любовию к Тебе взывающих:

Радуйся, Преблагословенная, у Престола Сына Твоего на небеси пребывающая.

Радуйся, Препрославленная, помощию Твоею на земли нас не оставляющая.

Радуйся, в житии нашем верная Путеводительнице.

Радуйся, иноческаго жития Наставнице.

Радуйся, лествице, души праведных на небеса возводящая.

Радуйся, леторасле прекрасная, у Престола Вседержителева благоухающая.

Радуйся, Ты бо еси всея вселенныя преславное чудо.

Радуйся, Ты бо еси всех земнородных велие упование.

Радуйся, Пресвятая Богородице Дево, всего мира Благая Заступнице.

Пение наше смиренное, от любве и усердия к Тебе приносимое, не презри, Владычице небесе и земли, и не отвратися от нас, многими грехми Тя преогорчивших, обаче помози нам искреннее покаяние принести и души наша от скверн и страстей очистити, да преуспевающе в благочестнем житии возможем воспевати Богу: Аллилуиа.

Светлыми лучами пачеестественных чудес святая икона Твоя немерцаемо сияет, Пречистая Дево, просвещая души наша светом истиннаго богопознания и к немолчному славословию имене Твоего приводя, радостно зовущих Ти:

Радуйся, благодатию Божиею преизобильно исполненная.

Радуйся, паче небесных и земных возвеличенная.

Радуйся, оружие, имже устраняются полки демонския.

Радуйся, щите, имже покрываются обители иноческия.

Радуйся, тихое пустынножителей веселие.

Радуйся, обуреваемых в веце сем надежное пристанище.

Радуйся, слабых на пути добродетели укрепляющая.

Радуйся, заблуждших на путь истины наставляющая.

Радуйся, Пресвятая Богородице Дево, всего мира Благая Заступнице.

Благодать и милость испроси нам, Преславная Мати Божия, у Сына Твоего, простри к Нему Твоя богоприимныя руце и умоли Его, да всех нас спасет и от погибели вечныя избавит: многомощна бо есть Твоя матерняя молитва и всесильно есть пред Ним за нас Твое ходатайство, о нем же радующеся, вопием Творцу и Богу нашему: Аллилуиа.

Поюще преславная чудеса Твоя, Богомати, от святыя иконы Твоея являемыя, величаем и славим Тя, возвеличившую нас. Ты же, Всеблагая Владычице, сподоби нас причастники славы небесныя быти, радостно поющих Ти:

Радуйся, Тебе бо служат вся Небесныя Силы.

Радуйся, Тебе бо возносят хваление Херувимы и Серафимы.

Радуйся, выну на небеси лице Божие созерцающая.

Радуйся, пред Сыном Твоим о нас матерния руце Твои простирающая.

Радуйся, яко омофором Твоим от всякаго зла сущих на земли покрываеши.

Радуйся, яко упованием приятия небесных благ души верных услаждаеши.

Радуйся, любящих Сына Твоего жизни вечныя сподобляющая.

Радуйся, благочестно живущим обители райския уготовляющая.

Радуйся, Пресвятая Богородице Дево, всего мира Благая Заступнице.

О Всепетая Мати Сладчайшаго Господа нашего Иисуса Христа! Приими сие малое хваление наше, от любящих сердец Тебе приносимое, и умоли Сына Твоего, да помилует и спасет нас и причастники жизни вечныя соделает, верно славящих Тя и вопиющих Ему: Аллилуиа.

Ангелов Царице и всея твари Владычице, Пречистая Дево Богородице, преславным явлением дивныя иконы Твоея Гору Афонскую озарила еси, струи чудес от нея источающи. Темже и мы, грешнии, радости и благодарения исполняеми, с любовию и усердием к Тебе благохваления наша дерзаем возносити:

Радуйся, благословенная отрасле от корене Давидова.

Радуйся, Дщи Богоданная Иоакима и Анны.

Радуйся, в храме Божием во смирении и чистоте воспитанная.

Радуйся, о рождении Бога Слова Ангельское благовестие приимшая.

Радуйся, свыше силою Духа Святаго осененная.

Радуйся, тайне Боговоплощения послужившая.

Радуйся, Богомладенца Христа на спасение роду человеческому рождшая.

Радуйся, всему миру радость велию Рождеством Твоим возвестившая.

Радуйся, Пресвятая Богородице Дево, всего мира Благая Заступнице.

Взбранной Воеводе, Владычице нашей Богородице, Святую Гору Афонскую в достояние Свое избравшей и иноческия обители в ней умножившей, благодарственная возглашаем пения. Ты же, о Пречистая, яко имущая державу непобедимую, от всяких нас бед свободи и от враг видимых и невидимых защити, да зовем Ти: Радуйся, Пресвятая Богородице Дево, всего мира Благая Заступнице.

О Пресвятая Дево, Преславная Госпоже Владычице наша Богородице, воззри милостиво на нас, предстоящих Ти с верою и любовию: приими милостиво наше хвалебное пение сие и пролей ко Господу Богу нашему Твою матернюю молитву о нас, грешных и недостойных, да узрит Он наше покаяние сердечное и, простив нам вся согрешения наша, спасет и помилует нас. Покажи на нас чудныя милости Твоя, Богомати, смиренно молим Тя: на путь правый нас настави, светом истины умы наша просвети, сердца наша умягчи, веру укрепи, надежду утверди, дара любве к Богу и ближним сподоби, да в единении друг со другом пребывающе, богоугодное житие поживем, и дарами благ земных насладившеся, благ небесных, милосердия ради Божественнаго, не лишимся, да благодарне воспевающе величия Твоя, Пречистая, сподобимся Небеснаго Царствия и тамо со всеми святыми прославим пречестное и великолепое имя в Троице славимаго Бога: Отца и Сына и Святаго Духа. Аминь.