Акафист преподобному Герасиму, Вологодскому чудотворцу

Избранный угодниче Христов, преподобне отче наш Герасиме, первый равноангельным житием в Вологодстей стране просиявый от гор Киевских, осветивый благочестия светлостьми пустыни севера, и путь к небеси правый многим показавый, похвальная восписуем ти любовию чтущии святую память твою; ты же имеяй дерзновение ко Господу, молитвами твоими от всяких нас бед свободи, зовущих:

Радуйся, Герасиме, преподобных отец Вологодских первоначальниче.

Ангелоподобное видев житие пустыннолюбивых старец в пещерных затворех Гнилецкия обители, юже возлюби преподобный Феодосий Печерский, тишину пустыни и ты возлюбил еси, преподобне Герасиме, и в юности возраста своего отшел еси от дому родителей твоих в ону пустыню Гнилецкую, и тамо восприяв Ангельский образ, водворился еси с работающим Богу. Темже, яко избранника Божия, величаем тя пении сими:

Радуйся от благочестиваго корене отрасле святейшая;

радуйся, града Киева пречестное порождение.

Радуйся, от млада возраста в дому Божием пребывати возжелавый;

радуйся, любве ради Христовы преименитый град отечества твоего оставивый.

Радуйся, обители Гнилецкия святое прозябение;

радуйся, яко богомудрая пчела подвизающихся тамо отец аки от различных цветов сладость духовныя мудрости собравый.

Радуйся, во мраце невечернем свет Боговедения снискавый;

радуйся, иночество доброе ради служения Богу приявый.

Радуйся, Герасиме, преподобных отец Вологодских первоначальниче.

Видевше тя спостницы твои зело преуспевающа в добрем иночестем житии во смирении и послушании, в целомудрии и братолюбии, желанием вожделеша видети тя нa степени пресвитера, ты же послушания ради не уклонился еси, аще и тужаше дух твой, ужасаяся высоты сея и со умилением воспевал еси Богу: Аллилуиа.

Уразумев добре, преподобне Герасиме, Божие соизволение к почести вышняго звания, оставил еси обитель Гнилецкую и от предградия Киева пришел еси в пределы Вологодския, в непроходимую пустыню, в нейже на потоце Кайсарове, в дебрех лесных, келию себе малу соорудив, пребывал еси безмолвно в подвизех пустынных. Темже мы ныне чествуем тя, яко отца и первоначальника иноков вологодских, и взываем сице:

Радуйся, Духом Святым осененный;

радуйся, в безмолвии молитвеннем духовно созревый.

Радуйся, подвижниче Божий, красотами мира сего не прельстивыйся;

радуйся, яко Бога ради отечества страну оставивый.

Радуйся, звездо, Богом данная, от юга к северу притекшая;

радуйся, пустыню имевый, яко тихое пристанище.

Радуйся, гласом твоим молитвенным огласивый дебри пустынныя;

радуйся, благоговейный Алтаря Господня служителю.

Радуйся, Герасиме, преподобных отец Вологодских первоначальниче.

Силою, данною ти от Господа, пустынное озлобление и в потребных скудость пред очима имея, терпел еси, благодаря и тем Христа обретя в души твоей, воспевал еси выну: Аллилуиа.

Имея тщание о спасении души твоея, преподобне отче, обходил еси пустыни полунощныя, дондеже, узрев единый храм Воскресения Христова, возрадовался еси духом и на месте безмолвнем и безвестнем, окрест зачинаемаго града Вологды, вселился еси, единому Христу служа в посте и молитве, житие твое Богоугодное провождал еси. Мы же, взирающе на досточудныя твоя подвиги и труды, со умилением вопием ти таковая:

Радуйся, пустынных подвигов искренний любителю;

радуйся, своим пришествием благословивый созидавшийся град Вологду.

Радуйся, стено и утверждение града сего;

радуйся, жития чистотою страну нашу просветивый.

Радуйся, Евангельских заповедей верный исполнителю;

радуйся, Христа всем сердцем возлюбивый.

Радуйся, волю свою Ему покоривый;

радуйся Его благое иго восприявый.

Радуйся, Герасиме, преподобных отец Вологодских первоначальниче.

Бурю злых напастей и искушений утишая, безбедне проходил еси всю пустыню скорбнаго иноческаго жития, и тако благодатию Божиею на кийждо день на большия простираяся труды, восходил еси от силы в силу. Помози и нам, угодниче Божий, безбедно преплыти житейскую пучину, да поем с тобою Богу: Аллилуиа.

Слышав, преподобне отче Герасиме, о людех, седящих во тьме неверия и злонравных, спострадал еси душею о них и возгорелся еси желанием строити преславен храм во имя Живоначальныя Троицы. Сего ради взываем ти:

Радуйся, Апостолом подражателю, просветивый тьму неверия;

радуйся, заре, сияющая в нощи греховней блуждающим.

Радуйся, в стране Вологодстей насадителю веры православныя;

радуйся, просветителю во мраце страстей пребывающих.

Радуйся, сущих во мразех согреяние;

радуйся, освятивый пустыню устроением храма Божия.

Радуйся, совершенное смирение нам в себе явивый;

радуйся, равноапостольное и равноангельское житие нам показавый.

Радуйся, Герасиме, преподобных отец Вологодских первоначальниче.

Пресветлей звезде подобен явился еси, преподобне отче Герасиме, во стране Вологодстей, и непроходимую пустыню светом богоугоднаго жития твоего озарил еси, наставляя всех на путь спасения и научая всегда пети Богу: Аллилуиа.

Видя враг рода человеческаго богоугодное желание твое служити спасению ближних, внуши некоему богатому селянину воспротивитися тебе в строении обители. Ты же, возлагая всю надежду на единаго Бога и от Него ищай поможение себе, непоколебим в намерении своем был еси и тщанием верных создал еси обитель иноков, имже сам в наставника был еси до конца дней твоих, темже слышиши от всех:

Радуйся, голубице незлобивая, гневом неразумнаго человека неуязвленная;

радуйся, незлобием твоим духа злобы победивый.

Радуйся, горлице пустыннолюбивая, от мирскаго шума во благоотишие пустыни отлетевшая;

радуйся, яко древо благорасленное при водах.

Радуйся, не устрашивыйся ни зверей дивиих, ни злых человек;

радуйся, пределы Вологодския духовно просветивый.

Радуйся, святыя церкве Вологодския похвало и радование;

радуйся, словеснаго стада твоего добрый пастырю.

Радуйся, Герасиме, преподобных отец Вологодских первоначальниче.

Проповедует Вологодская наша страна труды твоя и подвиги, богомудре Герасиме, подъятыя тобою ради душевнаго спасения, егоже ради прослави тя Господь даром проречения, имже прорекал еси мужу строптиву, иже прещаше ти строити обитель, грядущия ему оскуднения в потребных к житию. Сего ради, видящи предивное сбытие твоего проречения, воспеваем Богу: Аллилуиа.

Возсия добродетельнаго твоего жития свет велий во всей стране Вологодстей, преподобне отче Герасиме, мнози бо прихождаху к тебе издалеча. Инии убо хотяху насладитися богодухновенных словес твоих, друзии же жительствовати с тобою ревноваху. Ты же всех приемляй с любовию, яко отец их, об обращении заблуждших чад радовался еси. Сего ради мы благодарственно вопием ти таковая:

Радуйся, первоотец иноков Вологодских бывый;

радуйся, богомудрая главо всех подвижников во Христе страны Вологодския.

Радуйся, иноков и мирских человек верный руководителю ко спасению;

радуйся, яко под сень пустыни твоея хотящих спасения принимал еси.

Радуйся, возбудивый к покаянию спящия совести;

радуйся, жезле, падающих подкрепляяй.

Радуйся прозорливость благодатную проявивый;

радуйся, о нас грешных Судии праведнаго умоление.

Радуйся, Герасиме, преподобных отец Вологодских первоначальниче.

Хотя спасти тобою многих, премилосердный Бог яви тя быти не точию началовождя сонма иночествующих, но и Боговещаннаго проповедника, возвестившаго имя Божие во стране Вологодстей; людие бо, во онем месте обитающии и не ведущии дотоле Бога, во светлости твоего жития узреша первую зарю спасительнаго боговедения и благочестия и от тебе научишася воспевати истинному Богу: Аллилуиа.

Новую благодать показа тобою всех Творец и Владыка Господь, егда бе попущением Божиим нечистивии людие огнем и мечем святую обитель твою разориша и опустошиша, якоже невозможно быша обрести место погребения твоего, преподобне отче; явися некоей благочестивой старице из града, страждущей двадесять лет слепотою, повелел еси ей совершити молебное пение на месте, идеже обрящет свой плат. Она же послушавши гласа твоего, абие прозре. Многая и иная чудеса, истекавшая точию от праха, или воды, освященныя при гробе твоем, прославляюще, вопием ти таковая:

Радуйся, чудно место погребения многоцелебных мощей твоих явивый;

радуйся, скорый помощниче призывающих тя.

Радуйся, слепым зрение многажды даровавый;

радуйся, недугующих врачу милостивый.

Радуйся, в скорбех и бедах и обстояниих скорый помощниче;

радуйся, в сониих и видениих верныя посещаяй.

Радуйся, делателю чудес преславный;

радуйся, яко вода, освященная при мощех твоих, исцеляющи недуги чудодействует.

Радуйся, Герасиме, преподобных отец Вологодских первоначальниче.

Странное твое и вельми скорбное житие не токмо человеки на земли, но и Ангелов на небеси удиви: ты бо, вселився в пустыни, всеусердне единому Богу работал еси, преподобне отче Герасиме, сего ради и малое моление тебе приносяще, всяких болезней исцеления приемлем и в благоверии утвердающеся, всегда вопием Богу: Аллилуиа.

Весь был еси в Бозе, аше на земли пребываяй в непрестаннем бдении и пощении. Ныне же духом Престолу Божию предстоя, телом же в недре земли почивая, чтущим тя подаеши цельбы, велие убо стяжав дерзновение к Богу, не забуди и нас, к твоему заступлению притекающих и вопиющих ти:

Радуйся, хлад и глад в пустыни претерпевый;

радуйся все внешнее злострадание без ропота восприявый.

Радуйся, Богомудрием преукрашенный;

радуйся, просвещенный внутрь благодатию Божиею.

Радуйся, чтущим тя ходатаю вечнаго спесения;

радуйся, приходящих на поклонение к святым мощем твоим благословляяй.

Радуйся, молитвенниче о нас усердный;

радуйся, страны нашея небесный хранителю.

Радуйся, Герасиме, преподобных отец Вологодских первоначальниче.

Вси безплотнии Ангели и собори святых радостно сретоша тя на небеси, преподобне Герасиме, по честнем успении твоем. Сам Господь, тобою проповеданный, увенча тя венцем небесныя славы и сопритче тя к лику святых Своих, выну воспевающих Ему: Аллилуиа.

Витийство человеческое не довлеет достойно восхвалити твое пустыннолюбное житие, преподобне отче; от юных бо лет до старости маститыя неуклонно шествовал еси во след Христа и волю Его святую присно творил еси. Сего ради любовию твоею побеждаеми благодарно тебе зовем:

Радуйся, подвижниче Христов неизменный;

радуйся, притекающим к тебе отец чадолюбивый.

Радуйся, на земли поживый равноангельно;

радуйся, светильниче, сияющий добродетельми.

Радуйся, яко к небесному свету многих приведый;

радуйся, от земли пришедый во обители райския.

Радуйся, достойный наследниче Царствия Христова;

радуйся яко во успении твоем нас не оставляеши.

Радуйся, Герасиме, преподобных отец Вологодских первоначальниче.

Спастися всем нам помози, угодниче Божий, преподобне отче Герасиме, мир умири и помяни всех веру и любовь к тебе имущих, имя твое молитвенно призывающих и на поклонение мощем твоим святым приходящих, да избавлени тобою, вопием Богу: Аллилуиа.

Стена был еси, преподобне Герасиме, всем требующим в бедах и напастех твоего заступления; темже и нас, немощствующих грехи многими, заступи молитвами твоими со усердием вопиющих тебе таковая:

Радуйся, указателю пути праваго;

радуйся, святче Божий, со святыми обитаяй и за грешныя Бога умоляяй.

Радуйся, любовь твою к отечеству земному и по смерти являяй;

радуйся, мощи твоя святыя чудесы многими прославивый.

Радуйся, хромых и разслабленных благосердый укрепителю;

радуйся, ногами болезнуюшаго Иакова право ходити устроивый.

Радуся, всех усердно притекающих к тебе от искушений и бед скорое избавление;

радуйся, яко от Господа на небесах обрел еси мзду трудов твоих.

Радуйся, Герасиме, преподобных отец Вологодских первоначальниче.

Пение немолчное Пресвятей Троице хотяще пряносити, начаша приходити мнози исцеления ради недуг своих к чудесно обретенному месту погребения твоего, преподобне отче Герасиме, забвенному от многих лет, возградиша на гробе твоем малу часовню, раку устроиша и икону твою написаша; последи же и храм преславен воздвигоша, в немже приношашеся безкровная жертва о спасении всех православных христиан, вопиющих Богу: Аллилуиа.

Светозарным светом блистает преславный храм твой, преподобне отче Герасиме, имея цельбоносный твой гроб яко светильник пресветлый, да видяще видим и благоговейне почитающе тя, дерзаем глаголати ти сице:

Радуйся, граду Вологде и святому храму, идеже покоятся святыя мощи твоя, страже неусыпный;

радуйся, яко лучами святыни твоея нас озаряеши.

Радуйся, святилище света небеснаго;

радуйся, святому храму твоему утверждение и нам, почитающим тя, спасение.

Радуйся, утешение всем прибегающим к твоей всесильней помощи;

радуйся, безпомощным скорый помощниче.

Радуйся, немощных целителю;

радуйся, яко молитвенно тя призывающия скоро посещаеши.

Радуйся, Герасиме, преподобных отец Вологодских первоначальниче.

Благодать твою и твое велие дерзновение пред Богом ведуще, преподобне отче Герасиме, с верою и любовию покланяемся тебе и молимся: молися Всеблагому Богу, да хранит Церковь святую от неверия и раскола, всех нас от бед и напастей, да вопием с тобою Богу: Аллилуиа.

Поюще подвиги твоя равноапостольныя и многия преславныя чудотворения твоя, преподобне отче Герасиме, ублажаем богомудрое твое пришествие во град Вологду и всечестное твое успение, яко и по преставлении твоем не оставляеши нас благодатными чудес даровании. К тебе убо припадаем, тебе молимся и восхваляем тя сице:

Радуйся, Апостолов Христовых единонравный последователю;

радуйся, от вечности предопределенный просветителю страны Вологодския.

Радуйся, апостольски подвизавыйся во граде Вологоде;

радуйся, яко подвигом тезоименнаго Герасима, иже на Иордане реце, последовал еси.

Радуйся, стране нашей многоценное украшение;

радуйся, Ангельских ликов собеседниче.

Радуйся, всех святых присный друже;

радуйся, непрестанный молитвенниче ко Господу о совершающих благочестно память твою.

Радуйся, Герасиме, преподобных отец Вологодских первоначальниче.

О великий угодниче и преславный чудотворче, страны нашея первоподвижниче, преподобне отче Герасиме, прими от нас недостойных в похвалу тебе приносимое сие малое моление наше, и предстоя престолу Господа славы, молися о всех нас, да избавимся от всяких бед и болезней и обрящем милосердие Божие в день судный, в радости поюще Богу: Аллилуиа.

Ангелоподобное видев житие пустыннолюбивых старец в пещерных затворех Гнилецкия обители, юже возлюби преподобный Феодосий Печерский, тишину пустыни и ты возлюбил еси, преподобне Герасиме, и в юности возраста своего отшел еси от дому родителей твоих в ону пустыню Гнилецкую, и тамо восприяв Ангельский образ, водворился еси с работающим Богу. Темже, яко избранника Божия, величаем тя пении сими:

Радуйся от благочестиваго корене отрасле святейшая;

радуйся, града Киева пречестное порождение.

Радуйся, от млада возраста в дому Божием пребывати возжелавый;

радуйся, любве ради Христовы преименитый град отечества твоего оставивый.

Радуйся, обители Гнилецкия святое прозябение;

радуйся, яко богомудрая пчела подвизающихся тамо отец аки от различных цветов сладость духовныя мудрости собравый.

Радуйся, во мраце невечернем свет Боговедения снискавый;

радуйся, иночество доброе ради служения Богу приявый.

Радуйся, Герасиме, преподобных отец Вологодских первоначальниче.

Избранный угодниче Христов, преподобне отче наш Герасиме, первый равноангельным житием в Вологодстей стране просиявый от гор Киевских, осветивый благочестия светлостьми пустыни севера, и путь к небеси правый многим показавый, похвальная восписуем ти любовию чтущии святую память твою; ты же имеяй дерзновение ко Господу, молитвами твоими от всяких нас бед свободи, зовущих:

Радуйся, Герасиме, преподобных отец Вологодских первоначальниче.

О, преподобне и богоносне отче наш Герасиме, угодниче Христа Бога нашего, от юности мир и вся яже в нем презревый, Христа же от всея души усердно возлюбивый! Якоже древний Авраам, от земли твоея и от отечества богоспасаемаго града Киева, в землю дольнюю Богом наставляем, во град сей, Вологду, преселился еси, и в нем пречестную обитель во имя Живоначальныя Троицы воздвигл еси, в нейже во бдениих всенощных и молитвах дненощных Богу совершенно угодил еси. Сего ради и Христос Господь благоугодныя твоя подвиги видев, даром чудес изобильно обогати тя: не точию бо жив сый, но и по преставлении многоразличныя, аки источник неисчерпаемый, источаеши исцеления с верою к тебе приходящим. Темже нам грешным и недостойным рабом твоим помози благоугодными твоими молитвами; простри ко всемогущему Богу преподобныя твоя руце и испроси нам от обдержащих нас болезней, бед, зол и напастей избавление, да с верою ублажаем тя, теплаго нашего заступника, паче же прославляем всегда прославльшаго тя Христа Бога нашего, Емуже со Отцем и Святым Духом честь, слава и поклонение, ныне и присно, и во веки веков. Аминь.