Акафист преподобному Никону Радонежскому и всея России чудотворцу

Великого строителя Лавры богоноснаго Сергия достойными похвалами ублажим преславно. Ты же, яко добрый любителю благолепия, прими от нас сицевая, с любовию тебе приносимыя пения: Радуйся, Никоне, Церкви Российстей украшение.

Ангелу, пустынному подражателю, к Сергию, отцу твоему притекл еси и до конца верен заветам его пребыл еси, темже поминай нас, в веселии зовущих ти:

Радуйся, Никоне, избегший житейских попечений.

Радуйся, добрый послушателю отеческих учений.

Радуйся, корень зла в себе победивый.

Радуйся, лилию благочестия в сердце своем возрастивый.

Радуйся, Никоне, Церкви Российстей украшение.

Видя в родителех своих доброе благочестие и веры православныя твердое исповедание, яко чадо их возлюбленное воспевал еси с ними: Аллилуиа.

Разум добр стяжав себе, плоды благочестиваго воспитания вскоре, в младом возрасте явил еси: кротостью и смирением Богу угождая, сим добродетелем твоим подражая, сих добродетелей достигнути желая, велегласно зовем:

Радуйся, добрая отрасле родителей благочестивых;

Радуйся, в юности еще сад Христу в сердце своем насадивый.

Радуйся, иноческий путь на земли избравый;

Радуйся, прелести мира сего поправый.

Радуйся, Никоне, Церкви Российстей украшение.

Силою свыше умудренный, к подвижнику великому пришед и к стопам его припал, умоляя его, дабы одним сердцем пети с ним песнь Христу Господу: Аллилуиа.

Имея от Бога дар прозрения, Сергий Преподобный, отец твой духовный, узрев в тебе искреннее излияние души твоея, повеле [ко] ученику своему Афанасию в обитель его шествовати и в ней иноческому житию поучатися. Мы же на сем пути твоем зовем:

Радуйся, сердце свое преподобному отцу открывый;

Радуйся, душу свою в послушание ему преклонивый.

Радуйся, ревностным иноком себе явивый;

Радуйся, радость небесную получивый.

Радуйся, Никоне, Церкви Российстей украшение.

Бурю житейских помышлений презревши, сан иерея Божия восприял еси, в новом подвизе своем всерадостно воспевая сердцем и усты: Аллилуиа.

Слыша о твоем добрем житии, по двоих летех преподобный отец твой Сергий возжела видети тя и с радостию прияв, в единой келии с собою житии повеле, благодатию сердце твое к совершенству уготовляя, мы же вас вкупе яко единых прославляем:

Радуйтеся, добрии добродетелей подвижницы;

Радуйтеся, души свои в храм божий устроителие.

Радуйтеся, Христовых совершенств достизателие;

Радуйтеся, ангельского жития подражателие.

Радуйтеся, отцы наши Сергие и Никоне, Церкви Российстей славо и украшение.

Боготочною рукою духовная дарования источая, вся на полезная наставляя, Сергие и Никоне преподобне, песнь Богу воспевающе: Аллилуиа.

Видевше добраго себе помощника в попечении о братии, учитель твой Сергий преподобный избра тя и постави игуменом обители своея, ты же Никоне всеславный, безмолвие возлюбивый, токмо воле отца повинувшеся приял еси бремя трудов его, того ради зовем:

Радуйтеся, искреннии наши наставницы;

Радуйтеся, славнии домов Божиих строителие.

Радуйтеся, сокровищ духовных обладателие;

Радуйтеся, монашествующих собирателие.

Радуйтеся, отцы наши Сергие и Никоне, Церкви Российстей славо и украшение.

Проповедник божественных учений был еси, Никоне преподобне, в церкви братию поучая, пети всегда: Аллилуиа.

Возсия миру светом евангельского благочестия, к миру ангельскому преставися учитель твой, Никоне преподобне, ты же скорбию исполненный, прими яко общника печали твоея, песнопения сия:

Радуйтеся, преподобнии Сергие и Никоне, истиннии друзи Христовы;

Радуйтеся, вернии исполнителие заповедей его.

Радуйтеся, добрии делателие вертограда его;

Радуйтеся, блаженнии наследницы, горния славы его.

Радуйтеся, отцы наши Сергие и Никоне, Церкви Российстей славо и украшение.

Хотя добре исполнити служение свое, любовь отеческую к братии изливал еси, темже и имя твое, яко миро всюду, благоуханием своим подвизая всех пети: Аллилуиа.

Дивно являя в житии своем многие труды твоя, еще и словом поучения монашествующих наставляя како жити им по воле Творца своего; за сию ревность делания твоего прими похвалу сию:

Радуйся, добрый пастырю овец своих;

Радуйся, игумене, достойный преподобнаго Сергия преемниче.

Радуйся, твердый исполнителю его велений;

Радуйся, любимый посреде монашествующих селений.

Радуйся, Никоне, Церкви Российстей украшение.

Странно безмолвия любителю обителью иноков управляти и игуменом братии бытии и по шести летех на подвиг совершеннаго уединения, преподобне отче, устремися, да единою душею неразлучно Богу предстоя вопити Ему: Аллилуиа.

Весь горе возвысися и созерцая сердцем неизреченная и преславная, не можаше отринути моление братии: «Попекись и о спасении ближних твоих», с любовию приял паки бремя трудов в обители: сих ради и мы паки зовем ти:

Радуйся, скорый послушателю верных молений;

Радуйся, теплый ходатаю наших прошений.

Радуйся горе предстоящий;

Радуйся, доле усердием горящий.

Радуйся, Никоне, Церкви Российстей украшение.

Вся братия обители Святыя Троицы печали исполнишася, егда хан Едигей опустоши землю Российскую и к обители их приступи, токмо молитвами Никона игумена своего не остави пети песнь: Аллилуиа.

Ветии многовещании недоумевают, что и глаголати о пречудном видении преподобнаго, егда святителие Московские Петр и Алексей, а с ними и преподобный Сергий явишася и рекоша ему: «Угодно сие Господу, да коснутся сего места иноплеменницы, да не скорбите и не смущайте сердец ваших; искушение скоро прейде и обитель не токмо не запустеет, но более расцветет». За сие откровение тебе достойне воспевати похвалы сия:

Радуйся, Никоне, молитвенниче теплый и преизрядный;

Радуйся, откровений Божиих зрителю.

Радуйся, будущих яко настоящая созерцателю.

Радуйся, Никоне, Церкви Российстей украшение.

Спасти хотя святыни неким удалихся временно с братию своею из обители и в изгнании не преста с надеждею воспевати Богу: Аллилуиа.

Царю Превечный, Утешителю, Троице Пребожественная, не даде погибнути месту избранному и по удалении Едигея с полчищами, превратившаго всю обитель в развалины, возвратишася преподобный с братиею и нача восставляти обитель своего чуднаго наставника, за сию ревность пламенную и за великое множество трудов твоих, прими всеблаженне Никоне, песнь сию к тебе возносимую:

Радуйся, возлюбленное чадо Святыя Троицы;

Радуйся, избранный сосуде Божественнаго промышления.

Радуйся, многи скорби претерпевый;

Радуйся, от них же Господом избавивыйся.

Радуйся, Никоне, Церкви Российстей украшение.

Пение всеумиленное приносим тебе, преподобне, яко по триех летех через тя исполнишася пророческое проречение отца твоего духовного и обитель яко крин процвете на месте опустошения и все множества иноков воспеша благодарственную песнь Господу: Аллилуиа.

Светоподателя узрев в тебе Церковь Российская, яко сподобишася обрести и на свещнице мира отца твоего Сергия богоноснаго, мощи святыя поставити и над сими храм Живоначальныя Троицы воздвигнути и живописью лучшею украсити его, за сия труды твоя прими от недостойных уст славословия:

Радуйся, сподобивыйся узрети и миру всему явити святаго тела Сергиева нетление;

Радуйся, чрез сие громогласно проповедавый таинство Воскресения.

Радуйся, Пасху вечную миру явивый;

Радуйся, строителю церкви Божией и украсителю.

Радуйся, Никоне, Церкви Российстей украшение.

Благодать подаждь ми, Господи, да воспою достойно угодника твоего, научающа всех пети: Аллилуиа.

Поюще житие твое, отче преподобне, восхваляем и скончание твое, како поучая братию: «Держати веру правую и житие благочестивое» умолк и в радости воскликнув: «Отнесите меня в храмину светлую, уготованную мне молитвами отца моего», и, оградив себя крестным знамением, душу свою Богу предал еси, темже мы вечно тебе благодарнии, благоговейно поем:

Радуйся, светильниче веры и благочестия;

Радуйся, луче Света Невечерняго.

Радуйся, наследниче жизни вечныя;

Радуйся, радосте наша и похваление.

Радуйся, Никоне, Церкви Российстей украшение.

О, великий угодниче Божий, друже Сергиев и сожителю всем святым, не престай посещати нас, любовию поминающих тя, подавая требующим исцеление и миру всему утешение, да с радостию всегда вопием: Аллилуиа, аллилуиа, аллилуиа.

Ангелу, пустынному подражателю, к Сергию, отцу твоему притекл еси и до конца верен заветам его пребыл еси, темже поминай нас, в веселии зовущих ти:

Радуйся, Никоне, избегший житейских попечений.

Радуйся, добрый послушателю отеческих учений.

Радуйся, корень зла в себе победивый.

Радуйся, лилию благочестия в сердце своем возрастивый.

Радуйся, Никоне, Церкви Российстей украшение.

Великого строителя Лавры богоноснаго Сергия достойными похвалами ублажим преславно. Ты же, яко добрый любителю благолепия, прими от нас сицевая, с любовию тебе приносимыя пения: Радуйся, Никоне, Церкви Российстей украшение.

Преподобне и преблаженне отче наш Никоне, подражателю и сподвижниче и наследниче дарований Богоноснаго отца нашего Сергия, иже и честныя своя мощи в руках твоих, якоже Илия милоть свою в руках Елиссея, оставил есть, тобою в землю сокрываемыя, не аки в погребение, но во удостоверение нетления, и тобою открываемыя в явление чудес и во обильнейшее излияние источника исцелений. К тебе, купно с ним на Небесех живущему, и купно с ним на земли блаженне почивающему, с любовию простираем сердечныя желания и молебная словеса, тебе предлагающе наша немощи и скорби, и нужды, душевныя же и телесныя. Приими недостойная наша моления и твоею светлою и крепкою молитвою очисти, соверши, и вознеси ко Многомилостивому и Великодаровитому Владыце нашему Господу и Богу Иисусу Христу, да благословит и сохранит страну нашу и святую Обитель сию в мире и тишине. Нам же всем да подаст благодатию Своею грехов оставление, жития исправление, недугов исцеление, от бед избавление, от искушений избытие и освобождение, в скорбех утешение, в нуждах благовременну помощь, наипаче же в вере преспеяние, в надежде утверждение, в любви возрастание, душ наших спасение, яко да и во временном сем житии, совершеннее же в вечном его Царствии, выну приносим Ему славу, честь и поклонение, со Безначальным Его Отцем, и Пресвятым и Благим, и Животворящим Его Духом, во веки веков. Аминь.