Акафист преподобной Рахили Бородинской

Избранная дщи Царя Небеснаго,/ истинная служительнице Пресвятыя Богородицы,/ новая чудотворице и предивная православным помощнице,/ преподобная мати Рахиле,/ прославляюще прославльшаго тя Господа,/ воспеваем ти похвальная,/ ты же имущи дерзновение ко Святей Троице,/ от всяких нас бед свободи, да зовем ти:/ Радуйся, Рахиле, сокровище Бородинское, земли Московския похвало и радование.

Ангелов Творец и славы Сый Господь, дарова тя, Рахиле, яко многоценное сокровище, людем российским, во дни великия смуты и мятежа, да видяще равноангельное житие твое и благодати струю выну текущую, не погибнут до конца во гресех своих и обратятся в покаянии к Создателю своему, тебе же благодарственно воспоют похвальную песнь сице: Радуйся, звездо, во мраце безбожия светло возсиявшая: Радуйся, житием твоим Солнце Правды, Христа проповедавшая. Радуйся, во времена гонений лютых за правую веру брань мужески подъявшая: Радуйся, новомучеников российских сопричастнице. Радуйся, на земли совершенствам Отца Небеснаго подражавшая: Радуйся, венец нетленный от Него приявшая. Радуйся, добродетелей лествицею к Небесем востекшая: Радуйся, во плоти ангельски пожившая. Радуйся, пречудное и быстрое падших востание: Радуйся, скорбящих от слез избавление. Радуйся, о рати православней молитвеннице теплая: Радуйся, за Русь Святую предстательнице непостыдная. Радуйся, Рахиле, сокровище Бородинское, земли Московския похвало и радование.

Видя Господь благое сердца твоего изволение, яко издетска послужити Ему восхотела еси, призва тя на тесный и прискорбный путь жития иноческаго, к Царствию Небесному ведущий: Ты же всем сердцем, всею душею и всею крепостию твоею Бога возлюбивши непрестанно взывала еси: Аллилуиа.

Разум старческий в юных летех стяжала еси, преподобная, отвращалася бо еси суетных утех мира сего, душу твою Божественными писании веселящи. Темже мы, дивящеся таковому о тебе Божию промышлению зовем: Радуйся, храм Божий и молитву от юности возлюбившая: Радуйся, безмолвию и богомыслию прилежавшая. Радуйся, начало подвигов твоих во младости положившая: Радуйся, главу твою под благое иго Христово подклонившая. Радуйся, благочестивых родителей отрасль пречестная: Радуйся, Христа ради дом родительский оставившая. Радуйся, нрав боголюбив стяжавшая: Радуйся, верою ум твой просветившая. Радуйся, яко издетска сирым и убогим милосердия токи излияла еси: Радуйся, яко ризы и брашна нищей братии Христовой подавала еси. Радуйся, отроковице добрая, Божественныя благодати преисполненная: Радуйся, вышней премудрости наученная. Радуйся, Рахиле, сокровище Бородинское, земли Московския похвало и радование.

Силою Вышняго и неисповедимым Промыслом ведома, притекла еси во град Киев, поклонения ради честным мощем преподобнаго Феодосия, егоже измлада возлюбила еси: святую же Лавру Печерскую узревши, воспела еси благих Подателю Богу: Аллилуиа.

Имущи желание равноангельнаго иноческаго жития, пред ракою святых мощей Божественнаго Феодосия, яко живу сущу ему, просила еси, отроковице Боголюбивая, волю Божию о тебе известну сотворити: мы же видяще толикое твое тщание и веру несумненну, вопием таковая: Радуйся, начальника монашества Российскаго усердно чествовавшая: Радуйся, к святым мощем его с верою притекшая. Радуйся, невидимою силою прямо раки поставленная: Радуйся, к подножию ея со слезами приклонившаяся. Радуйся, явления самаго преподобнаго сподобившаяся: Радуйся, усты ко устом с ним глаголавшая. Радуйся, от первоигумена Лавры Печерския благословение приимшая: Радуйся, на путь монашеский им управленная. Радуйся, преподобным Феодосием чрез все житие твое, яко отцем, руководимая: Радуйся, с нимже ныне в Царствии Небеснем прославленная. Радуйся, розго младая, к лозе монашества Российскаго привитая: Радуйся, плод сторичный в пособие православным возрастившая. Радуйся, Рахиле, сокровище Бородинское, земли Московския похвало и радование.

Бурю внутрь имеяй помышлений сумнительных, благочестивый родитель твой смятеся, помышляя в замужество вдати тя, преподобная Рахиле, ты же Единому Жениху паче всех человек краснейшу душею уневестившися, земнаго супружества отвращалася еси, поющи Богу: Аллилуиа.

Слышавши родителя грозныя увещания, голубице чистая, убоялася еси, жениху смертному отдана быти, сего ради во град Смоленск востекла еси к чудотворней иконе Одигитрии, да управит путь твой к Безсмертному Жениху Христу, темже вопием ти: Радуйся, на Богоматерь упование возложившая: Радуйся, козни вражия всесильною помощию Ея победившая. Радуйся, яко Пречистая упования твоего не посрамила еси: Радуйся, яко во обитель Вознесения Господня путь твой управила еси. Радуйся, земным раем святую обитель почитавшая: Радуйся, тамо сердцем и усты немолчно Творца прославлявшая. Радуйся, яко птица тенет мирскаго жития избавльшаяся: Радуйся, дивным цветом во дворех Господа процветшая. Радуйся, чистая дево, к Пречистей Агнице слезно взывавшая: Радуйся, и сама агницей кроткой наименованная. Радуйся, голубице, под кровом Всевышняго вогнездившаяся: Радуйся, с мудрыми девами в брачный чертог радостно возшедшая. Радуйся, Рахиле, сокровище Бородинское, земли Московския похвало и радование.

Боготечную и путеводную звезду имущи, Рахиле, пречуднаго Феодосия, житию его святому и подвигом безпорочно поревновала еси, братии служением неленостным, пощением, бдением, еще же и плоти твоем, умерщвлением: мы же видяще толикия труды твоя, спасения ради подъятыя, поем укрепльшему тя Христу: Аллилуиа.

Видящи, преподобная, яко родитель не остави тя попечением, аще и в монастырь вселилася еси, потщалася еси зельными подвиги удручити плоть твою и милостыню творити, наипаче же обитель святую оставльши вдатися в подвиг странничества. Мы же, видяще толикое твое о добродетели рачение, глаголем: Радуйся, заповедей евангельских хранительнице усердная: Радуйся, совершеннаго нестяжания исполненная. Радуйся, любве родительския любве ради Христовы отвратившаяся: Радуйся, красных мира сего до конца отвергшаяся. Радуйся, яко в нищетне образе неведомая миру странница явилася еси: Радуйся, яко нищетою вольною подражати Владыце Христу потщалася еси. Радуйся, поношения и поругания от людей приявшая: Радуйся, сего ради Христа и Пречистую Матерь Его сопутниками имевшая. Радуйся, мраз и глад мужески претерпевшая: Радуйся, злострадания телесная паче плотскаго упокоения возлюбившая. Радуйся, яко пищи безсмерныя ныне причащаешися: Радуйся, яко упокоением Небеснаго Царствия ныне наслаждаешися. Радуйся, Рахиле, сокровище Бородинское, земли Московския похвало и радование.

Проповедует земля Смоленская совершенство богоподобных твоих добродетелей, Рахиле преславная, яко еще в новоначалии сущи брашна и хлебы во обители твоей помощию Богородицы умножила еси, и тако множество людей напитавши, коварство наветниц твоих посрамила еси, не ведущих пети: Аллилуиа.

Осияния Небеснаго сподобилася еси, мати честная, Приснодеву Богородицу в чудном видении узревши, и Сию яко Младопитательницу добрую и Стену девства нерушимую обретши, в веселии спасительный путь твой проходила еси, сего ради венчаем тя сими песенными цветы: Радуйся, целомудрие, яко многоценный бисер, соблюдшая: Радуйся, хранительницю девства твоего Богоматерь имевшая. Радуйся, ничесоже на небеси и на земли разве Христа видети желавшая: Радуйся, любовию Божественною душу и тело твое согревавшая. Радуйся, риз лепоту и доброту телесную презревшая: Радуйся, одеяние чертога небеснаго и память смертную паче возлюбившая. Радуйся, мучительства страстей мудре избежавшая: Радуйся, единому Богу служити восхотевшая. Радуйся, постнического жития истинное правило: Радуйся, в подвизех древним отцам и женам поревновавшая. Радуйся, яко в невестнике Христовом присно живеши: Радуйся, яко и нас предстательством твоим не оставляеши. Радуйся, Рахиле, сокровище Бородинское, земли Московския похвало и радование.

Хотя человеколюбец Господь явити тя, богоблаженная мати Рахиле, людем Своим, путь твой во Святыя Горы управи, идеже преподобный Иоанн Затворник подвизашеся, иже многия дивныя тайны поведа ти и паки во обитель святую возвратитися и страждущим тамо служити повеле, егоже богомудрых, словес, яко Самаго Господа, в сладость послушавши, вопияла еси: Аллилуиа.

Новосоделала еси, Рахиле пречудная, многими труды и борении душу твою, темже явилася еси Духу Святому приятелище достойное: обаче послушанию монастырскому вдавшися, христоподражательным смирением твоим уязвила еси прегордаго велиара, сего ради зовем ти: Радуйся, Владычицу Пречистую путеводительницею имевшая: Радуйся, во обитель Владычнюю Ею управленная. Радуйся, братству монастырскому паки всеусердно послужившая: Радуйся, в послушании при поварне дары благодатныя явившая. Радуйся, дом добродетели на камени заповедей утвердившая: Радуйся, фараона мысленнаго в море смирения потопившая. Радуйся, противу мира, плоти и диавола брань мужески подъявшая: Радуйся, венец победы от Подвигоположника приимшая. Радуйся, Господа серафимскою любовию возлюбившая: Радуйся, чести безплотных на небеси сподобльшаяся. Радуйся, идеже Христос в телеси, тамо и ты пребываеши: Радуйся, яко милость Его богатую на нас призываеши. Радуйся, Рахиле, сокровище Бородинское, земли Московския похвало и радование.

Странствия подвиг совершивши, преподобная мати, присно странницею себе почитала еси, Отечества Небеснаго взыскующи, сего ради сподоби тя Господь послужити Пресвятому имени Своему во обители Всемилостиваго Спаса, на крови воинов стоящей, идеже многими даровании и чудесы просияла еси, поющи Богу: Аллилуиа.

Всю себе в жертву Господеви принесши, Рахиле предивная, благоухание приятное непорочным житием Владыце твоему явилася еси: приходящим к тебе с верою вспоможение безмездно подающи и немощи немощных носящи и тако Закон Христов исполнила еси, темже вопием ти: Радуйся, яко во обители Нерукотворнаго Образа Христова потрудилася еси: Радуйся, яко нерукотворный храм души твоея благолепием добродетелей украсила еси. Радуйся, Духа Святаго благодать стяжавшая: Радуйся, образ Божий в себе обновившая. Радуйся, мати наша чадолюбивая: Радуйся, тайных прегрешений обличительнице прозорливая. Радуйся, яко доилица, чада твоя духовная любовию согревавшая: Радуйся, словесным и чистым млеком души их воспитавшая. Радуйся, заповеди Господни творити научающая: Радуйся, окамененная сердца во источницы милования обращающая. Радуйся, болящим и скорбным скорая помощнице: Радуйся, заблуждшим мудрая наставнице. Радуйся, Рахиле, сокровище Бородинское, земли Московския похвало и радование.

Всяк разум удивляется бывшему на тебе, Рахиле блаженная, Божию благоволению, яко служащи в алтаре Господнем, зрительница видений чудесных явилася еси, темже радования духовнаго исполнившися, вопияла еси Богу: Аллилуиа.

Ветия многовещаннии не возмогут изрещи теплоту Божественныя твоея любве, преподобная, юже на люди православныя обильно излияла еси, аще и в немощи телесной сущи, обаче силою Божиею целительница и чудотворица великая показалася еси. Сего ради восхваляем тя сице: Радуйся, Божию Силу и Божию Премудрость людем проповедавшая: Радуйся, немощных в вере укрепившая. Радуйся, духовнаго любомудрия ревнительнице: Радуйся, пищи духовныя и телесныя подательнице. Радуйся, оставленных врачами со одра болезни воздвизающая: Радуйся, отступивших от правыя веры на путь спасения возвращающая. Радуйся, блуждающих по морю жития сего мудре окормляющая: Радуйся, юныя благочестию научающая. Радуйся, пророчества дара исполненная: Радуйся, будущая, яко настоящая провидевшая. Радуйся, от внезапныя смерти избавляющая: Радуйся, от погибели душевныя спасающая. Радуйся, Рахиле, сокровище Бородинское, земли Московския похвало и радование.

Спасти хотя чад заблуждших милосердный Господь, посла тя, Рахиле, яко агницу посреде волков, во свидетельство истины Христовой, да соберутся овцы расточенныя во ограду церковную, да возсияет паки во Отечестве нашем свет веры Православныя, подвизая всех пети Богу: Аллилуиа.

Стена благочестия явилася еси непоколеблема, богомудрая мати Рахиле, ограждающи притекающих к тебе от душепагубных учений, укрепляющи малодушных, предстательствующи в молитвах, еще же и лютыя беды грядущия на страну нашу предвозвестила еси. Мы же чудящеся таковому о нас грешных Божию промышлению умильно глаголем: Радуйся, православия стено нерушимая: Радуйся, молитвы за мир лампадо негасимая. Радуйся, любве пучино Богом излиянная: Радуйся, светильниче на свещнице высоцем поставленный. Радуйся, злобы бесовския мрак отгоняющая: Радуйся, человеки от бед и скорбей избавляющая. Радуйся, многих сынов Российских из бездны греховныя восхитившая: Радуйся, тех на путь покаяния наставльшая. Радуйся, не токмо верных, но и неверных любовию объявшая: Радуйся, милование Христово к немощным и грешным проповедавшая. Радуйся, неимущих вдов и сирот снабдевающая: Радуйся, алчущих и жаждущих насыщающая. Радуйся, Рахиле, сокровище Бородинское, земли Московския похвало и радование.

Пение всякое не возможет изрещи богатство духовных дарований твоих Рахиле прехвальная, яко не токмо постническим житием просияла еси, но и ближнему безмездно послужила еси, и веру Христову пред лицем власти богоборныя исповедала еси: темже мы, славяще Бога, дивнаго во святых своих поем: Аллилуиа.

Светоприимную свещу сущим во тьме неразумия людем русским, Богом явленную, зрим тя, всеблаженная мати наша Рахиле, возсияла бо еси светом добродетельнаго жития твоего, егда оскуде на Руси преподобный, и наставила еси к разуму истинному, вся зарею словес Божиих ум просвещающи, звании же почитаемая сими: Радуйся, Солнца Правды луче пресветлая: Радуйся, Света Невечерняго заре немерцающая. Радуйся, яко молния, словесы твоими души просвещающая: Радуйся, яко гром, враги Церкве Христовы устрашающая. Радуйся, чистых дев ко Христу невестоводительнице: Радуйся, целомудрия любителей наставнице. Радуйся, чад твоих на подвиг исповедничества благословившая: Радуйся, молитвами твоими их укрепившая. Радуйся, духовнаго просвещения светильниче небосветлый: Радуйся, милосердия и милостыни источниче неисчерпаемый. Радуйся, нас грешных к покаянию призывающая: Радуйся, ближняго любити научающая. Радуйся, Рахиле, сокровище Бородинское, земли Московския похвало и радование.

Благодать древнюю дати восхотев, Человеколюбец Господь яви тя, Рахиле преславная, во дни гонений на Церковь Христову новую Свою угодницу и за Русь молитвенницу неусыпающую, сего ради благодаряще Бога вопием: Аллилуиа.

Поюще честное твое преставление, преподобная мати Рахиле, ублажаем тя вси, тобою бо препрославленный наш Господь славно прославися, и всех воспевати тебе научи: Радуйся, святая, со всеми святыми на небесех торжествующая: Радуйся, с ними песнь победную Богу воспевающая. Радуйся, в ризы светлыя неветшающия ныне облеченная: Радуйся, добротою девства преиспещренная. Радуйся, от Христа венец достойный приявшая: Радуйся, и нам в Царствие Небесное путь показавшая. Радуйся, целительнице безмездная: Радуйся, предстательнице о нас пред Богом непостыдная. Радуйся, Церкве Христовы оружнице непобедимая: Радуйся, иноком в брани духовней наставнице богомудрая. Радуйся, вертограда Бородинскаго маслина плодовитая: Радуйся, Российскаго луга духовнаго крине благовонный. Радуйся, Рахиле, сокровище Бородинское, земли Московския похвало и радование.

О преблаженная и богомудрая мати наша Рахиле, не забуди убогих твоих до конца, приими сие малое моление наше и принеси е ко Престолу Вседержителя: умоли Христа Всецаря силу свыше православным христианом на сопротивныя подати и на Судищи Страшнем грехов наших не помянути, наипаче же Царствия Небеснаго достигнути, вопиющим Ему: Аллилуиа, Аллилуиа, Аллилуиа.

Ангелов Творец и славы Сый Господь, дарова тя, Рахиле, яко многоценное сокровище, людем российским, во дни великия смуты и мятежа, да видяще равноангельное житие твое и благодати струю выну текущую, не погибнут до конца во гресех своих и обратятся в покаянии к Создателю своему, тебе же благодарственно воспоют похвальную песнь сице: Радуйся, звездо, во мраце безбожия светло возсиявшая: Радуйся, житием твоим Солнце Правды, Христа проповедавшая. Радуйся, во времена гонений лютых за правую веру брань мужески подъявшая: Радуйся, новомучеников российских сопричастнице. Радуйся, на земли совершенствам Отца Небеснаго подражавшая: Радуйся, венец нетленный от Него приявшая. Радуйся, добродетелей лествицею к Небесем востекшая: Радуйся, во плоти ангельски пожившая. Радуйся, пречудное и быстрое падших востание: Радуйся, скорбящих от слез избавление. Радуйся, о рати православней молитвеннице теплая: Радуйся, за Русь Святую предстательнице непостыдная. Радуйся, Рахиле, сокровище Бородинское, земли Московския похвало и радование.

Избранная дщи Царя Небеснаго,/ истинная служительнице Пресвятыя Богородицы,/ новая чудотворице и предивная православным помощнице,/ преподобная мати Рахиле,/ прославляюще прославльшаго тя Господа,/ воспеваем ти похвальная,/ ты же имущи дерзновение ко Святей Троице,/ от всяких нас бед свободи, да зовем ти:/ Радуйся, Рахиле, сокровище Бородинское, земли Московския похвало и радование.