Канон Воскресный, глас 5

Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную пе́снь пою́ща.

Припев: Сла́ва, Го́споди, свято́му Воскресе́нию Твоему́.

Тебе́ терноно́сный евре́йский со́нм, любве́ Благоде́телю к Тебе́ не сохра́нь ма́терния, Христе́ венча́, родонача́льника разреша́юща терно́вное запреще́ние.

Сла́ва Отцу́ и Сы́ну и Свято́му Ду́ху.

Воздви́гл еси́ мя па́дшаго в ро́в, прекло́нься, Жизнода́вче, Безгре́шне: и моея́ злосмра́дныя тли́, Христе́, претерпе́в неискуше́нно, Боже́ственнаго Существа́ ми́ром мя́ облагоуха́л еси́.

И ны́не и при́сно и во ве́ки веко́в. Ами́нь.

Богородичен: Разреши́ся кля́тва, печа́ль преста́: Благослове́нная бо и Благода́тная, ве́рным ра́дость возсия́, благослове́ние все́м конце́м цветонося́щи Христа́.

Ирмос: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припев: Сла́ва, Го́споди, свято́му Воскресе́нию Твоему́.

Же́лчь у́бо и́же из ка́мене ме́д сса́вшии, в пусты́ни чудоде́йствовавшему Тебе́ принесо́ша, Христе́: о́цет же за ма́нну воз благодея́ние Ти́ возда́ша о́троцы Изра́илевы неблагода́рнии.

Сла́ва Отцу́ и Сы́ну и Свято́му Ду́ху.

И́же дре́вле светови́дным о́блаком покрыва́еми, Живо́т во гро́бе Христа́ положи́ша: но самовла́стно воскре́с, все́м ве́рным подаде́ та́йно осеня́ющее свы́ше Ду́ха сия́ние.

И ны́не и при́сно и во ве́ки веко́в. Ами́нь.

Богородичен: Ты́, Ма́ти Бо́жия, несочета́нно родила́ еси́, И́же от Нетле́нна Отца́ возсия́вшаго, кроме́ боле́зней ма́терних: те́мже Тя́, Богоро́дицу, воплоще́нна бо родила́ еси́ Сло́ва, правосла́вно пропове́дуем.

Кре́ст Госпо́день похва́лим, погребе́ние Свято́е пе́сньми почти́м, и Воскресе́ние Его́ препросла́вим: я́ко совозста́ви ме́ртвыя от гро́б я́ко Бо́г, плени́в сме́рти держа́ву, и кре́пость диа́волю, и су́щым во а́де све́т возсия́. Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́. Го́споди ме́ртв наре́клся еси́, умертви́вый сме́рть, во гро́бе положи́лся еси́, истощи́вый гро́бы: горе́ во́ини гро́ба стрежа́ху, до́ле от ве́ка ме́ртвыя воскреси́л еси́. Всеси́льне и Непостижи́ме Го́споди, сла́ва Тебе́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Ра́дуйся, Свята́я Горо́ и Богопрохо́дная, ра́дуйся, одушевле́нная купино́ и неопали́мая. Ра́дуйся, Еди́на к Бо́гу ми́рови Мо́сте, преводя́й ме́ртвыя к Ве́чному Животу́. Ра́дуйся, Нетле́нная Отрокови́це, неискусому́жно ро́ждшая спасе́ние ду́ш на́ших.

Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Припев: Сла́ва, Го́споди, свято́му Воскресе́нию Твоему́.

Я́же от Ме́рры горча́йшыя во́ды, я́ко во о́бразе проначерта́я Пречи́стый Кре́ст Тво́й, Бла́же, грехо́вное умерщвля́ющ вкуше́ние, дре́вом услади́л еси́.

Сла́ва Отцу́ и Сы́ну и Свято́му Ду́ху.

Кре́ст за дре́во разу́мное, за сла́дкую же пи́щу же́лчь, Спа́се мо́й, прия́л еси́, за тле́ние же сме́рти кро́вь Твою́ Боже́ственную излия́л еси́.

И ны́не и при́сно и во ве́ки веко́в. Ами́нь.

Богородичен: Кроме́ у́бо сочета́ния зачала́ еси́ нетле́нно во чре́ве, и без боле́зни родила́ еси́, и по Рождестве́ Де́ва, Бо́га пло́тию ро́ждши, сохрани́лася еси́.

Ирмос: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припев: Сла́ва, Го́споди, свято́му Воскресе́нию Твоему́.

И́же сла́вы Госпо́дь в несла́вне зра́це, на дре́ве обезче́щен во́лею ви́сит, о Боже́ственней мне́ сла́ве несказа́нно промышля́я.

Сла́ва Отцу́ и Сы́ну и Свято́му Ду́ху.

Ты́ мя преобле́кл еси́ в нетле́ние, Христе́, тли́ сме́ртныя неистле́нно пло́тию вку́ш, и возсия́в из гро́ба тридне́вен.

И ны́не и при́сно и во ве́ки веко́в. Ами́нь.

Богородичен: Ты́ пра́вду же и избавле́ние на́м ро́ждши Христа́ без се́мене, свобо́дно соде́яла еси́ от кля́твы, Богоро́дице, естество́ пра́отца.

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя я́ко Благоутро́бен.

Припев: Сла́ва, Го́споди, свято́му Воскресе́нию Твоему́.

В тле́ние попо́лзся родонача́льник, Влады́ко Христе́, преслу́шаннаго бра́шна вку́ш, и к животу́ возведе́н бы́сть стра́стию Твое́ю.

Сла́ва Отцу́ и Сы́ну и Свято́му Ду́ху.

Живо́т низше́л еси́ ко а́ду, Влады́ко Христе́, и тле́ние растле́вшему бы́в, тле́нием источи́л еси́ Воскресе́ние.

И ны́не и при́сно и во ве́ки веко́в. Ами́нь.

Богородичен: Де́ва роди́, и ро́ждши пребы́сть чиста́, на руку́ нося́щаго вся́ческая, я́ко вои́стинну Де́ва Ма́ти поне́сшая.

Ко а́ду, Спа́се мо́й, соше́л еси́, и врата́ сокруши́вый я́ко Всеси́лен, уме́рших я́ко Созда́тель совоскреси́л еси́, и сме́рти жа́ло сокруши́л еси́, и Ада́м от кля́твы изба́влен бы́сть, Человеколю́бче. Те́мже вси́ зове́м: спаси́ на́с, Го́споди.

Услы́шавшя жены́ а́нгеловы глаго́лы, отложи́ша рыда́ние, ра́достны бы́вшя и тре́петны, у́жас бо ви́деша, и се́ Христо́с прибли́жися к ни́м, глаго́ля: е́же, ра́дуйтеся, дерза́йте, Аз ми́ра победи́х, и у́зники свободи́х, потщи́теся у́бо ко ученико́м, возвеща́ющя и́м: я́ко варя́ю вы́ во гра́де Галиле́йстем, е́же пропове́дати. Те́мже вси́ Тебе́ зове́м: спаси́ на́с, Го́споди.

Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щыя: Бо́же, благослове́н еси́.

Припев: Сла́ва, Го́споди, свято́му Воскресе́нию Твоему́.

Пло́тию обло́жься я́коже на у́дице льще́ния, Боже́ственною Твое́ю си́лою зми́я низвле́кл еси́ возводя́ вопию́щыя: Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Земли́ непрохо́дное осуществова́вый составле́ние, во гро́бе покрыва́ется пло́тию Невмести́мый. Ему́же вси́ пое́м: Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Еди́ну у́бо Ипоста́сь во Двою́ Естеству́, Всенепоро́чная родила́ еси́ Воплоще́ннаго Бо́га. Ему́же вси́ пое́м: Бо́же, благослове́н еси́.

Ирмос: Тебе́, Вседе́телю, в пещи́ о́троцы, всеми́рный ли́к спле́тше поя́ху: дела́ вся́кая Го́спода по́йте, и превозноси́те во вся́ ве́ки.

Припев: Сла́ва, Го́споди, свято́му Воскресе́нию Твоему́.

Ты́ о во́льней спаси́тельныя стра́сти помоли́лся еси́ ча́ши, я́коже нево́льней: два́ хоте́ния, двема́ бо по коему́ждо но́сиши существо́ма, Христе́, во ве́ки.

Сла́ва Отцу́ и Сы́ну и Свято́му Ду́ху.

Твои́м вседе́тельным схожде́нием, а́д, Христе́, пору́ганный изблева́ вся́, я́же дре́вле ле́стию умерщвле́нныя, Тебе́ превознося́щыя во вся́ ве́ки.

И ны́не и при́сно и во ве́ки веко́в. Ами́нь.

Богородичен: Тя́ я́же па́че ума́ богому́жне Сло́вом Ро́ждшую Го́спода, и де́вствующую, вся́ дела́, Де́во, благослови́м, и превозно́сим во вся́ ве́ки.

Ирмос: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к И́мя Ему́: Его́же велича́юще, Де́ву ублажа́ем.

Припев: Сла́ва, Го́споди, свято́му Воскресе́нию Твоему́.

Па́дшаго челове́ка восприя́л еси́, Влады́ко Христе́, из ложе́сн Деви́ческих всему́ совоку́плься, греху́ же ни еди́ному прича́щься: всего́ от истле́ния Ты́ свободи́л еси́ пречи́стыми Твои́ми страстьми́.

Сла́ва Отцу́ и Сы́ну и Свято́му Ду́ху.

Богото́чною кро́вию истоще́нною, Влады́ко Христе́, от Твои́х пречи́стых ре́бр и животворя́щих, же́ртва у́бо преста́ и́дольская, вся́ же земля́ Тебе́ хвале́ния же́ртву прино́сит.

И ны́не и при́сно и во ве́ки веко́в. Ами́нь.

Богородичен: Не Бо́га безпло́тна, ниже́ па́ки челове́ка про́ста произведе́ Чи́стая Отрокови́ца, и Нескве́рная: но Челове́ка соверше́нна, и нело́жно соверше́нна Бо́га. Его́же велича́ем со Отце́м же и Ду́хом.