Акафист Честному и Животворящему Кресту Господню

О, треблаже́нный Кре́сте и всечестны́й, тебе́ покланя́емся, ве́рнии, и велича́ем, ра́дующеся о боже́ственном возвыше́нии твое́м. Но я́ко победи́тельное, и ору́жие непобеди́мое, огради́ и покры́й твое́ю благода́тию зову́щия ти́:

Ра́дуйся, Дре́во треблаже́нное.

Ангели от небе́с неви́димо окружа́ют Кре́ст живоно́сный со стра́хом, и светопода́тельную благода́ть све́тло подаю́щий ны́не ве́рным зря́ще, ужаса́ются и стоя́т, зову́ще к нему́ такова́я:

Ра́дуйся, Кре́сте, вселе́нныя храни́телю; ра́дуйся, сла́во Це́ркве.

Ра́дуйся, источа́яй незави́стно исцеле́ния; ра́дуйся, просвеща́яй мирски́я концы́.

Ра́дуйся, живото́чное Дре́во и чуде́с сокро́вище; ра́дуйся, требога́тое сложе́ние и благода́тей пода́телю.

Ра́дуйся, я́ко подно́жие еси́ Бо́жие; ра́дуйся, я́ко предлежи́ши в поклоне́ние все́м.

Ра́дуйся, ча́ше испо́лнь сла́дости; ра́дуйся, све́щниче вы́шния све́тлости.

Ра́дуйся, и́м же благослови́тся тва́рь; ра́дуйся, и́м же покланя́емся Творцу́.

Ра́дуйся, Дре́во треблаже́нное.

Ви́дящи Еле́на себе́ посыла́ему, глаго́лет царю́ великоду́шно: «всежела́тельство души́ твоея́ благоприя́тнее тща́тельству моему́ явля́ется». «Ищущи у́бо, — отвеща́ о́н, — держа́внейшия тебе́ побе́ды, я́коже глаго́леши, зови́: Аллилу́ия».

Ра́зум, пре́жде недоразумева́емый, цари́ца позна́вши, возопи́ к служа́щим: «потщи́теся вско́ре от не́др земны́х обрести́ и да́ти мне́ Кре́стъ». На́нь же взира́я, рече́ со стра́хом, оба́че зову́щи си́це:

Ра́дуйся, ра́дости и́стинныя изображе́ние; ра́дуйся пе́рвыя кля́твы разреше́ние.

Ра́дуйся, сокро́вище в земли́ за́вистию сокрове́нное; ра́дуйся, зна́мение на небесе́х я́вльшееся.

Ра́дуйся, четверолу́чный и огнезра́чный Кре́сте; ра́дуйся, ле́ствице высокоутвержде́нная предзре́нная иногда́.

Ра́дуйся, а́нгелов радостотво́рное чу́до, ра́дуйся, бесо́в многоплаче́вный стру́пе.

Ра́дуйся, сла́дкое Сло́ва прия́телище; ра́дуйся, огня́ пре́лести гаси́лище.

Ра́дуйся, Кре́сте, блужда́ющим предста́телю; ра́дуйся, благопутеше́ствующим вожде́.

Ра́дуйся, Дре́во треблаже́нное.

Си́ла Дре́ва яви́ся тогда́ к увере́нию и́стинному все́х, когда́ безгла́сну же и ме́ртву к животу́ возста́ви. Ужа́сно виде́ние хотя́щим получи́ти спасе́ние, внегда́ пе́ти си́це: Аллилу́ия.

Иму́щи Еле́на непреодоле́нное ору́жие, тече́ к сы́ну своему́. То́й же зело́ увеселе́н, а́бие позна́в велича́йший Кре́ст, веселя́шеся, и игра́ньми, я́коже пе́сньми, возопи́ к нему́ такова́я:

Ра́дуйся, Кре́сте, све́та прия́телище; ра́дуйся, Кре́сте, жи́зни сокро́вище.

Ра́дуйся, пода́телю даро́в Ду́ха; ра́дуйся, приста́нище по мо́рю пла́вающих небу́рное.

Ра́дуйся, трапе́зо, нося́щая я́коже же́ртву Христа́; ра́дуйся розго́, гро́зд согре́явшая, нося́щь вино́ та́инственное.

Ра́дуйся, я́ко ски́петры ца́рския храни́ши; ра́дуйся, я́ко главы́ зми́ев сокруша́еши.

Ра́дуйся, све́тлое ве́ры позна́ние; ра́дуйся, всего́ ми́ра спасе́ние.

Ра́дуйся, Бо́жие к сме́ртным благослове́ние; ра́дуйся, сме́ртных к Бо́гу посре́дствие.

Ра́дуйся, Дре́во треблаже́нное.

Ре́вность вну́трь Боже́ственную Еле́на прие́мши, взыска́ и обре́те то́щно в земли́ кры́емый Кре́ст, и явля́емый на небеси́ царе́ви. Его́ же воздви́же, и смотря́ на лю́ди ве́рою рече́: Аллилу́ия.

Солнцезра́чный яви́ся Кре́ст в ми́ре, и вси́ све́та испо́лншеся, и те́кше я́коже к заре́, зря́т его́, я́ко благи́х вино́вна, в рука́х боже́ственных воздви́женна, его́же пою́ще ре́ша:

Ра́дуйся, луче́ мы́сленнаго со́лнца; ра́дуйся, исто́чниче неистощи́маго мо́ря.

Ра́дуйся, Ада́ма и Евы воззва́ние; ра́дуйся, князе́й а́дских умерщвле́ние.

Ра́дуйся, я́ко возноси́мый, на́с ны́не совозно́сиши; ра́дуйся, я́ко покланя́емый, освяща́еши ду́ши.

Ра́дуйся, апо́столов мировеща́нная сла́во; ра́дуйся, страстоно́сцев благоприя́тная си́ло.

Ра́дуйся, Кре́сте, евре́ев обличе́ние; ра́дуйся, ве́рных челове́ков похвало́.

Ра́дуйся, и́м же низложи́ся а́д; ра́дуйся, и́м же возсия́ благода́ть.

Ра́дуйся, Дре́во треблаже́нное.

Боже́ственное и победоно́сное Дре́во ви́дяще, под кро́в его́ вси́ ны́не присту́пим, я́ко ору́жие то́ держа́ще, победи́м враго́в ополче́ния, и, прикаса́ющеся некаса́емому Христу́, усты́ Тому́ воззове́м: Аллилу́ия.

Ви́де Константи́н Вели́кий с небесе́ све́т, указу́ющий ему́ зна́мение Креста́ звезда́ми, и те́м побежда́ти мно́жество враго́в, Дре́во яви́ти, и зва́ти потща́ся к нему́ такова́я:

Ра́дуйся, сове́та неизрече́ннаго сы́й коне́ц; ра́дуйся люде́й благоче́ствующих сы́й ро́г.

Ра́дуйся, враго́в отвраща́яй полки́; ра́дуйся, я́коже пла́мень попаля́яй бе́сы.

Ра́дуйся, ски́петро небе́сный во́иства ца́рскаго; ра́дуйся, непобеди́мая побе́до во́инства христолюби́ваго.

Ра́дуйся, ва́рварскую го́рдость низверга́яй; ра́дуйся, челове́ческия ду́ши соблюда́яй.

Ра́дуйся, мно́гих зо́л прогони́телю; ра́дуйся, мно́гих бла́г пособи́телю.

Ра́дуйся, о не́м же христоно́снии лю́дие игра́ют; ра́дуйся, его́ же ра́ди иуде́е рыда́ют.

Ра́дуйся, Дре́во треблаже́нное.

Ле́ствица, небесе́ каса́ющаяся, бы́сть Кре́ст Госпо́день, все́х от земли́ возводя́й к высоте́ небе́сной, во е́же спребыва́ти лико́м а́нгельским всегда́, оста́вльших я́же ны́не су́щая, я́ко же несу́щая, и ве́дущих пе́ти: Аллилу́ия.

Возсия́в све́т всю́ду, Спа́се, просвети́л еси́ до́лу в а́де спя́щия: вра́тницы же а́довы не терпя́ще зре́ти блиста́ния Твоего́, падо́ша, а́ки ме́ртви, си́х же изба́вльшиися, ны́не Кре́ст зря́ще, зову́т:

Ра́дуйся, воста́ние усо́пших; ра́дуйся, утеше́ние ско́рбных.

Ра́дуйся, а́довых сокро́вищь испраздне́ние; ра́дуйся ра́йских сла́достей наслажде́ние.

Ра́дуйся, же́зле, потопи́вший еги́петское во́инство; ра́дуйся, па́ки погрузи́вый евре́йския лю́ди.

Ра́дуйся, одушевле́нное дре́во, разбо́йнику спасе́ние; ра́дуйся, благово́нная ро́жо [ро́за], благочести́вых благоуха́ние.

Ра́дуйся, пи́ще а́лчущих ду́хом; ра́дуйся, печа́те, ю́же прия́ша челове́цы.

Ра́дуйся, Кре́сте, та́ин две́ре; ра́дуйся, от него́ же пролива́ются Боже́ственнии пото́цы.

Ра́дуйся, Дре́во треблаже́нное.

Хотя́щу Моисе́ю многоутружде́нный наро́д свободи́ти от рабо́ты, вда́лся еси́ е́му, а́ки же́зл, но позна́лся еси́ ему́ и Бо́жие бы́ти та́инство. Те́мже удиви́ся твое́й, Кре́сте, си́ле, зовы́й: Аллилу́ия.

Зако́н, Иже да́вый иногда́ на Сина́йстей горе́ богови́дцу, на Кресте́ во́лею пригвожда́ется за беззако́нныя лю́ди, и кля́тву дре́внюю разруши́л е́сть, да, ви́дяще Креста́ си́лу, вси́ ны́не зове́м:

Ра́дуйся, па́дших исправле́ние; ра́дуйся, мирослужи́телей низпаде́ние.

Ра́дуйся, Воскресе́ния Христо́ва обновле́ние; ра́дуйся, мона́шествующих боже́ственное услажде́ние.

Ра́дуйся, дре́во благосенноли́ственное, и́м же покрыва́ются ве́рнии; ра́дуйся, дре́во, проро́ки предвозвеще́нное, насажде́нное на земли́.

Ра́дуйся, ца́рствия на враги́ побо́рствие; ра́дуйся, гражда́нства держа́вное предста́тельство.

Ра́дуйся, Судии́ Пра́веднаго явле́ние; ра́дуйся, па́дших челове́ков осужде́ние.

Ра́дуйся, Кре́сте, си́рых защи́тниче; ра́дуйся, Кре́сте, ни́щих обогати́телю.

Ра́дуйся, Дре́во треблаже́нное.

Стра́нное чу́до ви́дяще, стра́нное житие́ поживе́м, у́м к небеси́ вознося́ще: того́ бо ра́ди Христо́с на Кресте́ пригвозди́ся, и пло́тию пострада́, хотя́ привлещи́ к Себе́ зову́щия: Аллилу́ия.

Ве́сь прии́де с высоты́, нося́ Божество́ еди́но Преве́чное Сло́во, ро́ждься же от Де́вы Ма́тере, и я́влься ми́ру смире́нный Челове́к, Кре́ст восприе́мый оживи́ вопию́щия такова́я:

Ра́дуйся, Кре́сте, ми́рное ору́жие; ра́дуйся, путеше́ствующих нача́ло.

Ра́дуйся, спаса́емых прему́дросте и утвержде́ние; ра́дуйся, вредя́щих обуя́ние и сокруше́ние.

Ра́дуйся, благопло́дная безсме́ртная и живоно́сная ле́торасле; ра́дуйся, цве́те, процве́тший на́м спасе́ние.

Ра́дуйся, я́ко земна́я с го́рними совокупля́еши; ра́дуйся, я́ко сердца́ до́льних просвеща́еши.

Ра́дуйся, и́м же тля́ отгна́ся; ра́дуйся, и́м же боле́знь потреби́ся.

Ра́дуйся, благи́х тмочи́сленное сокро́вище; ра́дуйся, ве́рных многоимени́тая сла́во.

Ра́дуйся, Дре́во треблаже́нное.

Паде́ де́монов многоме́рзкий по́лк и ро́д евре́йский посра́млен бы́сть, зря́ Кре́ст от все́х жела́тельно покланя́емый, при́сно же источа́ющий цельбы́ вопию́щим: Аллилу́ия.

То́ки злосла́вных мудрова́ний преста́ша, пригво́ждшуся Тебе́, Христе́, на Кресте́: недоуме́ют бо вои́стинну, ка́ко и Кре́ст подъя́л еси́, и тле́ния избе́гл еси́. Мы́ же, воста́ние Твое́ сла́вяще, взыва́ем:

Ра́дуйся, прему́дрости Бо́жия высото́; ра́дуйся, про́мысла Его́ глубино́.

Ра́дуйся, я́ко тобо́ю буесло́вцев безслове́сных неразу́мие явля́ется; ра́дуйся, я́ко тобо́ю гада́телей неразу́мных па́губа сбыва́ется.

Ра́дуйся, я́ко Воскресе́ние Христо́во явля́еши; ра́дуйся, я́ко Стра́сти Его́ на́м возобновля́еши.

Ра́дуйся, первозда́нных преступле́ние разреши́вый; ра́дуйся, вхо́ды ра́йския отве́рзый.

Ра́дуйся, Кре́сте, ве́рным честны́й; ра́дуйся, неве́рных язы́ков сопротивобо́рче.

Ра́дуйся, Кре́сте, неду́гующих врачу́; ра́дуйся, при́сный помо́щниче зову́щим.

Ра́дуйся, Дре́во треблаже́нное.

Спасти́ хотя́ ми́р, Иже ми́ра Украси́тель, прии́де в о́нь неизрече́нно, и Кре́ст подъя́т, Бо́г сы́й, на́с же ра́ди вся́ по на́м подъе́млет. Те́мже и Изба́вивый на́с слы́шит от все́х: Аллилу́ия.

Сте́ну тебе́ вселе́нныя, о Кре́сте жизноно́сный, необори́мую и боже́ственную разуме́ем: и́бо небесе́ и земли́ Творе́ц устро́ив тя́, распростира́ет на тебе́ ру́це, — стра́нное слы́шание, — и вся́ научи́ вопи́ти:

Ра́дуйся, сто́лпе благоче́стия; ра́дуйся, ве́чносте насле́дия.

Ра́дуйся, мы́сленнаго Амали́ка побежда́яй; ра́дуйся, Иа́ковлеми рука́ма прообразу́емый.

Ра́дуйся, ты́ бо ветхозако́нную се́нь преобрази́л еси́; ра́дуйся, ты́ бо пророковеща́нныя глаго́лы испо́лнил еси́.

Ра́дуйся, Спа́са все́х носи́вый; ра́дуйся, тли́теля ду́ш упраздни́вый.

Ра́дуйся, его́ же ра́ди соедини́хомся а́нгелом; ра́дуйся, его́ же ра́ди озари́хомся све́том.

Ра́дуйся, тебе́ бо покланя́емся, почита́юще; ра́дуйся, тебе́ бо приглаша́ем, зову́ще:

Ра́дуйся, Дре́во треблаже́нное.

Пе́ние вся́кое изнемога́ет, спростре́тися хотя́щее мно́жеству мно́гих твои́х чуде́с, похва́л бо мно́жество а́ще и принесе́м тебе́, Кре́сте честны́й, ничто́же соверша́ем досто́йно, я́же возда́л еси́ на́м, оба́че зове́м: Аллилу́ия.

Светопода́тельную зарю́, во тме́ су́щим, подае́т жизнопода́тельный Кре́ст: невеще́ственный бо прия́т све́т, и к ра́зуму Боже́ственному наставля́ет все́х, возвыша́ет же ны́не возвыша́емый у́м на́ш, во е́же пе́ти сицева́я:

Ра́дуйся, свети́ло, су́щия в тме́ просвеща́ющее; ра́дуйся, звездо́, ми́р озаря́ющая.

Ра́дуйся, звездо́, христоуби́йцев помрача́ющая; ра́дуйся, гро́ме, неве́рныя устраша́ющий.

Ра́дуйся, я́ко просвети́л еси́ правосла́вных собо́ры; ра́дуйся, я́ко опрове́ргл еси́ и́дольския же́ртвища.

Ра́дуйся, его́ же о́браз с небесе́ яви́ся; ра́дуйся, его́ же благода́ть лука́вствия прогоня́ет.

Ра́дуйся, и́же пло́ти зна́менаеши умерщвле́ние; ра́дуйся, и́же страсте́й утоля́еши воста́ние.

Ра́дуйся, на не́м же Христо́с распя́ся; ра́дуйся и́м же ве́сь ми́р спасе́ся.

Ра́дуйся, Дре́во треблаже́нное.

Благода́ть да́ти восхоте́в Христо́с челове́ком, ру́це на Кресте́ распростира́ет, созыва́ет же язы́ки вся́, и да́рует Ца́рство все́м небе́сное, пою́щим пе́снь досто́йно и ве́рно зову́щим: Аллилу́ия.

Пою́ще твою́ пе́снь, хва́лим тя́ усе́рдно, я́ко одушевле́нное Дре́во Госпо́дне: на тебе́ бо пригво́ждся пло́тию, Влады́чествуяй го́рними си́лами, освяти́, просла́ви и научи́ пе́ти тебе́ такова́я:

Ра́дуйся, Кре́сте, мы́сленный мечу́; ра́дуйся, святы́х свято́е зре́ние.

Ра́дуйся, проро́ков и пра́ведных предвеща́ние; ра́дуйся, всесве́тлая Христо́ва побе́до.

Ра́дуйся, держа́во и огражде́ние царе́й благочести́вых; ра́дуйся, украше́ние и ве́нче иере́ев благогове́йных.

Ра́дуйся, и́стины пресве́тлое удобре́ние; ра́дуйся, спасе́ния благополу́чнейшее утвержде́ние.

Ра́дуйся, све́тлое все́х весе́лие; ра́дуйся, сыно́в ага́рянских прогна́ние.

Ра́дуйся, нетле́ннаго Све́та све́щниче; ра́дуйся, души́ моея́ ра́дование.

Ра́дуйся, Дре́во треблаже́нное.

О, всепе́тое Дре́во, носи́вшее все́х святы́х святе́йшее Сло́во! Прие́мши на́ша поклоне́ния, от вся́каго изба́ви злоключе́ния все́х, и ве́чныя изми́ му́ки, тебе́ вопию́щих: Аллилу́ия.

Ангели от небе́с неви́димо окружа́ют Кре́ст живоно́сный со стра́хом, и светопода́тельную благода́ть све́тло подаю́щий ны́не ве́рным зря́ще, ужаса́ются и стоя́т, зову́ще к нему́ такова́я:

Ра́дуйся, Кре́сте, вселе́нныя храни́телю; ра́дуйся, сла́во Це́ркве.

Ра́дуйся, источа́яй незави́стно исцеле́ния; ра́дуйся, просвеща́яй мирски́я концы́.

Ра́дуйся, живото́чное Дре́во и чуде́с сокро́вище; ра́дуйся, требога́тое сложе́ние и благода́тей пода́телю.

Ра́дуйся, я́ко подно́жие еси́ Бо́жие; ра́дуйся, я́ко предлежи́ши в поклоне́ние все́м.

Ра́дуйся, ча́ше испо́лнь сла́дости; ра́дуйся, све́щниче вы́шния све́тлости.

Ра́дуйся, и́м же благослови́тся тва́рь; ра́дуйся, и́м же покланя́емся Творцу́.

Ра́дуйся, Дре́во треблаже́нное.

О, треблаже́нный Кре́сте и всечестны́й, тебе́ покланя́емся, ве́рнии, и велича́ем, ра́дующеся о боже́ственном возвыше́нии твое́м. Но я́ко победи́тельное, и ору́жие непобеди́мое, огради́ и покры́й твое́ю благода́тию зову́щия ти́:

Ра́дуйся, Дре́во треблаже́нное.

Го́споди Иису́се Христе́, Сы́не Бо́га Жива́го, Тво́рче не́ба и#nbsp;земли́, Спаси́телю ми́ра, се́ а́з недосто́йный и#nbsp;па́че все́х гре́шнейший, смире́нно коле́не се́рдца моего́ пред сла́вою вели́чества Твоего́ приклоня́я, воспева́ю и#nbsp;велича́ю безме́рное страда́ние Твое́, и#nbsp;благодаре́ние Тебе́, Царю́ все́х и#nbsp;Бо́гу, приношу́, я́ко благоизво́лил еси́ сни́ти с#nbsp;небе́снаго престо́ла Твоего́ и#nbsp;воплоти́тися от#nbsp;Пречи́стыя Де́вы Мари́и, спасе́ния ра́ди челове́ческаго: безпло́тен сы́й, плотско́е естество́ Божеству́ совокупля́я; бога́т сы́й, во́лею обнища́в, да#nbsp;челове́ка в#nbsp;Ца́рствии Твое́м обогати́ши; труды́ и#nbsp;вся́кия челове́ческия беды́, я́ко челове́к, поне́сл еси́, да#nbsp;все́м во#nbsp;вся́ких печа́лех и#nbsp;ну́ждах посо́бствуеши; четы́редесят дне́й пости́выйся, все́м к#nbsp;воздержа́нию пу́ть показа́л еси́; от#nbsp;лука́вых искуше́н бы́в, все́х от#nbsp;искуше́ний вся́ких избавля́еши. Ве́м, всели́льне Влады́ко, я́ко сия́ Тебе́ непотре́бна бы́ша, но#nbsp;челове́ческаго ра́ди спасе́ния, вся́ претерпе́л еси́. Пре́дан бы́л еси́ за#nbsp;три́десят сре́бреник, да#nbsp;челове́ка иску́пиши от#nbsp;лю́тыя рабо́ты вра́жия. От#nbsp;неми́лостивых иуде́й, [я́ко] незло́бивый Агнец похи́щен бы́л еси́, ро́д челове́ческий от#nbsp;поглоще́ния во́лка мы́сленнаго исторга́яй. На#nbsp;суди́щи предста́л еси́, все́х от#nbsp;осужде́ния огня́ ве́чнаго отводя́й. Свя́зан, пору́ган, оплева́н, от#nbsp;ло́жных свиде́телей оклевета́н, и#nbsp;на#nbsp;поно́сную сме́рть осужде́н, челове́ка от#nbsp;вся́кия напа́сти, муче́ния и#nbsp;от#nbsp;ве́чныя сме́рти свобожда́яй. Пила́ту, нико́его зла́ соде́явый, пре́дан бы́л еси́, и#nbsp;ко#nbsp;Ироду по́слан, и#nbsp;па́ки пору́ган, челове́ка от#nbsp;зла́го обстоя́ния и#nbsp;от#nbsp;поруга́ний вра́жиих избавля́яй. Что́ у́бо возда́м Тебе́, Влады́ко Человеколю́бче, о#nbsp;все́х, я́же претерпе́л еси́, мене́ ра́ди гре́шнаго? Не#nbsp;ве́м. Душа́ бо#nbsp;и#nbsp;те́ло, и#nbsp;вся́ блага́я, от#nbsp;Тебе́ су́ть, и#nbsp;вся́ моя́ Твоя́ су́ть, и а́з Тво́й е́смь. То́чию на#nbsp;безчи́сленное Твое́ милосе́рдие, благоутро́бне Го́споди, наде́яся, пою́ Твое́ неизрече́нное долготерпе́ние, велича́ю неисповеди́мое смотре́ние Твое́, сла́влю Твою́ безме́рную ми́лость, е́юже приклони́лся еси́, мене́ ра́ди осужде́ннаго, да#nbsp;опра́вдан бу́ду. К#nbsp;столпу́, Спа́се, привя́зан и#nbsp;без ми́лости бие́н, ми́лостив сы́й, разреши́ мя, молю́ся, от#nbsp;грехо́в мои́х! Те́рнием венча́н, души́ моея́ грехо́вное те́рние искорени́; тро́стию бие́н по#nbsp;главе́, сокруши́ главу́ зми́я, уязвля́ющаго мя́ жа́лом греха́! В#nbsp;багря́ну ри́зу оболче́н бы́л еси́, и#nbsp;мучи́телем пре́дан, просвети́ ми, Царю́ Пресвяты́й, одея́ние душе́вное, да#nbsp;вни́ду в#nbsp;черто́г Тво́й всекра́сный. С#nbsp;разбо́йниками вмене́ный, и#nbsp;Кре́ст на#nbsp;ра́му Свою́ понесы́й, разбо́йника врага́, и́щущаго ду́шу мою́ уби́ти, Твои́м Кресто́м прожени́. Ве́м Тя́, Иису́се долготерпели́ве, лю́те уя́звленнаго: от#nbsp;верху́ главы́ Твоея́ святы́я, да́же до#nbsp;стопы́ ножны́я, не#nbsp;бе́ в#nbsp;Тебе́ ме́ста це́ла! Что́#nbsp;же возглаго́лю о#nbsp;неизрече́нном человеколю́бии Твое́м, Христе́ Спаси́телю? То́чию в#nbsp;сокруше́нии се́рдца моего́, покланя́яся Твои́м пречи́стым Страсте́м, и#nbsp;вселюбе́зно я́ лобыза́я, вопию́: поми́луй мя́ гре́шнаго! На#nbsp;Кресте́ пригвозди́тися изво́ливый, пригвозди́ за́поведем Твои́м се́рдце мое́. Воздви́жен с#nbsp;Кресто́м на#nbsp;горе́ Голго́фе, воздви́гни мы́сли моя́ к#nbsp;небеси́, да#nbsp;всегда́ го́рняя му́дрствую. Же́лчию с о́цтом напое́н, огорче́нное мое́ грехо́м се́рдце, услади́ любо́вию Твое́ю, и#nbsp;жа́ждуща мя́ напо́й пото́ком сла́дости Твоея́. Ру́це Твои́ пречи́стеи распростры́й на#nbsp;прия́тие все́х, приими́ мя#nbsp;гре́шнаго. Но́зе пригвожде́нны име́вый, хотя́ всегда́ с#nbsp;гре́шники бы́ти, бу́ди со#nbsp;мно́ю гре́шным, возбраня́яй нога́м мои́м от#nbsp;вся́каго пути́ лука́ваго. Се́рдце отве́рзтое име́вый, яви́ благода́ть Твою́ мне́ гре́шному. Главу́ пречи́стую на#nbsp;Кресте́ преклони́вый, услы́ши недосто́йныя моли́твы моя́. О, пречу́дная и#nbsp;неизме́римая глубино́ милосе́рдия, Христе́ Бо́же! За#nbsp;враги́, распина́тели Твоя́, Бо́гу Отцу́ моли́выйся, да́ждь и#nbsp;мне́ гре́шному сию́ благода́ть, е́же люби́ти враги́ моя́, и#nbsp;моли́тися за#nbsp;ни́х. Разбо́йнику ка́ющемуся ра́й отве́рзл еси́, воззри́, Све́те мо́й, на#nbsp;мене́ гре́шнаго, пода́ждь покая́ние, и#nbsp;отве́рзи мне́ две́ри ми́лости Твоея́, и#nbsp;помяни́ мя#nbsp;недосто́йнаго во#nbsp;Ца́рствии Твое́м. Наконе́ц, в#nbsp;ру́це ду́х Тво́й пресвяты́й преда́вый Бо́гу Отцу́, приими́, Созда́телю, ду́х мо́й, в#nbsp;вре́мя кончи́ны моея́. С#nbsp;креста́ сня́т и#nbsp;в#nbsp;гро́бе, я́ко ме́ртв, положе́н бы́л еси́, Спа́се, живы́й в#nbsp;све́те непристу́пнем, возьми́ от#nbsp;мене́ тя́жкое бре́мя грехо́вное и#nbsp;не#nbsp;возгнуша́йся, Человеколю́бче, всели́тися в#nbsp;гро́б се́рдца моего́ недосто́йнаго, на#nbsp;умервщле́ние плотска́го моего́ мудрова́ния. Яко да#nbsp;не#nbsp;ктому́ себе́, бре́нное созда́ние Твое́, но#nbsp;Тебе́, Го́сподеви и#nbsp;Бо́гу моему́ живы́й, Твои́м#nbsp;же, о#nbsp;Всеми́лостиве, благоутро́бием, сподо́блюся ви́дети Тебе́, Созда́теля и#nbsp;Спаси́теля моего́, за#nbsp;прия́тие сме́рти кре́стныя, сла́вою и#nbsp;че́стию венча́ннаго, в#nbsp;све́те непрекоснове́нныя Твоея́ сла́вы, иде́же со#nbsp;безнача́льным Твои́м Отце́м, и#nbsp;с#nbsp;Пресвяты́м, благи́м, животворя́щим и#nbsp;единосу́щным Твои́м Ду́хом ца́рствуеши пре́жде ве́к, и#nbsp;ны́не и#nbsp;при́сно, и#nbsp;во#nbsp;ве́ки веко́в. Ами́нь