Кондак 1
Избранный пастырю Христова стада и сосуде достойный Божия благодати, веры Православныя поборниче, от безбожников даже до смерти пострадавый, песньми велегласно восхваляем тя, светозарный отче наш Владимире, ты же, дерзновение ко Господу имый, на стезю спасения настави нас, благочестною любовию поющих ти:
Радуйся, Владимире, негасимый Православия светильниче.
Икос 1
Ангельскою любовию ко Господу горевый и измлада нрав твой долготерпелив и кроток показавый, миру Православному христианин всесовершен явился еси, исповедниче Христов Владимире. Ныне же Трисвятую песнь на небесех со Ангельскими чинми воспеваяй, недостойных нас услыши, на земли со слезами умиления взывающих:
Радуйся, благочестивых родителей преславное рождение.
Радуйся, благое и богодуховенное тех воспитание.
Радуйся, от юности Христу служити возжелавый.
Радуйся, нелицемерную по Бозе ревность показавый.
Радуйся, благоутробия Христова подражателю.
Радуйся, Евангельскаго слова благовествователю.
Радуйся, блистание Божественнаго света.
Радуйся, сияние небесныя благодати.
Радуйся, души верных просвещаяй.
Радуйся, сердца ищущих правды Божией озаряяй.
Радуйся, человече небесный.
Радуйся, ангеле земный.
Радуйся, Владимире, негасимый Православия светильниче.
Кондак 2
Видя и разумевая во всяцей скорби и напасти ко спасению душ наших наставление, не уны и не отчаяся, святый Владимире, егда лишился еси сына отрока и любезныя твоея супруги. Но терпеливно скорбь сию подъял еси и утешение в монашестве обрел еси, стопы своя ко служению Единому Христу направляяй. Сподоби же и нас во всех бедах Благоподателя святую волю разумети, не противлятися спасительному Промыслу Его, но присно славити за вся Творца и Бога: Аллилуиа.
Икос 2
Разум Всевышний приосени тя, пастырю всехвальный наш Владимире, егда избра тебе Господь во епископа святыя Церкве Православныя, во еже день и нощь пещися ти о агнцех Божиих, да ни един убо от них погибнет. Ты же, яко послушник трудолюбный, пастырское делание смиренномудренно творил еси. Тако и ныне, во обителех небесных пребываяй, наставник неусыпный буди нам, на тя надеющимся и глаголющим из глубины сердечныя:
Радуйся, вся красная и сладкая мира сего презревый.
Радуйся, от тленных на нетленная очи духовныя обративый.
Радуйся, епископство яко великий дар Господень восприявый.
Радуйся, обильно в хиротонии благословение небесное стяжавый.
Радуйся, надежный ко спасению путеводителю.
Радуйся, заблуждших неустанный вразумителю.
Радуйся, мудрых века сего мудрейший.
Радуйся, рабе Христов добрейший.
Радуйся, иерарше славный, со святыми почиваяй.
Радуйся, молитв твоих покровом паству присно соблюдаяй.
Радуйся, неусыпаемый в бедах помощниче.
Радуйся, благий о нас печальниче.
Радуйся, Владимире, негасимый Православия светильниче.
Кондак 3
Силою Всевышняго незримо укрепляемь, истинное мужество явил еси, преблаженне архипастырю Владимире, егда спасаше от глада и от мора твоя страдающая чада. Зрел еси окрест, яко мнози мором гибляху, обаче не смутился еси, но Крестом Животворящим и Честным вооружився, прехождаше посреде людей поволжских, помощь подая, печали утоляя. Такожде и нам, духовным гладом истощеваемым и недугом маловерия одержимым, помози предстательством твоим ко Господу, прославляемому присно: Аллилуиа.
Икос 3
Имеяй выну попечение о чадех Божиих, сих отечески к богоугодней жизни направлял еси, постом, молитвою и праведными делы предивный подвиг в подражание святым Христовым показавый. Сего ради твоя пастырския добродетели хваляще, тя, Боголюбче, ублажаем сице:
Радуйся, благоутробия великаго сокровищ.
Радуйся, Божественнаго промышления о нас приятелище.
Радуйся, Святыя Церкве Православныя украшение.
Радуйся, о чадех твоих теплое моление.
Радуйся, о мире паствы твоея рачителю.
Радуйся, от всяких бед усердный наш хранителю.
Радуйся, покрове, на пути спасения нас осеняяй.
Радуйся, столпе огневидный, во тьме неведения нас просвещаяй.
Радуйся, яко корения смущений трудолюбно исторгал еси.
Радуйся, яко терние неверия глаголом попалял еси.
Радуйся, архиерею Божий, Пастыреначальником Христом прославленный.
Радуйся, иерарше Христов, даров Духа Святаго преисполненный.
Радуйся, Владимире, негасимый Православия светильниче.
Кондак 4
Бурю велию прещений вражиих отврати от нас молитвами твоими, всеусердный Господа служителю Владимире, и буди нам и ограждение необоримое, яко в животе твоем защититель безмездный был еси всем, Царю Небесному поющим: Аллилуиа.
Икос 4
Слыша и видя множество напастей мира сего, сам болезни и тяготы терпя, николиже ближния и други забывал еси, милосердне отче наш Владимире, но отеческими попечении всем помогая, ни едино же прошение нуждающихся презрел еси. Научи и нас друг друга тяготы носити, воспевающия и прославляющия тя сице:
Радуйся, любовию Божественною горяй.
Радуйся, за други своя душу не щадяй.
Радуйся, яко многи скорби и труды подъял еси.
Радуйся, яко вся ради Возлюбльшаго тя претерпел еси.
Радуйся, вдовиц и сирых щедрейший питателю.
Радуйся, гонимых и обидимых предстателю.
Радуйся, скорбящим сострадателю.
Радуйся, просящим милости подателю.
Радуйся, чаше, елей милости Божия к нам содержащая.
Радуйся, горо, тучи гнева Господня от нас отводящая.
Радуйся, и по преставлении твоем с нами пребываеши.
Радуйся, яко в селениих небесных почивая, нас не оставляеши.
Радуйся, Владимире, негасимый Православия светильниче.
Кондак 5
Боготечная звезда явился еси миру и светильник теплый людем православным, архипастырю Владимире, пастыреначальник в триех стольных градех русских бывый, наипаче же во обличении расколов порадевый, во еже нераздран хитон Христов нешвенный сохранити. Таковому о тебе произволению Господню радующеся, воспеваем Ему: Аллилуиа.
Икос 5
Видя тя в селениих небесных, зело радуется святый равноапостольный Владимир, имже возсия нам свет Христовы Истины, зане и ты Божественною волею в богохранимем граде Киеве прославился еси, страдальчествуя за Христа во дни великих испытаний. Тако и мы, блаженне, ликовствуем о тебе:
Радуйся, крестителя Руси достойный соименниче.
Радуйся, того неленостный споспешниче.
Радуйся, в стране Русской боголучно возсиявый.
Радуйся, паству твою духовно удобрявый.
Радуйся, богоугодно на земли поживый.
Радуйся, любовию Божественною страх смертный победивый.
Радуйся, священномучениче, за Христову веру пострадавый.
Радуйся, страдальче, дух твой в руце Господу предавый.
Радуйся, смерть вкусивый, тления не знаяй.
Радуйся, с Печерскими отцы во святых пещерах почиваяй.
Радуйся, обители преславней украшение.
Радуйся, монашествующих в ней утешение.
Радуйся, Владимире, негасимый Православия светильниче.
Кондак 6
Проповедниче усердный слова Божия, Владимире, многомудрыми вещании твоими лжеучения безбожных обличал еси, от прельщений душепагубных Христова чада сохраняя. Темже удостоился еси непрестанных славословий на земли, воспеваяй в Вышних Богу: Аллилуиа.
Икос 6
Возсиял еси в отечестве своем, исповедниче Христов Владимире, яко новое светило на небесней тверди, сиянием подвигов твоих тьму нечестия разгоняяй и мир православный ублажати тя сице подвизаяй:
Радуйся, крепкая вайе древа правоверия.
Радуйся, богоизбранный посрамителю неверия.
Радуйся, Евангельское слово, яко меч духовный, возлюбивый.
Радуйся, от стрел лукаваго щитом веры ся оградивый.
Радуйся, усты многомудрыми Божественныя истины вещаяй.
Радуйся, пред Богом заступление нам крепкое являяй.
Радуйся, свеще, молитвенным огнем за нас горящая.
Радуйся, драгое миро, в храме Божием благоухающее.
Радуйся, даров небесных неоскудное вместилище.
Радуйся, Божественныя мудрости хранилище.
Радуйся, крепкое падающих возведение.
Радуйся, стоящих право утверждение.
Радуйся, Владимире, негасимый Православия светильниче.
Кондак 7
Хотяй прославити тя верою необоримою, даде узрети ти Владыка наш Господь, како безбожницы в обители Печерстей, яко во аде бесы, бесновашася, безстудие творяще и древния святыни оскверняюще. Но сих прещений вражиих не убоявся, богоизбранный отче наш Владимире, Единому Заступнику от всяких зол усердная моления вознесл еси, взывая неослабне Богу: Аллилуиа.
Икос 7
Новый образ милосердия явил еси нам, мучениче и святителю Владимире, егда пред кончиною благословил еси мучители твоя. Таковому твоему незлобию дивящеся и в тебе неизреченну славу Человеколюбца зряще, славословим тя и восхваляем сице:
Радуйся, милосердия небеснаго зерцало.
Радуйся, Христовы Церкве твердое забрало.
Радуйся, прерадостное наше утешение.
Радуйся, лукавым силам устрашение.
Радуйся, молитися за недруги учивый.
Радуйся, и сам мучители твоя простивый.
Радуйся, яко тобою безумнии глумителие посрамляются.
Радуйся, яко тобою сила Божия является.
Радуйся, всечестно почитаемый на земли.
Радуйся, венцем нетленным украшенный на небеси.
Радуйся, яко с преподобными отцы во веки пребываеши.
Радуйся, яко отечество наше купно с теми защищаеши.
Радуйся, Владимире, негасимый Православия светильниче.
Кондак 8
Страннолепен и великоименит, исповедниче Христов Владимире, яко радетель неусыпный о Господнем доме был еси, молитвы и труды твоя на благоустроение храмов направляя. О чиннем же богослужении и доброгласнем пении ревнуя, награду велию у Господа снискал еси, в небесных вертоградех Ангелы пет быти. Мы же, зряще ныне разоренных храмов восстановление и лепоты церковныя поновление, к тебе взываем: помози воздвигнути святыя храмы в душах наших и добродетельми их украсити, с тобою купно воспевающе Благоподателю и Жизнодавцу: Аллилуиа.
Икос 8
Всея земли Русския архипастырю, первый из новомучеников во время лютое гонений на православных христиан пострадавый, зовем тя, благодать стяжавшаго молитися за мир: не премолчи о нас, к священней твоей раце припадающих и во умилении поющих песнь тебе:
Радуйся, крест свой на рамена, Христу последуя, подъявый.
Радуйся, стезю страданий за Него избравый.
Радуйся, мудрейший странниче, иский отечества небеснаго.
Радуйся, угодниче Христов, презревый вся земная.
Радуйся, дому Божию надежный страже и хранителю.
Радуйся, иереев добрый попечителю.
Радуйся, кающихся с Богом примирителю.
Радуйся, Спасителя возлюбльших покровителю.
Радуйся, достойный Ангелов собеседниче.
Радуйся, Апостолом Христовым сопрестольниче.
Радуйся, благоприятную ко Господу молитву возсылаяй.
Радуйся, теплою молитвою твоею державу нашу согреваяй.
Радуйся, Владимире, негасимый Православия светильниче.
Кондак 9
Вси чини Ангельстии и святителей лик удивишася, зряще тя, Владимире, новаго мученика, в пострадавшей и поруганней земли Русской просиявшаго. Мы же ныне прославляюще подвиг твой, ко Господу и Спасу нашему взываем: Аллилуиа.
Икос 9
Ветия богомудрый Церкве Православныя и доблий воин Христов был еси, священномучениче препрославленный Владимире. Имеяй сердце мягко, аки воск, волю же тверду, аки адамант, не клонился еси семо и овамо ни пред властию людскою, ниже пред обстоянии мирскими, и сего ради поношения претерпел еси. Верность Господу Единому хранивый выну, услыши ныне песнь победную сию:
Радуйся, воине Христов непобедимый.
Радуйся, в терпении твердейший адаманте невредимый.
Радуйся, яко неблагомыслящих наветы претерпел еси.
Радуйся, яко от яростных поношения приял еси.
Радуйся, сердец смятенных умирителю.
Радуйся, от озлобления на нас враждующих хранителю.
Радуйся, духовных совершенств высото.
Радуйся, смирения христианскаго глубино.
Радуйся, русских мучеников удобрение.
Радуйся, архиереев православных похваление.
Радуйся, яко от неверия избавляеши.
Радуйся, яко от малодушия исцеляеши.
Радуйся, Владимире, негасимый Православия светильниче.
Кондак 10
Спасительнаго о нас промысла сияние явися нам, егда страдальческую смерть приял еси, священнопроповедниче Владимире, ты бо жертва непорочная и явился еси ходатай за людей православных, отступлением от веры согрешивших. Мы же ныне сокрушенным сердцем со слезами о спасении страны Русския молящеся, к Судии Благоутробному взываем: Аллилуиа.
Икос 10
Стено и ограждение державы нашея, святителю Владимире, радетель неустанный о уставех православных был еси. Сохрани и ныне нас от пагубныя ереси, огради от раздирания Церквей, упаси от соблазнения лжеученьми, да пребудем в лоне Церкве истинныя. Твоего же ради заступления неустанно вопием ти сице:
Радуйся, Православия неблазненный ревнителю.
Радуйся, шатания Церквей искоренителю.
Радуйся, Церковных Таинств благочестный совершителю.
Радуйся, в Небесный Иерусалим путеводителю.
Радуйся, мечу, раскол и ересь посецаяй.
Радуйся, небесный громе, гордых устрашаяй.
Радуйся, Евангельскаго света чудное блистание.
Радуйся, за правду поносимых упование.
Радуйся, Господню волю сотворивый.
Радуйся, Христовы заповеди сохранивый.
Радуйся, яко честную кровь за веру пролиял еси.
Радуйся, яко блаженство неотъемлемое стяжал еси.
Радуйся, Владимире, негасимый Православия светильниче.
Кондак 11
Пение похвальное, еже приносим ти, богоблагодатный пастырю Владимире, несть довольно восхвалити яко подобает тя, благочестное вместилище Святаго Духа, но всехвальных ради добродетелей твоих вопием ти: моли Господа о нас, студными грехми окалявшихся, да низпослет чудеса неизреченныя Своея милости на нас, с тобою вкупе днесь поющих Ему: Аллилуиа.
Икос 11
Светодательная свеща явился еси нам, исповедниче Христов и пастырю святый Владимире, разгоняяй нощь нечестия и освещаяй путь во тьме ходящих. Ныне убо умоляти не престай Христа Спаса и Владыку нашего, да не даст нам уклонитися стези, ко спасению нас, грешных, приводящия, но сподобит нас во Царствии Своем тя со Ангелы святыми воспевати:
Радуйся, несокрушенный щите, защищаяй благочестие.
Радуйся, мечу победный, посецаяй злочестие.
Радуйся, блуждающих в духовном мраце окормителю.
Радуйся, честнейший преподобия хранителю.
Радуйся, светильниче Господень, Церковь озаряяй.
Радуйся, молящихся ти души умиряяй.
Радуйся, яко недугующих исцеляеши.
Радуйся, яко окамененных сердцем оживляеши.
Радуйся, печальниче болящим и безпомощным.
Радуйся, заступниче убогим и обидимым.
Радуйся, яко помраченных просвещаеши.
Радуйся, яко просвещенных утверждаеши.
Радуйся, Владимире, негасимый Православия светильниче.
Кондак 12
Благодать дадеся ти от Бога, отче приснославимый Владимире, во еже быти нерушимым каменем Христовы Церкве. Твоему же образу желающе всем сердцем подражати, умоляем тя, блаженне, непрестанно: заступи, да не прельстят нас чудеса, силою лукаваго творимая, ниже лжепророцы соблазнят. Но во единомыслии и правоверии вся христианы сохрани, прославляющия Бога Истиннаго: Аллилуиа.
Икос 12
Поем праведное житие твое, восхваляем пречестное твое имя, почитаем за Христа страдания твоя, удивляемся духовней твоей крепости, радуемся славному обретению мощей твоих, новомучениче святый Владимире, и любовию, воспоминающе о подвизех твоих, восписуем ти хваления сия:
Радуйся, победоносною светлостию облеченный.
Радуйся, святительскому лику сопричтенный.
Радуйся, споспешниче усердный ада Разрушителя.
Радуйся, последователю верный распятаго Учителя.
Радуйся, за веру и отечество живот свой положивый.
Радуйся, архиерею добрый, Богу Человеколюбцу угодивый.
Радуйся, яко живот твой непорочен сохранивый.
Радуйся, яко до смерти верен Господу пребывый.
Радуйся, венцем победным паче звезд на небеси блистаяй.
Радуйся, тимпане сладкозвучный, славу Божию бряцаяй.
Радуйся, во отечестве небеснем ныне пребываяй.
Радуйся, и о земнем отечестве твоем не забываяй.
Радуйся, Владимире, негасимый Православия светильниче.
Кондак 13
О страдальче многосветлый и святителю Христов Владимире! Приими малое хваление сие, в простоте сердечней возносимое. Вонми гласу недостойному молящихся тебе и твоими скорыми ко Господу прошении умоли Его пробавити благоутробие Свое на ны, да сподобимся в блаженней радости воспевати Ему славу: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангельскою любовию ко Господу горевый и измлада нрав твой долготерпелив и кроток показавый, миру Православному христианин всесовершен явился еси, исповедниче Христов Владимире. Ныне же Трисвятую песнь на небесех со Ангельскими чинми воспеваяй, недостойных нас услыши, на земли со слезами умиления взывающих:
Радуйся, благочестивых родителей преславное рождение.
Радуйся, благое и богодуховенное тех воспитание.
Радуйся, от юности Христу служити возжелавый.
Радуйся, нелицемерную по Бозе ревность показавый.
Радуйся, благоутробия Христова подражателю.
Радуйся, Евангельскаго слова благовествователю.
Радуйся, блистание Божественнаго света.
Радуйся, сияние небесныя благодати.
Радуйся, души верных просвещаяй.
Радуйся, сердца ищущих правды Божией озаряяй.
Радуйся, человече небесный.
Радуйся, ангеле земный.
Радуйся, Владимире, негасимый Православия светильниче.
Кондак 1
Избранный пастырю Христова стада и сосуде достойный Божия благодати, веры Православныя поборниче, от безбожников даже до смерти пострадавый, песньми велегласно восхваляем тя, светозарный отче наш Владимире, ты же, дерзновение ко Господу имый, на стезю спасения настави нас, благочестною любовию поющих ти:
Радуйся, Владимире, негасимый Православия светильниче.
Молитва
О священномучениче и исповедниче Христов Владимире! Услыши слезныя молитвы чад твоих и воздыхания, сердцем сокрушенным и смиренным приносимая. Се бо беззаконии омрачихомся и того ради бедами, яко тучами, обложихомся. Но ты, святе Владимире, понеси, яко сильный, немощи наша, не отлучайся от нас духом, да не разлучимся в конец от любве Божия. Призри милостивно на предстоящия и молящияся пред святою иконою твоею и вся прошения их во благое исполни. Веруем бо, яко твоих страданий ради за отечество и люди российския велие дерзновение ко Господу имаши. Егоже умоли, да укрепит ны в Православии и единомыслии, и непоколебимом даже до смерти исповедании веры Христовы, страну нашу да спасет от междоусобныя брани, пастырем нашим да подаст духовное трезвение и ревность о спасении пасомых, правителем же суд и правду, обидимым заступление, недугующим душ и телес исцеление. Мы же, грешнии, твоим предстательством укрепляеми, восхвалим Господа Иисуса Христа, Емуже слава подобает, честь и поклонение, со Безначальным Его Отцем и Пресвятым Духом, ныне и присно и во веки веков. Аминь.
