Кондак 1
Избранная угоднице и невесто Христова, града Чигирина и всего мира христианскаго похвало и утверждение, преподобная и богоносная мати Рафаило, подвигом добрым подвизившаяся, исповедничеством и мученичеством всепобедным просиявшая, ныне о спасении и благополучии нашем усердно предстательствуеши пред Престолом Троицы Всесвятыя. Мы же в похвалу тебе зовем сице:
Радуйся, святая преподобная мати наша Рафаило, мученице Христова и чудотворице достославная!
Икос 1
Ангелов сонмы на Небесех купно с архистратигами Михаилом и Рафаилом славословят выну Творца миров дольняго и горняго, с ними же купно ликуеши присно, святая богоносная и присноблаженная мати наша Рафаило, к лику жен преподобных и новомученик преславных Господом сопричтенная. Мы же, торжествуя на земли славу твою небесную, вопием ти сице:
Радуйся, с горними чинами Христа присно величающая;
Радуйся, со всеми святыми славу Царя Небеснаго созерцающая;
Радуйся, Церковью Христовою прославляемая и величаемая;
Радуйся, от земнородных с радостию почитаемая;
Радуйся, спасения вечнаго нашего всеблагая путеводительнице;
Радуйся, благополучия земнаго предобрая попечительнице;
Радуйся, блага духовныя нам ниспосылающая;
Радуйся, отраду и утешение верным христианом дарующая;
Радуйся, святая преподобная мати наша Рафаило, мученице Христова и чудотворице достославная!
Кондак 2
Видя Всеблагий и Премудрый Господь чистоту сердца твоего и любы теплую ко всему творению Своему и велие желание жития иноческого благоволи призвати тя на служение Себе и чадом Своим во святую чигирринскую Свято-Троицкую обитель, идеже ты, святая ангелоподобная мати, в посте и молитве неленостно подвизалася еси и жития воистину равноангельского достигла еси, в пострижении же имя милосерднаго архистратига Рафаила прияти сподобилася еси, с ним же ныне моли Христа Спасителя помиловати и благословити всех нас, вопиющих ныне Господеви: Аллилуйя!
Икос 2
Разумом божественным от дней детства твоего просвещаема, всеблаженная невесто Христова, и благодатию Господнею согреваемая и движимая, возлюбила еси паче благ земных Иисуса Сладчайшего, и Ему Единому служити желая, оставила еси мир и имения родителей твоих и в преславную Свято-Троицкую Чигиринскую обитель удалилася еси, идеже обеты вечныя Господеви принесла еси. Сего ради таковыя похвалы приносим ти:
Радуйся, рода именитаго отрасле благородная;
Радуйся, лозо вертограда Христова богатоплодная;
Радуйся, края чигиринского похвало и утверждение;
Радуйся, сословия дворянского преизрядное украшение;
Радуйся, добрая и усердная последовательнице евангельскаго учения;
Радуйся, благочестия предков твоих прехвальная сонаследнице;
Радуйся, от младых ногтей Иисуса Сладчайшего возлюбившая;
Радуйся, во дни юности твоея всю себе Ему Единому посвятившая;
Радуйся, святая преподобная мати наша Рафаило, мученице Христова и чудотворице достославная!
Кондак 3
Силою и благодатию Духа Святаго движимая, хранимая и озаряемая, святая Рафаило, лепоту мира дольнего, сотвореннаго Всеблагим Господем, со умилением созерцала еси, благодарящее Бога за Премудрость Его, явленную во творении, воспевая на земли Царю Небесному пение ангельское: Аллилуйя!
Икос 3
Имуще в душе твоей, пречудная Рафаило, любы ко Господу и творению Его, с радостию в сердце крины полевыя, розы и иные цветы взращала еси в обители Чигиринской, дабы в лепоте сей явити образ славы Божия; такожде и ко иным послушаниям ревность благую явила еси, советом стариц опытных внимая, от силы в силу восходя, да прославится в тебе Иисус Сладчайший, Его же ради усердно подвизалася еси, Его же милосердие приклони и к нам, взывающим ти сице:
Радуйся, кротость и смирение Христово возлюбившая;
Радуйся, отраду небесную еще на земли обретшая;
Радуйся, непреложное упование и всецелое доверие к Богу стяжавшая;
Радуйся, тихую радость и мир непрестанно нам дарующая;
Радуйся, милосердием к себе и ближним сердца наша преображающая;
Радуйся, материнскою любовию твоею всех согревающая;
Радуйся, все прошения наша во благо исполняющая;
Радуйся, творити нелицемерно дела добрыя нас подвизающая;
Радуйся, святая преподобная мати наша Рафаило, мученице Христова и чудотворице достославная!
Кондак 4
Бурю злых напастей, нестроений и искушений верою, кротостию, молитвами горячима твоима и незлобием рассеяла еси, преподобная мати, ибо добродетельми христианскими, аки щитом, от стрел и духов лукавых обороняла еси себя и ближних своих, советом святых отец внимала еси, темже в святости и чистоте прошла еси все житие твое иноческое и мученичество увенчала еси е; ныне же во славе предстоиши Творцу Нашему и молишися, да утвердится любы святая в сердцех христианских. Тем же и нас, грешных, святая Рафаило, сподвигаеши нелицемерне Господеви служити и с сыновьей любовию воспевати Ему: Аллилуйя!
Икос 4
Слышавшее, богомудрая мати Рафаило, об отречении благоверного императора Николая и падении империи российстей, не возроптала еси, но разумея, яко вси путие народов и царств в деснице Всемудраго Бога выну пребывают, в годину тяжкую смут и невзгод На Него Единаго упование твое возложила еси. Тем же просим убо тя, мати святая: настави и ны в молитве, богомыслии и надежде непреложней на Христа, благ всяческих подателя предщедраго, да тебе, добрей попечительнице нашей воззвовем:
Радуйся, благосердие Отца Небеснаго к нам приклоняющая;
Радуйся, Сына Божиего паче всего земнаго любити научающая;
Радуйся, о дарех духовных Всеблагаго Утешителя умоляющая;
Радуйся, о благосостоянии Церкви Христовой присное моление;
Радуйся, от блудныя страсти и винопития исцеляющая;
Радуйся, в деятельной любве и сострадании верных утверждение;
Радуйся, от сна духовнаго теплохладных пробуждение;
Радуйся, омраченных умов и очерствелых сердец просветление и преображение;
Радуйся, святая преподобная мати наша Рафаило, мученице Христова и чудотворице достославная!
Кондак 5
Боготечною звездою просияла, велехвальная мати наша Рафаило, во обители твоея, яко благодатию Спасовою выну укрепляемая и споспешествуемая, от силы в силу восходила еси в меру возраста Христова и воистину носительницею света Его и орудием мира Его явилася еси для всех чад Божиих, окрест тебе сущих. Сице молим тя: настави ны, како подобает всею душею и всем сердцем славословити Божественнаго Искупителя и умиленно пети Ему: Аллилуйя!
Икос 5
Видевше сестры чигиринскаго Свято-Троицкаго монастыря тя, мати Рафаило, одаренною от Господа Духа Святаго даром рассуждения, молитвы доброго совета и премудрости, избраша тя своею начальницею и игумению быти. Ты же, волю Божию, в их решении зряще, мудро руководила еси насельницами в годину испытаний и гонений. Сице молим тя: и нам буди заступницею небесною и наставницею благою, да зовем ти сице:
Радуйся, разумети благую волю Божию о нас научающая;
Радуйся, от суеты сует к благам вечным взоры наша направляющая;
Радуйся, от заблуждений и прельщений духовных чтущих тя оберегающая;
Радуйся, в ношении тягот друг друга нам всем помогающая;
Радуйся, инокинем вспоможение и укрепление посылающая;
Радуйся, мирян в благочестии и молитвенном делании утверждающая;
Радуйся добрых друзей и помощников верных христианом посылающая;
Радуйся, водителем колесниц путь добрый пречудно устрояющая;
Радуйся, святая преподобная мати наша Рафаило, мученице Христова и чудотворице достославная!
Кондак 6
Проповеднице и ревнительнице любви деятельныя и самоотречения ближнего ради в годину смут и испытаний воистину явилася еси, богомудрая Рафаило, егда во обители твоея с сестры купно прияла еси сирот, от коих бо досаждения и укоризны претерпела еси, об обращении же их ко Иисусу Христу, Источнику и смыслу бытия человеческаго, молитвы вознося. Мы молим тя ныне: преобрази нас и наполни духом любви жертвенныя, да сподобимся с тобою купно Милоседному Господу во веки воспевати: Аллилуйя!
Икос 6
Возвияла еси премудростию и милосердием твоим всечестная Рафаило, егда узревши окрест тебе в годину испытаний военных, смут и нестроений общественных велие множество людей страждущих, многим убо милость сотворила еси, утешение и ободрение даровала еси; и сестрам обители твоея была еси наставницею благою. Мы веруя, яко ты ныне во славе неизреченной пребываеши, милосердием твоим не оскудела еси к нам, славословим тя сице:
Радуйся, от многообразных недуг страждущих свобождение;
Радуйся, поврежденныя руце и нози токами жизни наполнение;
Радуйся, зубныя и головныя боли пречудное утоление;
Радуйся, разнородных травм и ран телесных исцеление;
Радуйся, плоть, огнем опаленную, преславно обновляющая;
Радуйся, души, от недуг греховных томимых, врачующая;
Радуйся, во тьме неверия блуждающих благодатная вразумительнице;
Радуйся, скорбящих и обременных премилостивая утешительнице;
Радуйся, святая преподобная мати наша Рафаило, мученице Христова и чудотворице достославная!
Кондак 7
Хотяще верною Господеви быти и выну с Ним токмо пребывати, разумела еси, велехвальная Рафаило, яко ничто не возможе разлучити тя от любве Его: ни глад, ни изгнание, ни чести гражданския лишение, ни утеснения от властей богоборных, ни сами страдания и муки лютейшия. Ты бо все сие претерпела еси, в глубине сердца твоего воспевая Жениху Небесному ангельское пение: Аллилуйя!
Икос 7
Новое и тяжкое испытание с верою в безсмертие души и отраду, иже получают за Христа пострадавшия, претерпела еси, богомудрая мати Рафаило, егда приидоша в дом твой богоборцы нечестивыя и бесоводимыя, и взяши тя, от сестер отлучиша, и страшным мукам предаша, ты бо за Христа опаление и иссечение тела твоего и иных мук множество прияла и претерпела еси. Сия убо ныне поминающее, величаем верность твою Господеви и велию веру твою, адаманту подобную, ибо веровала еси, яко за Христа и со Христом пострадавши, воскреснут с Ним для жизни вечныя. Сего ради величаем тя сице:
Радуйся, древним страстотерпцем равночестная и новым мученикам равнославная;
Радуйся, за безбоязненное веры исповедание от богоборец пострадавшая;
Радуйся, за Бога, в Троице Святей славимаго, муки лютыя приявшая;
Радуйся, опаление огнем, надругание и тела иссечение кротце претерпевшая;
Радуйся, биения, заушения, истязания лютыя приявшая;
Радуйся, в мучениях жестоких долготерпение и упование на Христа сохраньшая;
Радуйся, ангелами святыми на небо вознесенная;
Радуйся, святыми мучениками радостно сретанная;
Радуйся, святая преподобная мати наша Рафаило, мученице Христова и чудотворице достославная!
Кондак 8
Странствие земное в муках за Христа завершила еси, святая мати Рафило, и обитель себе в чертозех Отца Небеснаго сотворила еси, прияла от Господа велию благодать чудотворения, всем с верою к тебе притекающим дары благодатная всещедро подаеши от мощей твоих святых, и недужных безвозмездно врачуеши единем прикосновением к честному твоему гробу. Сего ради славим прославльшего Тя Господа и благодарно вопием Ему: Аллилуиа!
Икос 8
Всем любящим тя и святую память твою праведно чтущим отраду и утешение милостивно подаеши, благая заступнице и утешительнице наша; сего ради мы, заботами и печальми обремененныя, к твоему предстательству за ны пред Триипостасным и Всеблагим Господем Нашим усердно прибегаем и с надеждою приносим тебе, святая мати наша Рафаило, от благодарных сердец наших похвалы сия:
Радуйся, яко чтущих тя не оставляеши;
Радуйся, яко любящих тя присно радуеши;
Радуйся, благим намерениям нашим быстро способствующая;
Радуйся, от всякаго вреда и скорби нас избавляющая;
Радуйся, добрый кров и пристанище обрести помогающая;
Радуйся, труд земледельцев с небес благословляющая;
Радуйся, нивы и поля обилием плодов наполняющая;
Радуйся, благами земныма страждущих насыщати научающая;
Радуйся, святая преподобная мати наша Рафаило, мученице Христова и чудотворице достославная!
Кондак 9
Всякия болезни, скорби и мученическую кончину в предместиех Чигиринстиих кротко претерпела еси, мати Рафаило, яко жертву принесши житие твое Христу Богу, Спасителю нашему, и ныне, с Невещественными в вышних предстоящи Престолу Троицы Пресвятыя, молишися о нас, вопиющи Богу: Аллилуйя!
Икос 9
Вития многовещанныя и риторы преискусныя восхвалити тя по достоянию не возмогут, о святая преподобномученице и чудотворице Рафаило, ибо кто в силех есть воспети достойно и справедливо благочестивое житие твое в миру, кто воздаст славу преподобничеству, богомудрию и исповедничеству твоему, мати пречудная, кто восхвалит велия муки душевныя и страдания лютыя, яже за Христа претерпела еси? Кто славословие сложит по достоянию чудесем и помощи твоей благодатней? Мы же, веруя, яко ты еси милостива к нам, со смирением и надеждою приносим ти похвалы сия:
Радуйся, злочестивых богоборцев и рая земнаго поборников богомудрая обличительнице;
Радуйся, богопротивнаго нечестия и обычаев душетленных неутомимая искоренительнице;
Радуйся, добрых нравов и благочестия преславная насадительница;
Радуйся, истиннаго богопознания и благаго трезвления всехвальная возвестительнице;
Радуйся, яко тобою от страстей телесных скоро избавляемся;
Радуйся, яко тобою отрады и сладости духовныя исполняемся;
Радуйся, заре благодатная, мрак скорбей людских разгоняющая;
Радуйся, светило богоявленное, тьму безбожия и зловерия просвещающее;
Радуйся, святая преподобная мати наша Рафаило, мученице Христова и чудотворице достославная!
Кондак 10
Спасения нашего и ныне буди наставницею и ходатаицею благодатною, богоносная мати Рафаило, яко предстательством твоим страсти душетленныя попираются, добродетели же богоугодныя вкореняются в душах наших; сего ради просим тя: сподоби ны в вере, надежде и любви укрепитися и возрасти, Господеви же благия плоды покаяния принести и тщатися о чистоте плоти и духа, в чаянии спасения воспевати Богу: Аллилуйя!
Икос 10
Стена еси необоримая всем христианом, к скорому твоему заступлению и предстательству притекающим, всепобедная страстотерпице Рафаило! Ты бо многажды самая прошения наша исполнением пречудно предваряеши и преславная чудеса творити нам не престаеши; ибо дадеся ти велия благодать от Подвигоположника Иисуса Христа, сугубо величающего мученики Своя: болезни исцеляти, во обстояниих скорбных помогати всем, требующим и просящим помощи твоея и с надеждою на исцеление духовное взывающим ти сице:
Радуйся, страх пред неизвестностию в душах наших разрушающая;
Радуйся, доверием ко Иисусу Сладчайшему сердца наша наполняющая;
Радуйся, любити всех любовию Христовою ны научающая;
Радуйся, плевелы ненависти и злобы в нас испепеляющая;
Радуйся, прощати и благословляти обидящих ны сподвигающая;
Радуйся, злыя сердца в добрыя преславно преображающая;
Радуйся, благия плоды надежды взращати нам помогающая;
Радуйся, великое и неизреченное милосердие Божие к нам выну приклоняющая;
Радуйся, святая преподобная мати наша Рафаило, мученице Христова и чудотворице достославная!
Кондак 11
Пение похвальное во умилении сердец наших приносим ти, благодарне сущи, о добрая попечительнице и заступнице наша, яко тобою от сумрака скорбей удаляемся, яко тобою николиже гладны не пребываем, а такожде недостатка в хлебе насущнем не имамы, яко тобою кров и работу обретаем и вся потребная к житию земному и благополучию нашему; и с тобою купно воспеваем Всемилосердному Господу, Подателю всех благ: Аллилуйя!
Икос 11
Свет нетварный купно со ангелы и архангелы созерцаеши ныне, богоблаженная мати наша Рафаило, яко великия чести предстояти пред Троном Троицы Всесвятыя сподобилася еси, и нас грешных, на земли величающих благую память твою не забываеши в молитвах твоих, чудотворице святая, и вся полезная к житию земному и спасению милостивно посылаеши нам, с любовию и радостию взывающим ти сице:
Радуйся, в пути и странствии сущим благодатное вспоможение;
Радуйся, по воздуху плавающим преславное пути завершение;
Радуйся, паломников стяжати благословение Христово научающая;
Радуйся, всех нас от суеты и треволнений житейских свобождающая;
Радуйся, земныя долженствования наша честно исправляти помогающая;
Радуйся, вси дорози жизни нашей к Иерусалиму Небесному направляющая;
Радуйся, милость Всенепорочныя Матери Божия нам приклоняющая;
Радуйся, кающихся грешников со Христом выну примиряющая;
Радуйся, святая преподобная мати наша Рафаило, мученице Христова и чудотворице достославная!
Кондак 12
Благодати животворящия причастна явися священная рака, содержащая многоцелебныя мощи твоя, чудотворице прехвальная, яко ты неоскудно исцеления источаеши и всяк недуг врачуеши силою Бога, дивнаго во святых мученицех и исповедницех Своих, дивно прославляющаго тя, святая Рафаило, на Небесех и на земли; Ему же и мы о тебе с благодарностию и радостию сердечной о тебе воспеваем: Аллилуйя!
Икос 12
Поюще житие преславное твое и добропобедныя страдания твоя, святая мати наша и чудотворице Рафаило, величаем велию ревность и любы твоя, яже ко Господу и Спасителю нашему, торжествуем небесную славу твою, яко ты в сонме жен преподобных и мучениц велехвальных днесь предстоиши пред Престолом Агнца Божия, славословим предстательство за ны пред Всемогущим и Милосердным Творцом нашим и с надеждою паки взываем ти сице:
Радуйся, отроков и юношей в целомудрии и добронравии сохраняти себе научающия;
Радуйся, девиц в кротости, чистоте и благости утверждатися помогающая;
Радуйся, мати святая, сердца чад ко родителем возвращающая;
Радуйся, отцев и матерей истинней любви к чадом наставляющая;
Радуйся, супругом любы и согласие дарующая;
Радуйся, раздоры семейныя на мир благий пременяющая;
Радуйся, старцем и старицем силы и радость, пред закатом жития их дарующая;
Радуйся, прикровенно радости небесней еще на земли сподобляющая;
Радуйся, святая преподобная мати наша Рафаило, мученице Христова и чудотворице достославная!
Кондак 13
О святая агнице Христова, преславная мати Рафаило, преподобномученице и чудотворице, заступнице и покровительнице наша многомилостивая! Нынешнее приносимое тебе от сердец наших моление приимше, и всеблагомощным ходатайством твоим у Всесвятыя и Нераздельныя Троицы сохрани ны враг видимых и невидимых, от всяких бед, болезней и скорбей и испроси всем, призывающим тя, прочее время живота нашего в мире, благополучии и истиннем покаянии скончати, да сподобимся купно с тобою во веки Господеви воспевати: Аллилуйя!
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангелов сонмы на Небесех купно с архистратигами Михаилом и Рафаилом славословят выну Творца миров дольняго и горняго, с ними же купно ликуеши присно, святая богоносная и присноблаженная мати наша Рафаило, к лику жен преподобных и новомученик преславных Господом сопричтенная. Мы же, торжествуя на земли славу твою небесную, вопием ти сице:
Радуйся, с горними чинами Христа присно величающая;
Радуйся, со всеми святыми славу Царя Небеснаго созерцающая;
Радуйся, Церковью Христовою прославляемая и величаемая;
Радуйся, от земнородных с радостию почитаемая;
Радуйся, спасения вечнаго нашего всеблагая путеводительнице;
Радуйся, благополучия земнаго предобрая попечительнице;
Радуйся, блага духовныя нам ниспосылающая;
Радуйся, отраду и утешение верным христианом дарующая;
Радуйся, святая преподобная мати наша Рафаило, мученице Христова и чудотворице достославная!
Кондак 1
Избранная угоднице и невесто Христова, града Чигирина и всего мира христианскаго похвало и утверждение, преподобная и богоносная мати Рафаило, подвигом добрым подвизившаяся, исповедничеством и мученичеством всепобедным просиявшая, ныне о спасении и благополучии нашем усердно предстательствуеши пред Престолом Троицы Всесвятыя. Мы же в похвалу тебе зовем сице:
Радуйся, святая преподобная мати наша Рафаило, мученице Христова и чудотворице достославная!
