Конда́к 1
Избра́нней от всех родо́в Присноде́ве Богоро́дице, по пресла́внем Благовеще́нии в Го́рнюю страну со тща́нием восте́кшей, похва́льная пе́ния ве́рнии прино́сим. Ты же, Влады́чице, я́ко Таи́нница су́щи Предве́чнаго Сове́та и вмести́лище всех Царя́, Христа́ и Бо́га, трисо́лнечным све́том озари́ пою́щия Ти: Ра́дуйся, Обра́дованная, в го́рняя умы́ и сердца́ на́ша возводя́щая.
И́кос 1
Арха́нгельский глас вопие́м Ти, Чи́стая: «Ра́дуйся, Благода́тная, Госпо́дь с Тобо́ю! Благослове́нна Ты в жена́х, и благослове́н Плод чре́ва Твоего́!», в сре́тение же Тебе́ у́мно исходя́ще, со свято́ю и пра́ведною Елисаве́тою зове́м: «Отку́ду нам сие́, да прии́де к нам Ма́ти Го́сподня?», и та́йне Боже́ственнаго Воплоще́ния дивя́щеся, воспису́ем Ти похва́льная:
Рáдуйся, Отрокови́це Богоневе́стная;
рáдуйся, Мáти Сло́ва Неискусобрáчная.
Рáдуйся, Дýхом Святы́м осенéнная;
рáдуйся, Трóицы оби́тель свящéнная.
Рáдуйся, áнгельских умóв удивлéние;
рáдуйся, человéческаго рóда украшéние.
Радуйся, гóрняя с дóльними совокупи́вшая;
рáдуйся, вратá рáйская земноро́дным отвéрзшая.
Радуйся, Прему́дрости Бо́жия прия́телище;
радуйся, Жи́зни присносу́щныя сокро́вище.
Рáдуйся, дрéвния кля́твы разрешéние;
рáдуйся, прароди́телей избавлéние.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 2
Ви́дев пра́ведный Заха́рия А́нгела Госпо́дня, стоя́ща одесну́ю олтаря́, смути́ся, А́нгел же рече́ ему́: «Не бо́йся, Заха́рие, зане́ услы́шана бы́сть моли́тва твоя́, и жена́ твоя́ Елисаве́т роди́т сы́на тебе́, и нарече́ши и́мя ему́ Иоа́нн, той бу́дет ве́лий пред Го́сподем, и Ду́ха Свята́го испо́лнится еще́ из чре́ва ма́тере своея́!» Заха́рия же вопроси́: «По чесому́ разуме́ю сие́?» И отвеща́в А́нгел рече́ ему́: «Поне́же не ве́ровал еси́, се бу́деши молча́ и не моги́й проглаго́лати, егда́ же сбу́дутся сия́, возопи́ти и́маши благи́х пода́телю Бо́гу: Аллилу́иа!»
И́кос 2
Ра́зум Боже́ственных слове́с разу́мен Захарии яви́ся, егда́ Елисавет зача́т отроча́ в ста́рости свое́й, я́коже иногда́ пра́веднии Иоаки́м и А́нна непло́дства разреши́вшеся, роди́ша пронарече́нную Богоро́дицу Мари́ю, чистоты́ плод и целому́дрия, Ея́же прише́ствие в дом Заха́риин и сре́тение со Елисаве́тою ны́не сла́вяще, воспое́м си́це:
Ра́дуйся, сла́дкое Ча́до роди́телей непло́дных;
ра́дуйся, Пло́де Богодарова́нный.
Ра́дуйся, цве́те неувя́даемый;
ра́дуйся, сте́бле Богонасажде́нный.
Ра́дуйся, непло́дства разреше́ние;
ра́дуйся, благоча́дия пода́ние.
Ра́дуйся, Ея́же ра́ди о́тчее поноше́ние отъя́ся;
ра́дуйся, Ея́же ра́ди си́ла ложесна́м ма́терним дарова́ся.
Ра́дуйся, о́трасле свята́я от ко́рене Иессе́ова;
ра́дуйся, дщи Авраа́мова и Дави́дова.
Ра́дуйся, рождество́м Твои́м ра́дость ми́ру яви́вшая;
ра́дуйся, явле́нием Твои́м Богоявле́ние предвозвести́вшая.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 3
Си́лою Вы́шняго осене́нная Богоизбра́нная Отрокови́ца ны́не ше́ствие твори́т в Го́рнюю страну́, мы же сие́ серде́чными очесы́ ви́дяще, ино́е пресла́вное восхожде́ние на па́мять приво́дим, я́коже иногда́ Мари́я триле́тствующая пра́ведными Свои́ми роди́тели во хра́м приведе́на бы́сть, и я́ко о́блак от земли́ к небеси́, со тща́нием ко святи́лищу по степе́нем ле́гце взо́шла есть, свещено́сицам де́вам псалмы́ и пе́сни возглаша́ющим и пою́щим благи́х пода́телю Бо́гу: Аллилу́иа.
И́кос 3
Име́яше храм зако́нный, я́коже и́нде глаго́лется: заве́су, свети́льник, трапе́зу и предложе́ние хле́бов, по вторе́й же заве́се — ски́ния, глаго́лемая Свята́я Святы́х, зла́ту иму́щи кади́льницу, и Ковче́г Заве́та, в не́мже ста́мна злата́, иму́щая ма́нну, и жезл Ааро́нов прозя́бший, и скрижа́ли Заве́та. Вся же сия́ о́браз бя́ху бу́дущих та́ин, я́же на Тебе́ пресла́вно, Де́во, имя́ху соверши́тися, сего́ ра́ди зове́м Ти:
Ра́дуйся, хра́ме Святы́я Сла́вы Безсме́ртнаго Отца́ Небе́снаго;
ра́дуйся, ски́ние одушевле́нная Сы́на Бо́жия Единоро́днаго.
Ра́дуйся, заве́су пло́ти Предве́чному Сло́ву истка́вшая;
ра́дуйся, де́вство и рождество́ сочета́вшая.
Ра́дуйся, Свята́я Святы́х бо́льшая;
ра́дуйся, Хле́ба Живо́тнаго трапе́зо Пресвята́я.
Ра́дуйся, благоуха́нная злата́я Кади́льнице;
ра́дуйся, Ковче́же позлаще́нный Ду́хом.
Ра́дуйся, Ста́мно манноприе́мная;
ра́дуйся, Две́ре заключе́нная.
Ра́дуйся, Скрижа́ле Богопи́санная;
ра́дуйся, Же́зле прозя́бший.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 4
Бу́рю вну́трь име́я помышле́ний сумни́тельных, пра́ведный Заха́рия смяте́ся, ви́дев мла́ду отрокови́цу, ники́мже держи́му, по степе́нем хра́ма восходя́щую, оба́че Ду́хом позна́в Богоизбра́нную Мари́ю, я́ко архиере́й Божий во вну́треннейшее заве́сы, во Свята́я Святы́х предста́ви, ужаса́яся и поя́ Богу: Аллилу́иа.
И́кос 4
«Слы́ши, Дщи, и ви́ждь, и приклони́ у́хо Твое́, и забу́ди лю́ди Твоя́ и дом отца́ Твоего́, и возжела́ет Царь добро́ты Твоея́, и поклони́шися Ему́!» — глаго́ла святы́й проро́к во псалме́х, предъявля́юще пресла́вное т́аинство, е́же на Тебе́, Чи́стая Дево, имя́ше соверши́тися. Ны́не же сбытие́ слове́с сих ви́дяще, во град Иу́дов мы́сленно вслед Тебе́ гряду́щии, в весе́лии и ра́довании пое́м:
Ра́дуйся, Отрокови́це богоизбра́нная;
ра́дуйся, Чадо, благода́ти испо́лненное.
Ра́дуйся, всех дще́рей земны́х превосходя́щая;
ра́дуйся, и са́мых Небе́с вы́ше явльшаяся.
Ра́дуйся, по степе́нем хра́ма ле́гце возше́дшая;
ра́дуйся, во Свята́я Святы́х ра́достно вступи́вшая.
Ра́дуйся, луче́, во мра́це ми́ра сего́ возсия́вшая;
ра́дуйся, заре́, прише́ствие Госпо́дне предвозвести́вшая.
Ра́дуйся, благоволе́ния Бо́жия предображе́ние;
ра́дуйся, челове́ков спасе́ния пропове́дание.
Ра́дуйся, госпо́дствию тезоиме́нно нарече́нная;
ра́дуйся, Де́во Всесвяще́нная.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 5
Богоизбра́нная Отрокови́ца во святи́лищи пребыва́ше, я́коже го́рлица, псало́мски хра́мину обре́тши во дво́рех Госпо́дних, день и нощь в ра́зуме Боже́ственных слове́с поуча́ющися и от А́нгела пи́щу Небе́сную та́йно прие́млющи, ны́не же в дом Заха́риин и́дет, во чре́ве Свое́м Бо́га Сло́ва па́че естества́ нося́щи, непреста́нно моля́щися и пою́щи Бо́гу: Аллилу́иа.
И́кос 5
Ви́деша Тя дре́вле, Де́во, во о́бразех и се́нех Бож́ественнии проро́цы, те́мже прореко́ша Тя бы́ти Ста́мну и Жезл, и Скрижа́ль и Несеко́мую го́ру. Мы же, сбытие́ слове́с сих ви́дяще, Пречи́стая, и Всесвято́е вмести́лище Сла́вы Бо́жия Тя разумева́юще, ум и се́рдце на́ша в го́рняя возво́дим и вопие́м:
Ра́дуйся, ле́ствице, Иа́ковом предви́денная;
ра́дуйся, врата́, Иезекии́лем предзри́мая.
Ра́дуйся, вертогра́де, Псалмопе́вцем проявле́нный;
ра́дуйся, о́блаче ле́гкий, Иса́ием предъявле́нный.
Ра́дуйся, звездо́, Валаа́мом пророкова́нная;
ра́дуйся, горо́, Дании́лом предвозвеще́нная.
Ра́дуйся, о́дре Царя́ Вели́каго, веща́нный Соломо́ном;
ра́дуйся, руно́ ороше́нное, образова́нное Гедео́ном.
Ра́дуйся, земле́ ненасе́янная;
ра́дуйся, купино́ неопали́мая.
Ра́дуйся, не́бо одушевле́нное;
ра́дуйся, сла́дкий Раю́.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 6
Посла́нник Бо́жий и благове́стник предве́чныя та́йны, Арха́нгел Гаврии́л пе́рвее разреше́ние Елисаве́тина непло́дства и рождество́ Предте́чево Заха́рии предвозвести́, в шесты́й же ме́сяц по́слан бы́сть в Назаре́т благовести́ти Де́ве зача́тие, и глаго́ла Ей: «Ра́дуйся, Мариа́м, благослове́нна Ты в жена́х, и благослове́н Плод чре́ва Твоего́!». Она́ же, прии́мши целова́ние, дивя́щися возопи́ Бо́гу: Аллилу́иа.
И́кос 6
Возсия́ И́стина от земли́, и Пра́вда с Небесе́ прини́че в Благове́щении Твое́м, Всесвята́я. Ты бо слы́шавши Арха́нгеловы глаго́лы, пе́рвее смути́ся и «Ка́ко бу́дет сие́?» — рече́, оба́че Боже́ственному смотре́нию повину́ющися, возгласи́: «Се раба́ Господня, бу́ди Ми по глаго́лу твоему́!» Уве́девши же, я́ко Елисаве́т, ю́жика твоя́, зача́т отроча́ в ста́рости свое́й, и́де в Го́рняя со тща́нием ви́дети ю́ и целова́ти, сего́ ра́ди вопие́м Ти:
Ра́дуйся, прекра́сная Сло́ва пала́то;
ра́дуйся, черто́же Небе́снаго Царя́.
Ра́дуйся, послуша́нием преслуша́ние Е́вы исцели́вшая;
ра́дуйся, смире́нием Твои́м плач Ада́мов утоли́вшая.
Ра́дуйся, колесни́це пресвята́я Су́щаго на Херуви́мех;
ра́дуйся, селе́ние пресла́вное Су́щаго на Серафи́мех.
Ра́дуйся, А́гнице, во чре́ве поне́сшая Боже́ственного А́гнца;
ра́дуйся, сви́тче, в Не́мже пе́рстом Бо́жиим написа́ся Сло́во.
Ра́дуйся, сла́вою небе́сных превозше́дшая;
ра́дуйся, заступле́нием земны́х возвесели́вшая.
Ра́дуйся, Свеще́ разу́мная;
ра́дуйся, Ма́ти Све́та.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 7
Хотя́ челове́ком спасе́ние дарова́ти, Госпо́дь с небесе́ на зе́млю призре́, и Еди́ну от всех родо́в Де́ву избра́ во оби́тель Себе́. Те́мже Предве́чное Сло́во, я́ко до́ждь на руно́ и я́ко ка́пля, ка́плющая на зе́млю, сни́де во утро́бу Твою́, Пречи́стая, Ему́же зове́м: Аллилу́иа.
И́кос 7
Но́вое чу́до и Боголе́пное, деви́ческую бо две́рь затворе́нную прохо́дит Госпо́дь: та́йно в ложесна́х Твои́х, Благода́тная, Сло́во Ипоста́сное в плоть и кровь облека́ется и зрак раба́ я́ве прие́млет во спасе́ние челове́ков, те́мже Тя вси ро́ди, я́ко Богоневе́стную Ма́терь, си́це велича́ют:
Ра́дуйся, Де́во предызбра́нная;
ра́дуйся, Ма́ти преблагослове́нная.
Ра́дуйся, всех земноро́дных превы́шшая;
ра́дуйся, чистото́ю А́нгелы превозше́дшая.
Ра́дуйся, звездо́, явля́ющая Со́лнце;
ра́дуйся, свети́ло незаходи́маго Све́та.
Ра́дуйся, Ца́рства го́рняго украше́ние;
ра́дуйся, ми́ра до́льняго утеше́ние.
Ра́дуйся, чи́стая голуби́це;
ра́дуйся, нетле́нная А́гнице.
Ра́дуйся, неискусобра́чная Неве́сто;
ра́дуйся, возрасти́вшая нам клас Живота́.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 8
Стра́нная и пресла́вная слы́шана бы́ша во гра́де Иу́дове, егда́ Елисаве́т, жена́ Заха́риина, в ста́рости заче́нши, непра́здна обре́теся, оба́че тая́шеся ме́сяц пять, глаго́лющи: «Я́ко та́ко сотвори́ мне Госпо́дь, внегда́ восхоте́ отъя́ти поноше́ние мое́ в челове́цех», — и в весе́лии возопи́ Бо́гу: Аллилу́иа.
И́кос 8
Вы́шняя чинонача́лия а́нгельская удиви́шася пресла́вному Бо́жию схожде́нию, я́ко Вы́шний во́лею сни́де да́же и до пло́ти, от деви́ческаго чре́ва быв челове́к, Елисаве́тино же рождество́ чу́до чудесе́ изве́ствоваше, от зде бо нача́т Предте́ча Христу́ предпосыла́тися, сего́ ра́ди вопие́м Преблагослове́нней:
Ра́дуйся, Предве́чное Сло́во пло́тию восприе́мшая;
ра́дуйся, Нача́льника ми́ра во утро́бе поне́сшая.
Ра́дуйся, присноживы́й исто́чниче нетле́ния;
ра́дуйся, та́йно Боже́ственнаго Воплоще́ния.
Ра́дуйся, неора́нная ни́во, Бо́гом возде́ланная;
ра́дуйся, ту́чная браздо́, Ду́хом усыре́нная.
Ра́дуйся, розго́, грозд кра́сный израсти́вшая;
ра́дуйся, лозо́, жи́зни вино́ источи́вшая.
Ра́дуйся, кри́не благоуха́нный;
ра́дуйся, ши́пок свяще́ннейший.
Ра́дуйся, А́нгелов сла́досте;
ра́дуйся, челове́ков ра́досте.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 9
Всяк земноро́дный да взыгра́ется, Ду́хом просвеща́емь, зря Неискусобра́чную Де́ву, Христа́, Со́лнце Правды чревонося́щую, и я́ко о́блак ле́гкий, во град Иу́дов со тща́нием восходя́щую, за́рею благода́ти умы́ и сердца́ озаря́ющую пою́щих Бо́гу: Аллилу́иа.
И́кос 9
Недоуме́ет всяк язы́к изрещи́, ка́ко Христо́в Предте́ча Мари́ино целова́ние а́бие позна́, Елисаве́т же, испо́лнившися Ду́ха Свя́та, ве́лиим гла́сом возопи́: «Благослове́нна Ты в жена́х, и благослове́н Плод чре́ва Твоего́! И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м!» С не́ю же вопие́м Ти:
Ра́дуйся, Де́во Препросла́вленная;
ра́дуйся, в жена́х Преблагослове́нная.
Ра́дуйся, вмести́лище Божества́ всего́;
ра́дуйся, я́ко благослове́н Плод чре́ва Твоего́.
Ра́дуйся, прия́телище Нестерпи́маго;
ра́дуйся, село́ Невмести́маго.
Ра́дуйся, мы́сленый Сио́не святы́й;
ра́дуйся, Ски́ние одушевле́нная.
Ра́дуйся, небе́с простра́ннейшая;
ра́дуйся, я́ко но́сиши Нося́щаго вся́.
Ра́дуйся, Богоблагода́тная;
ра́дуйся, Ма́ти Госпо́дня.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 10
Спасе́ния на́шего провозве́стник и покая́ния пропове́дник Иоа́нн Предте́ча во утро́бе ма́терней взыгра́нием Христо́во прише́ствие извести́, я́ко и само́й Елисаве́ти взыва́ти к Преблагослове́нней: «Ты Царя́ но́сиши, и аз во́ина, Ты Законода́вца, аз же законоисполни́теля, те́мже благода́рственно пою́ Бо́гу моему́: Аллилу́иа!»
И́кос 10
Стена́ еси́ де́вам, Богоро́дице Де́во, и ма́терем отра́до, Ты бо па́че естества́ младонося́щи, в Го́рняя со тща́нием востекла́ еси́, во е́же целова́ти ю́жику твою́ Елисаве́т, и ви́дети е́же на ней пресла́вное чу́до и слы́шание. Пребы́вши же с не́ю я́ко три ме́сяцы, в дом свой возврати́ся, А́нгелом дивя́щимся е́же на Тебе́ стра́шному та́инству и пою́щим Ти такова́я:
Ра́дуйся, де́вства сосу́де избра́нный;
ра́дуйся, чистоты́ нача́ток непоро́чный.
Ра́дуйся, воскресе́ния о́браз облиста́ющая;
ра́дуйся, а́нгельское житие́ явля́ющая.
Ра́дуйся, черто́же безсе́меннаго уневе́щения;
ра́дуйся, ве́рных Го́сподеви сочета́вшая.
Ра́дуйся, Боговмести́мый киво́те;
ра́дуйся, мирополо́жнице, небе́снаго ми́ра испо́лненная.
Ра́дуйся, ри́зы све́тлыми оде́янная;
ра́дуйся, ря́сны златы́ми испещре́нная.
Ра́дуйся, сла́во Небе́сных;
ра́дуйся, упова́ние земны́х.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 11
Песнь пресла́вную Творцу́ и Бо́гу воспе́ла еси́, Всесвята́я Де́во, во гра́де Иу́дове, глаго́лющи: «Вели́чит душа́ Моя́ Го́спода, и возра́довася дух Мой о Бо́зе Спа́се Мое́м!» — я́же и до ны́не ду́ши на́ша весели́т, и от долувлеку́щих страсте́й в го́рняя возно́сит, сию́ же песнь ве́рнии воспева́юще и честь Тебе́ я́ко Богороди́тельнице воздаю́ще, Сы́ну Твоему́ и Бо́гу на́шему зову́т: Аллилу́иа.
И́кос 11
Благослове́нная в жена́х нарекла́ся еси, Де́во Всепречи́стая, я́ко Вы́шний призре́ на смире́ние Твое́, и сотвори́ Тебе́ вели́чие Си́льный, изво́лив во чре́ве Твое́м, Непоро́чная, всели́тися. Ты же ве́ровавши глаго́ланным от Го́спода, в рождестве́, и пре́жде рождества́, и по рождестве́ обрела́ся еси́ соверше́нно непоро́чная, ны́не же от всех родо́в си́це ублажа́ешися:
Ра́дуйся, смире́нных возвыше́ние;
ра́дуйся, го́рдых низложе́ние.
Ра́дуйся, все́ю кре́постию Твое́ю Го́спода возлюби́вшая;
ра́дуйся, всем се́рдцем Твои́м Бо́га взыска́вшая.
Ра́дуйся, светоно́сный и ле́гкий о́блаче;
ра́дуйся, нося́щая Со́лнце Пра́вды Христа́.
Ра́дуйся, Гра́де живы́й, ве́чно ца́рствующий;
ра́дуйся, благоуха́нных цвето́в прекра́сный раю́.
Ра́дуйся, Де́во Всепречи́стая;
ра́дуйся, Ма́ти Всеблага́я.
Ра́дуйся, христиа́н упова́ние;
ра́дуйся, поги́бших взыска́ние.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 12
Благода́ть и по́мощь, Пресвята́я Дево, подае́ши всем с ве́рою и любо́вию к Тебе притека́ющим и Бо́жию Тя Ма́терь испове́дающим, те́мже предста́тельство стра́шное и непосты́дное ве́рным явля́ешися, я́ко вои́стину Бо́га пло́тию родила́ еси́, Ему́же пое́м: Аллилу́иа.
И́кос 12
Пою́ще Твое́ пресла́вное, Де́во, в дом Заха́риин прише́ствие и е́же со свято́ю Елисаве́тою пречестно́е сре́тение Твое́, сла́вим Тя, я́ко одушевле́нный храм, Богоро́дице, во Твое́й бо утро́бе всели́вся Господь, освяти́, просла́ви и научи́ всех вопи́ти Тебе́:
Ра́дуйся, зе́млю пречи́стыми ног Твои́х стопа́ми благослови́вшая;
ра́дуйся, Го́рнюю страну́ прише́ствием Твои́м освяти́вшая.
Ра́дуйся, живоно́сных вод кла́дезю неисчерпа́емый;
ра́дуйся, благода́ти исто́чниче неоскудева́емый.
Ра́дуйся, сладча́йшая реко́ нетле́ния;
ра́дуйся, утро́бо Боже́ственнаго Воплоще́ния.
Ра́дуйся, мо́ре, грех Ада́мов погрузи́вшее;
ра́дуйся, струе́, жа́жду Дави́дову утоли́вшая.
Ра́дуйся, купе́ле, вся́кую скве́рну очища́ющая;
ра́дуйся, живото́чною ро́сою ду́ши на́ша напая́ющая.
Ра́дуйся, непло́дия го́рькаго разреше́ние;
ра́дуйся, согреше́ний проще́ние.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 13
О, Всепе́тая Ма́ти, Де́во Всепречистая и Преблагослове́нная, всех Святы́х Святе́йшее Сло́во во чре́ве Свое́м вмести́вшая и ро́ждшая Спа́са Христа́, при́зри на ны, зно́ем грехо́вным иста́явшия и непло́дных помы́шлений у́зами содержи́мыя, и душ на́ших горча́йшее непло́дие исцели́, и плодоно́сны доброде́тельми ны соде́лай, да Твоим ма́терним предста́тельством ве́чныя сме́рти изба́вльшеся, Сы́ну Твоему́ и Бо́гу на́шему пое́м: Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]
И́кос 1
Арха́нгельский глас вопие́м Ти, Чи́стая: «Ра́дуйся, Благода́тная, Госпо́дь с Тобо́ю! Благослове́нна Ты в жена́х, и благослове́н Плод чре́ва Твоего́!», в сре́тение же Тебе́ у́мно исходя́ще, со свято́ю и пра́ведною Елисаве́тою зове́м: «Отку́ду нам сие́, да прии́де к нам Ма́ти Го́сподня?», и та́йне Боже́ственнаго Воплоще́ния дивя́щеся, воспису́ем Ти похва́льная:
Рáдуйся, Отрокови́це Богоневе́стная;
рáдуйся, Мáти Сло́ва Неискусобрáчная.
Рáдуйся, Дýхом Святы́м осенéнная;
рáдуйся, Трóицы оби́тель свящéнная.
Рáдуйся, áнгельских умóв удивлéние;
рáдуйся, человéческаго рóда украшéние.
Радуйся, гóрняя с дóльними совокупи́вшая;
рáдуйся, вратá рáйская земноро́дным отвéрзшая.
Радуйся, Прему́дрости Бо́жия прия́телище;
радуйся, Жи́зни присносу́щныя сокро́вище.
Рáдуйся, дрéвния кля́твы разрешéние;
рáдуйся, прароди́телей избавлéние.
Ра́дуйся, Обра́дованная, в го́рняя умы́ и сердца́ на́ша возводя́щая.
Конда́к 1
Избра́нней от всех родо́в Присноде́ве Богоро́дице, по пресла́внем Благовеще́нии в Го́рнюю страну со тща́нием восте́кшей, похва́льная пе́ния ве́рнии прино́сим. Ты же, Влады́чице, я́ко Таи́нница су́щи Предве́чнаго Сове́та и вмести́лище всех Царя́, Христа́ и Бо́га, трисо́лнечным све́том озари́ пою́щия Ти: Ра́дуйся, Обра́дованная, в го́рняя умы́ и сердца́ на́ша возводя́щая.
Моли́тва
О, Пресвята́я, Пречи́стая и Пренепоро́чная Влады́чице на́ша Богоро́дице! Вы́шши еси́ всех А́нгел и Арха́нгел, и всея́ тва́ри Честне́йши. Всеблага́го Бо́га Ма́ти Блага́я, Засту́пнице челове́ков и гро́зная Прогони́тельнице сопроти́вных сил, изба́ви нас от вся́каго греха́ и укрепи́ на вся́ку доброде́тель, сообра́зны нас сотвори́ Сы́ну Твоему́ и Бо́гу на́шему, да не всу́е нарица́емся и́менем Христо́вым, но да яви́мся и́стинная Его́ ча́да, да бу́дем, я́ко ка́мение жи́во, зи́ждущеся в храм духо́вен, во святи́тельство свя́то, возноси́ти же́ртвы духо́вны, благоприя́тны Бо́гови, да прибега́ем с несумне́нною ве́рою под всеси́льный покро́в Твой, мо́жеши бо всех спасти́, я́ко Мати Бо́га Вышняго, те́мже мо́лим Тя: разжени́ о́блак страсте́й, находя́щих на ны, уста́ви разже́нныя стре́лы лука́ваго, льсти́вно на ны дви́жимыя, мир Сы́на Твоего́ ниспосли́ в сердца́ на́ша, да с ра́достию взыва́ем: кто по Бо́зе, я́ко Влады́чица на́ша, Всеблага́я, Всеблагомо́щная и пребы́страя Засту́пница? Сего́ ра́ди велича́ем Тя, я́ко преизоби́льно излия́ся на Тя Боже́ственная благода́ть, и ве́лие дерзнове́ние и́маши, стоя́щи одесну́ю Престо́ла Бо́жия, неизрече́нною свя́тостию и чисто́тою преукраше́нная, я́ко даде́ся Тебе́ от Го́спода дерзнове́ние безприкла́дное сохраня́ти, заступа́ти и спаса́ти насле́дие Сы́на Твоего́.
О Пречи́стая и Преблагослове́нная Богоро́дице, спаса́й же нас, Твои́х рабо́в, Ты бо еси́ Ма́ти Го́спода Бо́га и Спа́са на́шего Иису́са Христа́, сего́ ра́ди мы, гре́шнии, к Тебе́ Пренепоро́чней и устране́нней вся́каго греха́ притека́ем и вопием: о со́лнца светле́йшая Ма́ти на́ша, очи́сти нас, чад Твои́х, мно́гими грехми́ оскверне́нных, оба́че смире́нно взыва́ющих о по́мощи! Возста́ви нас па́дающих, заступи́ немощны́х и на путь спасе́ния наста́ви. Мо́лим Тя, Ма́ти Де́во Влады́чице, пода́ждь нам чистоту́ серде́чную, ве́ру несумне́нную и любо́вь и́стинную! Спаси́ нас, чад Твои́х, а́ще и недосто́йно моля́щихся Ти, очи́сти, освяти́, утверди́ нас моли́твами Твои́ми, да Тя сла́вим, Помо́щницу Ско́рую, Засту́пницу Усе́рдную и Спору́чницу Непосты́дную пред Сы́ном Твои́м и Бо́гом, Е́муже подоба́ет вся́кая сла́ва, че́сть и держа́ва, со Безнача́льным Его́ Отце́м и Всесвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь
