Кондак 1
Взбранней Воеводе победительная,/ яко избавльшеся от вечныя смерти/ благодатию от Тебе рождшагося Христа Бога нашего,/ благодарственная восписуем Ти, раби Твои:/ яко имущая державу непобедимую, от всяких нас бед свободи зовущия;/ Радуйся, Владычице, пред образом святым Твоим радостию нас исполняющая.
Икос 1
Архангела благовестие слышавши, прият Пречистая откровение Божие и со смирением отвеща: «Се, Раба Господня, буди Мне по глаголу Твоему». Мы же со Архангелом Гавриилом Благодатную песньми почтим:
Радуйся, Небесных Сил Высшая.
Радуйся, Честнейшая Херувим и Славнейшая без сравнения Серафим.
Радуйся, сосуде Богом избранный.
Радуйся, Ангелы воспеваемая.
Радуйся, Серафимы прославляемая.
Радуйся, Архангелы возвеличенная.
Радуйся, яко предстательством Твоим спастися уповаем.
Радуйся, Владычице, пред образом святым Твоим радостию нас исполняющая.
Кондак 2
Помыслы греховными долу ныне преклонены есмы, сердца наша хладом греха объяты, очи отягчены греховным сном. Но, Ты, Всепетая, воздвигни нас от мрака греховнаго к свету Твоея любве и милосердию Господа Вышняго, да принесем Ему смиренное моление наше: Аллилуия.
Икос 2
Разум разумети не может смиреннаго на земли служения Твоего, Госпоже, Сыну Твоему и Искупителю нашему. Во дни уничижения и страдания Сына Твоего, Богомати, оружие смертное уязвляше сердце Твое. Мы же, умиленно глаголем Ти таковая:
Радуйся, благословенная в женах.
Радуйся, обретшая благодать у Бога и паче ангел возвеличенная.
Радуйся, сосуде Богом избранный.
Радуйся, яко зачала еси Сына, иже наследит престол Давида-царя.
Радуйся, свете неугасимый на пути земнем.
Радуйся, жития вечнаго двери нам отверзающая.
Радуйся, Владычице, пред образом святым Твоим радостию нас исполняющая.
Кондак 3
Сила Вышняго яви Тя, Благодатная, яко источник неоскудный утешения бедствующим. На Белую Русь множицею изливши милость Твою, благоволила еси явити образ Твой и нам грешным в земли Пуховичстей. Сего ради, благодаряще Бога, зовем: Аллилуия.
Икос 3
Яко Предстательница пред Сыном Твоим о всех страждущих и призывающих Тя, явилася еси некоему Исидору, лежащу в болезни, исцели его и повеле поставити крест и храм на горе, да вси во умилении сердца взываем:
Радуйся, земле обетованная.
Радуйся, скиние, в нюже вселися Божество телесне.
Радуйся, стамно, носившая манну жизни – Христа.
Радуйся, светильниче, огнем Божественным возженный.
Радуйся, трапезо, Хлеб животный вместившая.
Радуйся, землю Пуховичскую осветившая.
Радуйся, Владычице, пред образом святым Твоим радостию нас исполняющая.
Кондак 4
Буря недоумения смущает наш ум, како возможем недостойными усты воспети славу Твою, Пречистая Дево, юже во иконе Твоей святей явила еси, даровавши ю нам в помощь и защиту от враг видимых и невидимых. Сего ради поем Богу нашему: Аллилуия.
Икос 4
Видев Исидор явление Божия Матере, устрои храм на горе и пренесе в онь образ Пресвятыя Богородицы, да выну прославляюще Владычицу нашу, глаголем Ей таковая:
Радуйся, образом Твоим нас осеняющая.
Радуйся, посещением Твоим нас исцеляющая.
Радуйся, верою вводящая многия в чертог Царства Небеснаго.
Радуйся, крине чистоты, блистанием светящийся.
Радуйся, миро благовонное, всему миру излиянное.
Радуйся, Живоносный источниче, источивший воду жизни.
Радуйся, Владычице, пред образом святым Твоим радостию нас исполняющая.
Кондак 5
Яко Боготечная звезда явися икона Твоя Богомати, озаряющи светом боговедения сущия во тьме, исполняющи надеждою скорбящыя и унывающыя, наставляющи заблудшыя чада Твоя на стезю жития христианского. Темже в радовании духовнем благоговейно воспоим Господеви: Аллилуия.
Икос 5
Егда иноплеменницы сожгоша храм Твой в годину лютую, людие чудно обретоша образ Твой и в радости воспеша:
Радуйся, икону Твою во огни сохраншая.
Радуйся, вся иноплеменники тыя слепотою поразившая.
Радуйся, недужныя исцеляющая и плачущыя утешающая.
Радуйся, покровом Твоим верныя покрывающая.
Радуйся, облаче легкий, на немже прииде Господь Царь славы.
Радуйся, Богу уневестившая.
Радуйся, Владычице, пред образом святым Твоим радостию нас исполняющая.
Кондак 6
Проповедующе Твое о нас грешных присное заступление недостойными усты непрестанно возносим молитвы к Сыну Твоему и Богу нашему, поюще Ему: Аллилуия.
Икос 6
Возсияла еси лучами чудес Твоих, Богородице Дево, исцеляющи вся, с искренним сердцем прибегающия к иконе Твоей всечестней, да вси Тебе согласно вопиют:
Радуйся, от начала веков во спасение наше предызбранная.
Радуйся, горо несекомая, от неяже краеугольный камень Христос отсечеся.
Радуйся, неплоднаго корене прозябение.
Радуйся, благодатию Божиею предочищенная.
Радуйся, от младенства Богу посвященная.
Радуйся, всеми добродетельми преукрашенная.
Радуйся, Владычице, пред образом Святым Твоим радостию нас исполняющая.
Кондак 7
Хотящии искоренити веру Христову в годину безбожных гонений, разрушиша святый храм Марииногорский. Ты же, Владычице, избрала место Себе в веси Блонь, идеже по мнозех летех икону Твою обретше, вернии воспевают Богу: Аллилуия.
Икос 7
Вся еси в вышних, Владычице, обаче и нижних не оставляеши, защищающи, аки стеною, честною иконою Твоею грады и веси наша. Темже в радости вопием Тебе:
Радуйся, Духом Святым осененная.
Радуйся, совета неизреченнаго Таиннице.
Радуйся, яко с Тобою Господь.
Радуйся, Благословенная в женах.
Радуйся, верных Твоих не оставляющая.
Радуйся, икону Твою в час испытаний сохраньшая.
Радуйся, Владычице, пред образом святым Твоим радостию нас исполняющая.
Кондак 8
Странни и пришельцы есмы на земли сей, житие бо наше суетно и маловременно есть. Темже молим Тя, Владычице, возбуди нас скоро от сна греховнаго, да сподобимся гласом радования воспевати Христу Богу: Аллилуия.
Икос 8
Новое место иконе Твоей обретши в храме святого князя Александра Невскаго, Владычице, точиши исцеления всем с верою притекающим к Тебе и вопиющим:
Радуйся, Церкве утверждение.
Радуйся, Мати Творца и Господа.
Радуйся, смирением возвышенная.
Радуйся, Симеоном благословенная и Анною возвеличенная.
Радуйся, от всех родов ублажаемая.
Радуйся, носившая на руку Твоею Содержащаго весь мир в деснице Своей.
Радуйся, Владычице, пред образом святым Твоим радостию нас исполняющая.
Кондак 9
Всякое естество ангельское удивися делу Твоего милосердия, Господи, яко даровал еси нам твердую и теплую Заступницу рода христианского, невидимо с нами прибывающую. Темже услыши и нас, благодарно вопиющих:
Аллилуия
Икос 9
Ветии многовешаннии недоумеют воспети по достоянию множество чудес Твоих, Владычице. Невозможно исчести, Человеколюбивая Мати, щедроты Твоя на злостраждущия и беспомощныя изливаемыя. Темже убо верою и любовию моления возносим Ти сицевая;
Радуйся, помощи Твоея и заступления николиже нас лишающая.
Радуйея, на стезю спасения верных наставляющая.
Радуйся, ум наш, омраченный небрежением, кротким вразумлением Твоим просвещающая.
Радуйся, яко Тобою от страстей телесных избавляемся.
Радуйся, яко Тобою сладостей духовных исполняемся.
Радуйся, скорбящих и плачущих отрадо и утешение.
Радуйся, Владычице, пред образом святым Твоим радостию нас исполняющая.
Кондак 10
Стена, и щит, и покров от всех врагов видимых и невидимых буди нам, Владычице, ко пречестней иконе Твоей с верою и любовию припадающим и вопиющим Сыну Твоему: Аллилуия.
Икос 10
Избавити хотящи многия люди от обдержащих их скорбей и болезней, паки явила еси икону Твою в земли Пуховичстей, егда Преосвященный Стефан позна ю, от многих верующих почитаемую, и в радости возопи:
Радуйся, Царице неба и земли.
Радуйся, всея твари Высшая.
Радуйся, к Сыну Твоему и Богу молитвы верных приносящая.
Радуйся, славящыя Тя прославляющая.
Радуйся, благодать Твою иконам Твоим честным даровавшая.
Радуйся, всю вселенную лучами Твоея благодати озаряющая.
Радуйся, Владычице, пред образом святым Твоим радостию нас исполняющая.
Кондак 11
Пение всякое побеждается множеством чудес, приснобываемых от святыя Твоея и чудотворныя иконы. Якоже бо скорая Помощница недуги исцеляеши, от бед и мучения демонскаго избавляеши с верою Тя на всяком месте призывающия и вопиющия Богу: Аллилуия.
Икос 11
Светоприемную свещу зрим святую икону Твою, Богомати, во Отечестве нашем возженную и верныя ко свету спасительному привлекающую. Темже вопием Ти:
Радуйся, земное небо к горнему селению возвышенное.
Радуйся, чистотою девства Твоего и славою ангелов превосходящая.
Радуйся, грехи наша в мори милосердия потопляющая.
Радуйся, враждующих нечаемое примирение.
Радуйся, яко паки явила еси милость и благодать людем твоим.
Радуйся, яко по мнозем неведении чрез архиерея Божия имя иконы Твоея явила еси.
Радуйся, Владычице, пред образом святым Твоим радостию нас исполняющая.
Кондак 12
Благодать божественную испроси нам у Сына Твоего и Бога нашего, простри нам руку помощи, отжени от нас всякаго врага и супостата, умири нашу жизнь, да не погибнем люте без покаяния. Но приведи нас в вечныя кровы, Богородительнице, да радующеся поем Тобою нас спасающему Богу: Аллилуия.
Икос 12
Поюще неизреченное матернее Твое милосердие, восхваляем Тя вси яко твердую предстательницу о нас грешных, поклоняемся Тебе и с любовию молим Тя: настави нас на путь спасения, да достойны явимся выну Твоего милостиваго заступления, вопиющия Ти сицевая:
Радуйся, отчаянных надежно.
Радуйся, грешных спасение.
Радуйся, обидимых прибежище.
Радуйся, печальных утешение.
Радуйся, вдов и сирот покрове.
Радуйся, болящих исцеление.
Радуйся, Владычице, пред образом святым Твоим радостию нас исполняющая.
Кондак 13
О Всепетая Мати, невместимаго Бога во чреве вместившая, и радость всему миру рождшая. Нынешнее приими акафистное пение, вся наша печали на радость преложи, и от всякия избави напасти всех, и будущия изми муки, о тебе вопиющих: Аллилуия.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Архангела благовестие слышавши, прият Пречистая откровение Божие и со смирением отвеща: «Се, Раба Господня, буди Мне по глаголу Твоему». Мы же со Архангелом Гавриилом Благодатную песньми почтим:
Радуйся, Небесных Сил Высшая.
Радуйся, Честнейшая Херувим и Славнейшая без сравнения Серафим.
Радуйся, сосуде Богом избранный.
Радуйся, Ангелы воспеваемая.
Радуйся, Серафимы прославляемая.
Радуйся, Архангелы возвеличенная.
Радуйся, яко предстательством Твоим спастися уповаем.
Радуйся, Владычице, пред образом святым Твоим радостию нас исполняющая.
Кондак 1
Взбранней Воеводе победительная,/ яко избавльшеся от вечныя смерти/ благодатию от Тебе рождшагося Христа Бога нашего,/ благодарственная восписуем Ти, раби Твои:/ яко имущая державу непобедимую, от всяких нас бед свободи зовущия;/ Радуйся, Владычице, пред образом святым Твоим радостию нас исполняющая.
Молитва
О, Пресвятая и Преблагословенная Мати Сладчайшаго Господа нашего Иисуса Христа! Припадаем и покланяемся Тебе пред святою и чудотворною иконою Твоею, юже явила еси на земли Пуховичстей. Смиренно молим Тя ныне: сподоби нас, немощных и грешных, Твоего Матерняго заступления и благо попечения.
Ей, Госпоже Всемилостивая! Умилосердися на ны, обуреваемыя грехми многими, простри ко Христу Богоприемныя руце Твои, и предстательствуй за ны пред благостию Его, просящи нам прощения прегрешений наших, благочестиваго мирнаго жития, непостыдныя христианския кончины и добраго ответа на страшнем судище Его: да спасаеми всесильными Твоими молитвами, блаженство райское наследим, и со всеми святыми воспоем пречестное и великолепое имя Святыя Троицы, Отца, и Сына, и Святаго Духа, и Твое велие к нам милосердие и заступление во веки веков.
Аминь.
