Кондак 1
Избранный от мира, предивный угодниче Христов, веры и истины благовестниче, их же, яко добрый сеятель на ниве Христовой, в сердца чад Божиих усердно всеял еси, не престай молитися за ны ко Господу, даровати земли нашей мир и безмятежие, Церкви Святей от ересей и расколов ограждение, да твоими молитвами от бед избавляеми, благодарно зовем ти:
Радуйся, святителю Мелетие, неусыпный о нас ко Христу Богу молитвенниче.
Икос 1
Ангела, пламенеюща духом и во плоти суща человека избра тя Господь быти служителя Церкви Святей и овцам Своим пастыря добра, от юности бо твоея Богу Единому сердцем и душею прилежал еси. Мы же, имуще в тебе образ пастыря предивна, умильно взываем ти:
Радуйся, Богом избранный и освященный наш пастырю;
Радуйся, увенчанный архиерейскою благодатию.
Радуйся, чистый разумом, всею душею Бога возлюбивый;
Радуйся, в житии твоем Тому ревностно послуживый.
Радуйся, в незлобии сердце твое соблюдый;
Радуйся, иго Христово от юности с радостию восприявый.
Радуйся, земли нашей благодатное произрастание;
Радуйся, со всеми, в земли нашей просиявшими, неба церковнаго украшение.
Радуйся, святителю Мелетие, неусыпный о нас ко Христу Богу молитвенниче.
Кондак 2
Видяще тя пастыря подвигом добрым подвизающася и, «аки елень на источники водныя», к Богу устремляющася, стадо же свое словом евангельским, аки ангельским хлебом, обильно питающа, святителю отче наш Мелетие, умиляемся сердцем и душею, благодаряще Бога, даровавшаго нам тебе пастыря на ниве церковной верна и стража овец Его прилежна, и зовем Ему: Аллилуиа.
Икос 2
От юности твоея, богомудре Мелетие, орлу уподобился еси, от мирския суеты к высоте небесней воспарив, да постигнеши глубины премудрости Божией и в свете истиннаго благочестия стадо твое мудро просветиши. Мы же наставляемии тобою поклонятися Богу, в Троице Святей славимому, воспеваем ти похвалы сия:
Радуйся, Бога в Святей Троице прославляемаго, познати нас просветивый;
Радуйся, Свет Истинный, просвещают; всякаго человека, всем возвестивый.
Радуйся, ревностный правды Божией искателю, Христа душе твоей обретый;
Радуйся, неутомимый ея глашатаю и жаждущих правды Божией учителю.
Радуйся, закон Божий на скрижалях сердца твоего начертавый;
Радуйся, в слове, житии, любви, духе и вере добр образ верным показавый.
Радуйся, в Дому Божием яко финикc процветый;
Радуйся, чистотою сердца богатый, Необъятнаго разумом, верою объявый.
Радуйся, святителю Мелетие, неусыпный о нас ко Христу Богу молитвенниче.
Кондак 3
Яко серна из тенет, от суеты мира сего отбегл еси и к иноческому подвигу потщался еси, Христу Богу непорочным житием благоугодил еси, достоблаженне отче наш Мелетие, в трудех же и бдениих, от стражи утренния до нощи дремания веждома твоима и сна очесом твоим не давал еси, сего ради жилище Духа Всесвятаго быти сподобился еси, и в Троице певаемому Богу, яко орган многострунный, непрестанно воспевал сладостное: Аллилуиа.
Икос 3
Кедру ливанскому уподобился еси, святителю Христов Мелетие, изрядно укрепивый душу твою благочестием иноков Печерских, ихже нраву, молитве и воздержанию последовал еси, и яко воин Христов, противу козней вражиих ополчился еси. Видяще тя любовию ко Христу пламенеющаго, благоговейно взываем ти:
Радуйся, Господа ради дом родительский и прелести мира сего оставивый;
Радуйся, путем тесным за Христом последовавый.
Радуйся, ангельское житие благодатно стяжавый;
Радуйся, яко юный Исаак смиренно в руце Божий себе цела отдавый.
Радуйся, образе кротости и о молитве Иисусове присное памятование;
Радуйся, помощи Божией непрестанное призывание.
Радуйся, целомудренной любовию к небесным воспаривый;
Радуйся, молитвою твоею землю нашу освятивый.
Радуйся, святителю Мелетие, неусыпный о нас ко Христу Богу молитвенниче.
Кондак 4
Видя тя, Пастыреначальник Христос, иноческаго подвига ревнителя, трудов же и бдений нощных неленостнаго исполнителя, постави тя юным отроком наставника и учителя, ихже делом и словом к пастырскому служению мудре уготовлял еси, и преуспевати в житии благонравием отечески наставлял еси, да и тии, в возраст пришедше и поминающе благия заветы твоя, множицею воспоют Богу: Аллилуиа.
Икос 4
Прияв жребий апостольства от Господа твоего, питомцы твоя богословия учением и отеческою любовию усердно наставлял еси, и братию обители Златоглавыя во иноческом благочестии утверждал еси, да приведеши их ко Христу в честном жительстве течение совершати. Мы же, славяще добр образ трудов твоих, ублажаем тя сицевыми похвалы:
Радуйся, в земном Едеме, церкви Христовой, вертоградарю верный;
Радуйся, трудниче нивы Христовы неутомимый.
Радуйся, добрый сеятелю, слово Божие усердно в сердцах верных сеявый;
Радуйся, мудрый учителю, в евангельской истине таковых просветивый и утвердивый.
Радуйся, светильниче веры, добре горяй и светяй;
Радуйся, наставниче, в заповедех закона Божия право ходити нас научаяй.
Радуйся, яко в посте и молитвах выну пребывал еси;
Радуйся, в бдении и богохвалении безплотным поревновал еси.
Радуйся, святителю Мелетие, неусыпный о нас ко Христу Богу молитвенниче.
Кондак 5
Путеводней звезде уподобился еси, Мелетие преподобне, указуя всем пути к Царству Небесному, его же и сам стяжал еси, и душу твою, яко горницу Сионскую, Христу, Новой Пасхе, уготовал еси юже, видя смирением постлану и добродетели украшену, освяти Пастыреначальник архиерейской благодатию. Ты же, яко Петр апостол, взывал еси Ему: «Господи, Ты вся веси. Ты веси, яко люблю Тя», непрестанно воспевая Ему: Аллилуиа.
Икос 5
Апостольское учение веры и Божественныя благодати наследие имея, святителю отче Мелетие, не от человек зван был еси, якоже и Аарон, но от десницы Божией приял еси жребий служения архиерейскаго в Церкви Святей, и бремя сие, яко Крест Христов, на рамо твое взем, во всяком благочестии и чистоте словесных овец упасл еси. Зряще тя, пастыря добра о Церкви Христове прилежна, людие с любовию воспеваху тебе:
Радуйся, яко горница Сионская, целомудрием и смиренномудрием украшенный;
Радуйся, кротостию духовною и любовию сердечною яко алавастр мира у ног Христовых излиянный.
Радуйся, якоже Аарон, жертву чисту Богу приносивый;
Радуйся, яко Соломон, приношения твоя молитвою освятивый.
Радуйся, апостольскою ревностию веры в сердце твоем горяй;
Радуйся, молитвою чистою у Престола Божия благоухаяй.
Радуйся, яко тесен путь в житии твоем подвигом добрым прешел еси;
Радуйся, яко течение благое совершая, Господу Вседержителю угодил еси.
Радуйся, святителю Мелетие, неусыпный о нас ко Христу Богу молитвенниче.
Кондак 6
Проповедует тя Церковь Божия, стража верна овец словесных, ихже ты в безгодие и дни треволнения мудре упасл еси, в вере православной до конца соблюл еси и молитвою за вся пред жертвенником Господним предстоял еси, пастырю милостивый Мелетие. Тако и просветися свет твой пред человеки, иже видеша добрая дела твоя, и прославиша Отца Небеснаго, вопиюще Ему: Аллилуиа.
Икос 6
Возсиял еси, яко светило неугасимое, горением веры и чистотою души твоея в Перми и Иркутске, святителю Мелетие, идеже Пастыреначальник Господь постави тя пасти овец Его, имже ты воистину был еси правилом жития чистаго, и яко страж недремлющ, в вере православной паству сибирскую утвердил еси, образ пастыря добраго оставив нам, приносящим ти благохваления сия:
Радуйся, страже недремлющий, овец Христовых в вере бодренно охраняяй;
Радуйся, в годину бед и испытаний отеческою любовию их утешаяй.
Радуйся, оградо крепкая и надеждо православнаго стада несокрушимая;
Радуйся, лампадо светлая, в молитве и подвиге неугасимая.
Радуйся, пастырю, веры православныя истинный ревнителю;
Радуйся, плевел веры и нечестия искоренителю.
Радуйся, правды и истины паче всего в житии твоем искавый;
Радуйся, чистотою сердца твоего Господа Славы созерцавый.
Радуйся, святителю Мелетие, неусыпный о нас ко Христу Богу молитвенниче.
Кондак 7
Хотяй всем человеком спастися, ты всем вся был еси, да, якоже Павел, Христу всех приобрящеши, святителю отче Мелетие, апостольскими бо стопам грады и веси проходил еси, зной и мраз претерпевая богатых и убогих, злых и добрых посещал еси, овых целомудрию, овых к братолюбию призывая, а иныя страхом Божиим пастырски вразумляя, заблудших же и коснеющих в ересех и расколах отечески обличал и в вере православной утверждал еси, да вси единеми усты и единем сердцем поют Триединому Богу: Аллилуиа.
Икос 7
Яко новую голубицу яви тя Господь, святителю Мелетие, не ветвь бо масличную, но благовестие евангельское сущим в ковчезе церковном приносил еси и усты Давидовы к Богу взывал еси: «Да внидет пред Тя молитва моя, приклони ухо Твое к молению моему». Помяни убо и нас, чтущих тя звании сими:
Радуйся, от стражи утренния до нощи молитвы Богу приносивый;
Радуйся, в трудех и болезнех плоть твою от работы истления свободивый.
Радуйся, яко Владыце всех наша покаянныя молитвы приносиши;
Радуйся, и сам о нас Того усердно молиши.
Радуйся, в пощении и говений вкушавый хлеб ангельския сладости;
Радуйся, в страдании и терпении многом обретаяй евангельскую радость.
Радуйся, источниче чистый, душу твою слезами от грехов омывый;
Радуйся, ковчеже нескверный, душу твою Телом и Кровию Христовой освятивый.
Радуйся, святителю Мелетие, неусыпный о нас ко Христу Богу молитвенниче.
Кондак 8
Чудно соделоваяй пути нашего спасения Человеколюбец Господь, промыслительно, аки росу на руно Гедеоново, дарова тя Харьковстей пажити архипастыря прилежна и православнаго учения хранителя тверда, да в венец земнаго подвига твоего поставит тя пред Престолом Славы Своея молитвенника о нас тепла. Сего ради Богу, во благо вся устрояющему, со умилением зовем: Аллилуиа.
Икос 8
Всего себе в руце Божий предавый, к пастве града Харькова смиренно стопы твоя направил еси, отче наш Мелетие, идеже показался еси убогим прибежище и в бедах сущим утешение, юным же чистоты и целомудрия доброе наставление, вдовам и сирым искренний попечитель, нерадивым пастырем вразумление и во озлоблении сущим незлобивый обличитель, Церкви Христовой от всякаго нестроения мудрый защититель, и всех, в нуждах к тебе прибегающих, утешитель. О сем приими от нас таковая похвалы:
Радуйся, сокровище несокровенное, богатство твое неимущим добре расточивый;
Радуйся, яко отец чадолюбивый, жертвенную любовь пастве твоей явивый.
Радуйся, пастырю дивный, не пастве токмо, Самому Господу верно послуживый;
Радуйся, любяй ближних своих, и в них Самого Господа возлюбивый.
Радуйся, яко в малом был еси верен, и над многим постави тя Господь;
Радуйся, пламенно паству Христову возлюбивый, сего ради возлюби тя Пастыреначальник Христос.
Радуйся, архиерею Божий, от Превечнаго Архиерея свыше прославленный;
Радуйся, иерарше Христов, дарами Святаго Духа преисполненный.
Радуйся, святителю Мелетие, неусыпный о нас к Христу Богу молитвенниче.
Кондак 9
Вси людие паствы харьковския видевше тя, архипастыря своего, смирением и кротостию сияюща прославиша Бога, святителю отче Мелетие, ты же любовию к ним исполненный, яко отец о своих чадех твоих, слезныя молитвы Богу день и нощь изливал еси. Сего ради людие твои, умиляющеся сердцем и душею, воспеваху Богу, даровавшему им таковаго святителя дивна: Аллилуиа.
Икос 9
Како восхвалим по достоянию высоту смирения твоего, святителю Мелетие, егда посрамил еси прегордаго клирика твоего, тяжкими горестями омрачившаго многоскорбныя дни твои, — в лености безпечна и в делех нерадива, безстудне оклеветавшаго тя. Ты же смиренно раны тайных подвигов твоих на теле твоем клеветнику оному обнажил еси, и безукорне отпустил его; он же, злобою снедаемый, безутешно в землю отыде. Мы же от злых дел своих посрамляемии, дерзаем в покаянии звати Богу: «Господи! Даруй ми зрети моя прегрешения и не осуждати брата моего», тебе же приносити сицевая:
Радуйся, сосуде смирения, имже всякая гордыня низлагается;
Радуйся, любовь нелицемерная, еюже вся козни вражия попираются.
Радуйся, агнче незлобивый, никомуже злом за зло воздавый;
Радуйся, кротосте духовная, досаждения и поношения ближних своих отеческою любовию покрывавый.
Радуйся, роптание, празднословие и злохуление возненавидевый;
Радуйся, терпение крепкое и молчаливая к празднословию уста стяжавый.
Радуйся, кадило чистаго благоухания, сердца наша благодатным миром исполнивый;
Радуйся, светильниче неземнаго сияния, истинныя любве друг ко другу искати нас научивый.
Радуйся, святителю Мелетие, неусыпный о нас ко Христу Богу молитвенниче.
Кондак 10
Повеле Господь хотящым спасти душу свою погубити ю ради другов своих, ты же, святителю Мелетие, душу твою о пастве твоей полагал еси, и до кончины жития жертву Безкровную за вся люди Богу принося, в кротости душевней взывал еси к Нему: Господи, нас же всех, от Единаго Хлеба и Чаши причащающихся, соедини, и ни единаго нас осужденна сотвори: но да обрящем милость и благодать со всеми святыми, от века Тебе благоугодившими, во еже звати Тебе: Аллилуиа.
Икос 10
Стеною крепкою молитв твоих оградил еси нас, к заступлению твоему прибегающих, блаженне Мелетие, видехом бо тя до последняго издыхания твоего к Богу за паству взывающа: Господи! Сам всем вся буди, ведый коегождо, и прошение его, дом и потребу его. Избави, Господи, град сей и всякий град и страну от глада, губительства, труса, потопа, огня и меча. В твердом же на тя уповании нашем, — ныне, по отшествии твоем к Богу, услыши нас, вопиющих тебе:
Радуйся, прошения труждающихся и обремененных скоро исполняяй;
Радуйся, слезы и воздыхания чад своих милостивно утоляяй.
Радуйся, страже церковный, подвиги твоими многотрудными благо Церкви соблюдаяй;
Радуйся, ходатаю прилежный, молитвами твоими благодать Божию на землю нашу низводяй.
Радуйся, житие твое на земли преподобнически препроводивый;
Радуйся, добродетельми твоими Богови попремногу благоугодивый.
Радуйся, сосуде молитв многомощных, имиже демони далече отступают;
Радуйся, Тайн Божиих дивный строителю, в нихже ангели Божий человеком служат.
Радуйся, святителю Мелетие, неусыпный о нас ко Христу Богу молитвенниче.
Кондак 11
Пение ангельское услышати сподобился еси, святителю Мелетие, егда из храмины твоея телесныя исхождаше душа твоя, юже ты исповеданием во гресех, яко злато в горниле очистил еси, и причащением Пречистых Тайн Христовых паче снега убелил сию и Спасу предал еси. Человеколюбец же Господь прежде исхода твоего от земных дивно посети тя и добродетельна житием обрете тя, Его же свет неизреченный и славу неизглаголанную ученик твой узрев, в трепете душевнем ужасеся и возопи Богу: Аллилуйа.
Икос 11
Светило пресветлое Церкви Харьковстей возсиял еси, святителю Мелетие. В житии бо твоем и по преставлении к небесным чад твоих не оставляеши, но руце молебнии о наших гресех и о всех людех ко Христу воздеваеши, и тако гнев Божий, праведно на ны движимый, молением твоим умилостивляеши, и время на покаяние даровати нам Его умоляеши, да не безплодни явимся пред Лице Судии Праведнаго, но якоже мудрыя девы, со светильники, елея веры исполненными. Сего ради тебе, пред Богом присному о нас ходатаю, вседушевно взываем:
Радуйся, по отшествии твоем к Богу молитва о нас неумолкающая;
Радуйся, трапеза неоскудевающая, духовно нас невидимо питающая.
Радуйся, жителю горняго Сиона, с лики ангельския и всеми святыми обитаяй;
Радуйся, предстателю наш у Престола Божия, в земных испытаниих нас не оставляяй.
Радуйся, светильниче веры, в невечернем дни жизни нестареющейся дивно сияющий;
Радуйся, закоснелую совесть к покаянию пробуждающий.
Радуйся, яко душа твоя вчинена бысть с лики святителей;
Радуйся, яко блаженство сие пребудет с тобою в безконечныя веки.
Радуйся, святителю Мелетие, неусыпный о нас ко Христу Богу молитвенниче.
Кондак 12
Благодати неисповедимое знамение яви нам Господь, украси бо престольный собор града Харькова, яко ковчег завета в древней скинии двема херувимы, столпами истины и любве: святителем Цареградския Церкве Афанасием, яко стражем веры возседающим, и земли нашея угодником Своим Мелетием, во гробе малом почивающим. Сие знамение благоволения Божия вси вернии разумеюще, в Православной вере укрепляются и в радости душевней взывают Триединому Богу: Аллилуйа.
Икос 12
Поюще велия и преславная чудеса твоя, святителю Христов Мелетие, почитаем священную память твою и благоговейно молим тя, во еже милостивно даровати нам многая душам нашим полезная и ко спасению потребная. Мы же, имуще тя града Харькова дивное украшение, пред Богом же молитвенное заступление, благодарно зовем ти таковая:
Радуйся, угодниче Божий Мелетие, апостольских преданий хранителю верный;
Радуйся, святителю предивный, святаго Православия исповедниче неустрашимый.
Радуйся, избранниче Божий, благочестивыя веры отцев наших усердный подражателю;
Радуйся, земный ангеле, за град и Отечество наш теплый пред Богом предстателю.
Радуйся, архипастырю града Харькова, омофором твоим от всяких бед и напастей страну нашу покрываяй;
Радуйся, Христом Богом возлюбленный, в молитве твоих нас никогдаже оставляяй.
Радуйся, проповедниче Божия мира и надежде пред Богом несокрушимая;
Радуйся, о Церкви Христовой верный попечителю и молитвы за нас сило непреодолимая.
Радуйся, святителю Мелетие, неусыпный о нас ко Христу Богу молитвенниче.
Кондак 13
О, всеблаженне пастырю наш, святителю отче Мелетие! Приими малое сие моление наше, с любовию тебе приносимое, и умоли Христа Бога, да избави нас от всяких бед, скорбей и напастей, и миром незыблемым жизнь нашу да оградит. Церковь же Святую Свою от расколов и нестроений соблюдет, вся люди Своя в единомыслии веры и любве к Себе приведет, во еже в невечернем дни, Царствия и всегда воспевати Ему: Аллилуиа.
(сей Кондак глаголется трижды)
Икос 1
Ангела, пламенеюща духом и во плоти суща человека избра тя Господь быти служителя Церкви Святей и овцам Своим пастыря добра, от юности бо твоея Богу Единому сердцем и душею прилежал еси. Мы же, имуще в тебе образ пастыря предивна, умильно взываем ти:
Радуйся, Богом избранный и освященный наш пастырю;
Радуйся, увенчанный архиерейскою благодатию.
Радуйся, чистый разумом, всею душею Бога возлюбивый;
Радуйся, в житии твоем Тому ревностно послуживый.
Радуйся, в незлобии сердце твое соблюдый;
Радуйся, иго Христово от юности с радостию восприявый.
Радуйся, земли нашей благодатное произрастание;
Радуйся, со всеми, в земли нашей просиявшими, неба церковнаго украшение.
Радуйся, святителю Мелетие, неусыпный о нас ко Христу Богу молитвенниче.
Кондак 1
Избранный от мира, предивный угодниче Христов, веры и истины благовестниче, их же, яко добрый сеятель на ниве Христовой, в сердца чад Божиих усердно всеял еси, не престай молитися за ны ко Господу, даровати земли нашей мир и безмятежие, Церкви Святей от ересей и расколов ограждение, да твоими молитвами от бед избавляеми, благодарно зовем ти:
Радуйся, святителю Мелетие, неусыпный о нас ко Христу Богу молитвенниче.
Молитва святителю Мелетию, архиепископу Харьковскому и Ахтырскому
О, богомудре святителю Христов, отче наш Мелетие! Призри на нас, чад твоих, к стопам твоим припадающих и всесильнаго твоего заступления пред Господом слезно просящих. Беззакония бо наша отяготеша на нас, скорби и болезни обуяша на ны, и греховныя обычаи наша отдалиша от Господа сердца наша, и прельщениям вражиим, ко аду преисподнему нас влекущим, работати совратиша ны. Ты же, пастырю наш благосердный, в житии твоем ни единаго скорбяща и милости твоея просяща, николиже презрел еси. Вознеси моление о нас грешных ко Господу, да умолен быв Материю Своею, преложит гнев Свой, по грехом нашим праведно на нас движимый, на милование наше и подаст душам нашим крепость и телесем нашим потребное здравие, болезнем и немощем нашим исцеление и от скорбей и печалей избавление. Церковь Святую от наветов вражиих тверду и непоколебиму в мире соблюди, всякое епископство Православных и весь причт церковный в единомыслии веры утверди. Иночествующих братий наших, в посте и честнем жительстве подвизающихся, благодатию смирения и терпения снабди. Верным же чадам Церкви Христовой разум чист и свободен от страстей умоли, да не в гордости и самочинии сердца своя ожесточают, но в послушании сыновнем пастырем Церкви, якоже Самому Господу, себе смиренно вверяют, и кийждо их попечению о душе своей пламенно прилежит. Стране нашей испроси у Господа вся благая и ко спасению потребная, да от всех врагов, мыслящих нам злая, избавит нас и, по велицей Своей милости, всю жизнь нашу незыблемым миром оградит. Ей, святителю милостивый! Не лиши нас помощи твоея небесныя, но предстательством твоим вся ны во пристанище спасения приведи, и всесветлаго Царствия Христова наследники нас покажи, да поем и славим неизреченныя щедроты Человеколюбца Бога, Отца и Сына и Святаго Духа, и твое святое отеческое заступление, во веки веков. Аминь!
