Кондак 1
Избранней от всех родов Божией Матери и Царице, непрестанно у Престола Сына Своего молящейся о нас, с любовию благодарственная приносим пения. Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти: Радуйся, Всеблагая Владычице, молений наших скорая Услышательнице.
Икос 1
Ангельский собор на небеси немолчно воспевает Тя, Владычице, и мы земнороднии, притекающе к иконе Твоей, «Услышательница» именуемой, из глубины сердца взываем Ти:
Радуйся, яко о Тебе радуется Ангельский собор и человеческий род.
Радуйся, яко слава Твоя превосходит похвалы небесныя и земныя.
Радуйся, милость Свою чрез чудотворныя иконы Твоя нам свыше посылающая.
Радуйся, Всеблагая наша Наставнице, любовию Твоею нас к Себе привлекающая.
Радуйся, источающая великия милости и щедроты любящим Тя.
Радуйся, скоропредстательная Помощнице всем призывающим Тя.
Радуйся, Всеблагая Владычице, молений наших скорая Услышательнице.
Кондак 2
Видящи, Всенепорочная, благое желание преподобнаго Космы, взывающаго к Тебе: «Пресвятая Богородице! Помолись Сыну Твоему и Богу, да наставит мя на путь спасения!», благоволила еси предстательство Свое пред Сыном Своим милостиво ему явити, да Христу воспевает выну: Аллилуиа.
Икос 2
Разумев Промышление Божие о себе преподобный Косма, в дивнем гласе от иконы Твоея, Премилостивая, изшедшем: «Сыне и Боже Мой! Научи раба Твоего Косму, како ему спастися!», возопи к Тебе, благой Услышательнице молений наших, во умилении сердечнем таковая:
Радуйся, Мати Света Невечерняго и Духа Святаго селение.
Радуйся, Неувядаемый Цвете нетления и Ангельских сил ликование.
Радуйся, скорая Услышательнице усердно Тебе молящихся.
Радуйся, непостыдное упование к Тебе притекающих.
Радуйся, безчисленныя щедроты Своя всем милостиво подающая.
Радуйся, Купино неопально горящая, духовною радостию нас утешающая.
Радуйся, Всеблагая Владычице, молений наших скорая Услышательнице.
Кондак 3
Силою Вышняго и благодатию Твоею, Владычице, укрепленный святый Косма, егда слышаше на моление Твое ответствующий глас Творца своего: «В безмолвии да послужит Ми!», возблагодари Его за благостное попечение о себе песнию: Аллилуиа.
Икос 3
Имуще таковую Попечительницу о спасении нашем и источник неоскудеваемый небесных дарований, иноцы Святыя Горы Афонския притекающи к пречудному образу Твоему «Услышательница» именуемому, благодарными усты вопиют Ти, Богородице:
Радуйся, Пресвятая Дево, жребием Своим Гору Афонскую наименовавшая.
Радуйся, Пречистая, многими чудесы сию Святую Гору ознаменовавшая.
Радуйся, молитву угодника Твоего Космы скоро услышавшая.
Радуйся, и наша усердная моления не отвергающая.
Радуйся, икону Твою святую верным в помощь даровавшая.
Радуйся, знамении и чудесы сию прославившая.
Радуйся, Всеблагая Владычице, молений наших скорая Услышательнице.
Кондак 4
Бурю внутрь имеяй помышлений сумнительных, преподобный Косма дивяшеся, видев Жену царственныя красоты во обители Ватопедстей, Яже Сама властительно в церкви и трапезе повеления различная всем сказующи. Познав же в Ней Царицу Небесную, о насельницех обители пекущуюся, в веселии сердца возопи Богу: Аллилуиа.
Икос 4
Слышавше о чуде скораго услышания Пречистою Богородицею моления раба Своего, в обители Зографстей бывшем, иноцы Горы Афонския радовахуся, видевше новое явление милосердия Твоего, о, Богомати. Сего ради благодарственно вопием Ти сице:
Радуйся, благ временных и вечных усердная нам Ходатаица.
Радуйся, двери Царствия Христова верным отверзающая.
Радуйся, любовию Твоею нас на небеса возводящая.
Радуйся, благоутробие Сына Своего к нам приклоняющая.
Радуйся, Божия милости и любве преизобильное исполнение.
Радуйся, вопиющих к Тебе скорое услышание.
Радуйся, Всеблагая Владычице, молений наших скорая Услышательнице.
Кондак 5
Боготечная звезда явися нам, Владычице, честная Твоя икона «Услышательница», лучами чудес Твоих мрак печалей и мглу всяческих недугов и скорбей от сердец наших прогоняющая, и наставляющая на путь спасения всех с верою к Тебе притекающих и вопиющих Богу: Аллилуиа.
Икос 5
Видяще токи чудес, от святыя иконы Твоея «Услышательницы» источаемыя, вси иноцы Горы Афонския и окрестных стран стекахуся к ней на поклонение. Ты же, Преблагая, всем дары милости Твоея неоскудно подаеши от чудотворнаго образа Твоего, подвизая с благодарностию вопити Тебе:
Радуйся, Радосте наша и Утешение.
Радуйся, Покров наш и ограждение.
Радуйся, немощи наша душевныя и телесныя врачующая.
Радуйся, сердца наша любовию Твоею умягчающая.
Радуйся, от греховнаго падения нас избавляющая.
Радуйся, ум наш на небеса возводящая.
Радуйся, Всеблагая Владычице, молений наших скорая Услышательнице.
Кондак 6
Воспеваем дивное милосердие Твое к нам и велие снисхождение, Пресвятая Дево, не престаеши бо молитися о нас, грешных, пред Престолом Сына Твоего и Бога нашего, еже отвратити гнев Его, праведно на ны движимый, и помиловати всех верно вопиющих: Аллилуиа.
Икос 6
Возсиявает в душах наших, скорбию и унынием омраченных, благодатнаго утешения свет, и сердца наша веселия и радости исполняются, егда Ты, Владычице наша Преблагая, вразумляеши нас вопити к щедрому Богу, да милостив будет нам, грешным, и простит нам согрешения наша. Не премолчи убо, Владычице, молящися о нас, зовущих Ти со умилением:
Радуйся, скорбь нашу в радость претворяющая.
Радуйся, неизреченную сладость верным изливающая.
Радуйся, духовных очей наших прозрение.
Радуйся, скорбящих отрадо и увеселение.
Радуйся, в скорбех и недузех долготерпению нас научающая.
Радуйся, немощных благодатным Покровом Твоим покрывающая.
Радуйся, Всеблагая Владычице, молений наших скорая Услышательнице.
Кондак 7
Хотящи явити токи милостей и щедрот от иконы Твоея «Услышательница», сию не токмо в Горе Афонстей, но и в подобиих ея новыя возжегши светильники, во иных градех и весех прославила еси, да спасаемии Тобою от бед, Сыну Твоему вопиют: Аллилуиа.
Икос 7
Новое чудо милосердия Твоего зрим, Пречистая, в явлении чудотворнаго образа Твоего, к немуже припадающе и помощи от Тебе просяще, и Тобою вразумляеми и наставляеми вопием Ти:
Радуйся, теплая Ходатаице о живущих в жребии Твоем — Святей Горе Афонстей.
Радуйся, обитающим зде всех благ Подательница.
Радуйся, на всяком месте призывающих Тя спасающая.
Радуйся, от бед и напастей всех заступающая.
Радуйся, иконам Своим силу чудодействовати даровавшая.
Радуйся, Ликом Твоим нас утешающая.
Радуйся, Всеблагая Владычице, молений наших скорая Услышательнице.
Кондак 8
Странно и сумнительно неверующим слышати, Мати Царя Небеснаго, како на икону Твою святую вернии людие очима своима и умиленными душами взирающе, от скорбей избавляются и от бед сохраняются. Мы же, внимая слову Твоему, Владычице, реченному к первописанней иконе Твоей: «Благодать Рождшагося от Мене и Моя с сею иконою да будет», — веруем, яко и сия икона Твоя «Услышательница» благодать Твою источает. Темже благоговейно покланяющеся, лобызаем ю, вопиюще Богу: Аллилуиа.
Икос 8
Всем верным утешительно есть взирати на святую икону Твою, Владычице, на нейже зрим Тя, на руку Твоею Предвечнаго Младенца Господа нашего Иисуса Христа держащую, Емуже покланяющеся боголепно яко Сыну Твоему и Богу нашему, Тебе, истинней Богородице, со умиленнием глаголем:
Радуйся, горняго и дольняго мира Всецарице.
Радуйся, небесе и земли Владычице.
Радуйся, Путеводительнице к небу первейшая.
Радуйся, со Ангелом хранителем — Хранительнице наша усердная.
Радуйся, любящих Сына Твоего чады Своими именующая.
Радуйся, молитвы наша приятными Богу соделовающая.
Радуйся, Всеблагая Владычице, молений наших скорая Услышательнице.
Кондак 9
Всякаго естества ангельскаго превысшая явилася еси, Пресвятая Дево, Бога бо зачала еси плотию, Невместимаго во утробе Твоей вместила еси. Темже вси роди блажат Тя по долгу, благословенная Марие Богородице, от востока бо и до запада хвально имя Твое, иноков же лицы Покровительницу Тя свою именуют, наипаче же подвизающиися в жребии Твоем — Горе Афонстей, юже особым благоволением Твоим осенила еси, многая чудеса в ней содевающи и милости Твоя богатыя насельником ея являющи, да благодарно вопиют о Тебе Богу: Аллилуиа.
Икос 9
Ветии человечестии недоумеют восхвалити по достоянию славное, Владычице, иконы Твоея явление и дивная чудотворения Твоя, людем православным источаемая. Мы же, неисчетныя чудеса иконою Твоею являемая видевше, душею и сердцем радуяся, Тебе глаголем:
Радуйся, радость благодатную нам изливающая.
Радуйся, утешение духовное нам подающая.
Радуйся, на небесех царствующая и нас доле не оставляющая.
Радуйся, житие наше земное во благо устрояющая.
Радуйся, покаянием нашим двери райския нам отверзающая.
Радуйся, вечною радостию души наша озаряющая.
Радуйся, Всеблагая Владычице, молений наших скорая Услышательнице.
Кондак 10
Спасти хотящи люди Своя от обдержащих скорбей и болезней, даровала еси нам, Владычице, честную икону Твою «Услышательницу», да видяще являемую Тобою милость, вопием со умилением Богу, усыновившему нас Тебе при Кресте Своем и даровавшему нам таковую Путеводительницу на небо: Аллилуиа.
Икос 10
Стена еси заступления, Преблагословенная Дево, и столп крепок от лица вражия всем подвижником благочестия: Тебе бо дадеся велия сила на темныя силы адския. Сего ради вернии согласно Тебе зовут:
Радуйся, матернею любовию Твоею весь мир христианский объемлющая.
Радуйся, сострадания к страждущим преисполненная.
Радуйся, на стезю спасения верных наставляющая.
Радуйся, к благочестию и целомудрию жизнь нашу направляющая.
Радуйся, обителей иноческих неусыпная Блюстительнице.
Радуйся, домов и семейств благочестивых неустанная Хранительнице.
Радуйся, Всеблагая Владычице, молений наших скорая Услышательнице.
Кондак 11
Пение наше, не довлеющее к достойному прославлению милостей Твоих, Преблагословенная, обаче от полноты любве и усердия Тебе приносимое, не презри и не отвратися от нас, недостойных, но помози нам, Всеблагая, покаянием очиститися от скверны греховныя и преуспети в чистем и богоугоднем житии, да воспоминая неисчетная чудотворения Твоя, вопием Верховному Творцу чудес Богу: Аллилуиа.
Икос 11
Светоподательными лучами чудес святая икона Твоя немерцаемо сияет, Всемилостивая Владычице, и весь мир христианский благодатно просвещает, прогоняющи всякое вражие действо силою Божиею, от нея исходящею. Сего ради грядут к ней от лет древних на поклонение православных собори, умиленно воспевая пред нею благохваления таковая:
Радуйся, руце Твои за ны ко Господу простирающая.
Радуйся, непрестанно Ему молящаяся о нас.
Радуйся, недужным источник исцелений неоскудный.
Радуйся, разслабленным телом и духом врачевание скорое.
Радуйся, николиже верных заступлением не оставляющая.
Радуйся, во всем упование на Бога имети нас научающая.
Радуйся, Всеблагая Владычице, молений наших скорая Услышательнице.
Кондак 12
Благодать Божия, причастная иконе Твоей, «Услышательницею» нареченней, влечет к ней всех скорбящих и обремененных, и не тщи отходят они от сего источника Твоих милостей и щедрот: в скорбех отраду, в напастех защиту, в болезнех цельбу неоскудно получая, и благодарственно вопиют Сыну Твоему и Богу хвалебную песнь: Аллилуиа.
Икос 12
Поюще чудеса Твоя, Владычице, хвалим Тя, яко Живоносный Источник благодати, яко неистощимую реку чудес, и припадая усердно ко святей иконе Твоей, лобызаем ю с сердечною любовию и молим Тя: воззри на ны милосердием Твоим, смиренно приносящих Ти песни таковыя:
Радуйся, бедствующим благая Помощнице.
Радуйся, молящихся скорая Услышательнице.
Радуйся, яко в светлую ризу непорочности облещися нам пособствуеши.
Радуйся, яко сретению Жениха Христа предуготовляти нас тщишися.
Радуйся, стати одесную Бога на Страшнем Суде Христовом нам ходатайствующая.
Радуйся, внити в брачный чертог Сына Твоего и Бога нашего помогающая.
Радуйся, Всеблагая Владычице, молений наших скорая Услышательнице.
Кондак 13
О, Премилостивая Мати Сладчайшаго Господа нашего Иисуса Христа, во святей иконе Твоей Услышательницею нарекшаяся! Приими милостиво сие малое моление наше и исполни во благих прошения наша: даруй нам вся потребная к жизни и благочестию, избави нас от бед, болезней и печали и Царствия Небеснаго наследники всех сотвори, верно вопиющих Богу: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангельский собор на небеси немолчно воспевает Тя, Владычице, и мы земнороднии, притекающе к иконе Твоей, «Услышательница» именуемой, из глубины сердца взываем Ти:
Радуйся, яко о Тебе радуется Ангельский собор и человеческий род.
Радуйся, яко слава Твоя превосходит похвалы небесныя и земныя.
Радуйся, милость Свою чрез чудотворныя иконы Твоя нам свыше посылающая.
Радуйся, Всеблагая наша Наставнице, любовию Твоею нас к Себе привлекающая.
Радуйся, источающая великия милости и щедроты любящим Тя.
Радуйся, скоропредстательная Помощнице всем призывающим Тя.
Радуйся, Всеблагая Владычице, молений наших скорая Услышательнице.
Кондак 1
Избранней от всех родов Божией Матери и Царице, непрестанно у Престола Сына Своего молящейся о нас, с любовию благодарственная приносим пения. Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти: Радуйся, Всеблагая Владычице, молений наших скорая Услышательнице.
Молитва Пресвятой Богородице
О, Преблагословенная Владычице, Приснодево Богородице, скорая Услышательнице всех, к Тебе с верою прибегающих! Призри с высоты небеснаго величия Твоего на нас, к чудотворному Твоему образу припадающих и, услышав смиренную молитву нашу, умоли Сына Твоего и Бога нашего да сохранит в мире и благоденствии страну нашу, да укрепит Церковь Православную и непозыблему соблюдет ю от неверия, ересей и раскола. Избави всех, о, Всеблагая, с верою Тебе молящихся, от падений греховных, от навета злых человек, от бед, скорбей и болезней. Даруй нам дух сокрушения, смирение сердца, чистоту помышлений, исправление греховныя жизни и оставление согрешений наших; да вси, благодарне воспевающе величия Твоя, сподобимся Небеснаго Царствия и тамо со всеми святыми прославим пречестное и великолепое имя в Троице славимаго Бога: Отца и Сына и Святаго Духа. Аминь.
Тропарь, глас 3
Твоего предстательства уверение и милосердия Твоего явление икона Твоя «Услышательница» нам, Владычице, показася; пред неюже души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли, моления наша скоро услыши и спасение вечное душам нашим, Пречистая, испроси.
Кондак, глас 3
Днесь, Владычице, преподобный Косма к иконе Твоей с мольбою припаде и Тобою скоро услышан бысть, непрестанно Тебе хвалу воздая. И нам, под священный покров Твой прибегающим, да дарует Господь оставление грехов и велию милость.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.
