Минея, 22 Января, Канон
Глас 1
Песнь 1
Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.
Припев: Святы́й апо́столе Тимофéе, моли́ Бо́га о нас.
Воста́ния страсте́й и неве́дения мра́к моли́твами твои́ми, блаже́нне, разори́ све́тлою безстра́стия благода́тию, я́ко да богоявле́нна ны́не досто́йно воспою́ тя.
Сла́ва Отцу́ и Сы́ну и Свято́му Ду́ху.
Ви́дев Предве́дец и Бо́г твоего́ ума́ добро́ту, Тимофе́е, боже́ственным апо́столом тя́, сослужи́теля удосто́ив, показа́, му́дрым про́мыслом о на́с промышля́я.
И ны́не и при́сно и во ве́ки веко́в. Ами́нь.
Еди́но Пресу́щественное Нача́ло, проразумева́ющее вся́, ве́мы: от е́ллин бо апо́стол, Христо́вою просвеще́н благода́тию, ны́не боже́ственному Па́влу счисля́ется Тимофе́й.
Песнь 3
Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.
Припев: Святы́й апо́столе Тимофéе, моли́ Бо́га о нас.
Излия́ся, всеблаже́нне, бога́тно благода́ть во устна́х твои́х и ре́ки догма́тов источи́, Це́рковь Христо́ву напая́ющия и многопло́ден принося́щия пло́д, Тимофе́е христопропове́дниче, богому́дре апо́столе.
Сла́ва Отцу́ и Сы́ну и Свято́му Ду́ху.
Но́ги твоя́ проро́чески, всеблаже́нне, украси́шася, вся́к бо у́м, я́ве преиму́щий, благовести́л еси́ ми́р, всему́дре, дре́внюю разруши́вшаго челове́ков бра́нь Спа́са все́х и Го́спода.
И ны́не и при́сно и во ве́ки веко́в. Ами́нь.
Умертви́в твоя́ у́ды плотски́я, Сло́ву повину́л еси́ ху́ждшая, блаже́нне Тимофе́е, влады́чество пода́в лу́чшему, и, стра́сти удержа́в, ду́шу уясни́л еси́, наставля́емь Па́вловыми уче́нии.
Седален, глас 4
Боже́ственными дарова́нии укра́шен, удобри́л еси́, сла́вне, Ефе́сскую све́тлую митропо́лию, апо́столе, пропове́дник бо показа́лся еси́, с Па́влом боже́ственным все́м провозвести́л еси́ спаси́тельное сло́во. Те́мже торжеству́ем ве́рою па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Де́во Всенепоро́чная, я́же Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний, и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, Еди́на Всепе́тая.
Песнь 4
Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.
Припев: Святы́й апо́столе Тимофéе, моли́ Бо́га о нас.
Зако́нно, всеблаже́нне, пострада́ти изво́лив, воздержа́нием всеконе́чным треволне́ния страсте́й уму́ покори́л еси́, доброде́тели прие́м соверше́ние, великопропове́дниче богому́дре Тимофе́е.
Сла́ва Отцу́ и Сы́ну и Свято́му Ду́ху.
Облиста́в, я́ко со́лнце, Па́вел, испусти́, я́коже зарю́ све́тлу, вселе́нную бога́тным све́том просвеща́я, светоявле́нно тя́, богоявле́нне Тимофе́е, к наставле́нию на́шему и утвержде́нию.
И ны́не и при́сно и во ве́ки веко́в. Ами́нь.
Возжела́в те́пле жела́ний кра́йнейшее и любо́вию сраствори́вся, раче́нием на другу́ю жи́знь преше́л еси́, богоприя́тне, всегда́ твоего́ созира́я Рачи́теля и Того́ виде́ния насыща́яся.
Песнь 5
Ирмос: Бо́г Сы́й ми́ра, Оте́ц щедро́т, вели́каго Сове́та Твоего́ А́нгела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.
Припев: Святы́й апо́столе Тимофéе, моли́ Бо́га о нас.
Пе́рваго и все́х Вино́внаго Све́та невеще́ственными сия́нии просвеща́емь, ми́р уясни́л еси́ пропове́данием честны́м, свети́льник благоче́стия, жи́зни сло́во преиме́ния проявле́нно яви́лся еси́, священнотаи́нниче всеблаже́нне.
Сла́ва Отцу́ и Сы́ну и Свято́му Ду́ху.
Па́вла боже́ственнаго и́стинный учени́к учи́теля стопа́м после́дует, сего́ се́я уче́ния ве́рным, и́миже благоче́стия к све́ту наставля́еми, из но́щи у́тренююще, славосло́вим Тя́, Человеколю́бче.
И ны́не и при́сно и во ве́ки веко́в. Ами́нь.
Просвеще́нием Па́вел вторы́й явля́ешися, служа́щий пе́рвей све́тлости, сея́ позна́нием просвети́ на́с. Сего́ сво́инник Тимофе́й яви́ся, Того́ всеору́жием победи́тельно огражда́емь.
Песнь 6
Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.
Припев: Святы́й апо́столе Тимофéе, моли́ Бо́га о нас.
Колесни́ца Бо́жия яви́лся еси́, Тимофе́е, нося́щи Того́ Боже́ственное и́мя, пред лице́м безбо́жных мучи́телей, богоприя́тне, не ужаса́яся си́х свире́пства: ты́ бо в непобеди́мую Спа́са кре́пость оде́ялся еси́.
Сла́ва Отцу́ и Сы́ну и Свято́му Ду́ху.
Вене́ц благоле́пен прия́л еси́, пребога́те Тимофе́е, богому́дре апо́столе, и диади́мою Ца́рствия досто́йно обложи́лся еси́, и предста́л еси́ престо́лу Влады́ки твоего́, с Па́влом ра́дуяся в се́лех небе́сных, блаже́нне.
И ны́не и при́сно и во ве́ки веко́в. Ами́нь.
Ми́ром у́мнаго, Тимофе́е всече́стне, пло́тию на́с ра́ди истоще́ннаго Христа́ обонява́емь, благово́ние Сего́ прия́л еси́ и пре́дал еси́ ве́рою тебе́ притека́ющим, таи́нниче неизрече́нных свя́те, Того́ мы́сленныя любве́.
Кондак, глас 1
Боже́ственнаго ученика́ и спутеше́ственника Па́влова Тимофе́я, ве́рнии, воспои́м вси́, с си́м почита́юще му́драго Анаста́сия, возсия́вшаго от Перси́ды, я́ко звезду́, и отгоня́щаго душе́вныя на́ша стра́сти и неду́ги теле́сныя.
Икос
Со́лнца мно́жае возсия́ ле́тнее святы́х торжество́, и ве́рныя просвети́, и де́монскую тмообра́зную си́лу отгна́ всю́, и неду́ги очи́сти, и проше́ния прося́щих испо́лни. Те́мже притека́ю а́з, окая́нный, и молю́ся от боле́зни стра́стнаго моего́ се́рдца, да прииму́, я́же хощу́, и обря́щу, я́же тре́бую: премене́ние печа́ли, и житие́ безпеча́льно, и прегреше́ний оставле́ние, и боже́ственное врачева́ние душе́вное и теле́сное.
Песнь 7
Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.
Припев: Святы́й апо́столе Тимофéе, моли́ Бо́га о нас.
Слико́вник небе́снаго чи́на ты́ по досто́инству бы́в, весели́шися ра́достно, зари́ светода́тельныя, блаже́нне, насыща́яся, священнотаи́нниче Тимофе́е, хва́льнаго возвеща́я Бо́га и препросла́вленнаго.
Сла́ва Отцу́ и Сы́ну и Свято́му Ду́ху.
Священноде́йствуя Христо́во Ева́нгелие, от доброде́тельных высо́т богопи́санная посла́ния Па́вел боже́ственнейший, ра́дуяся, посла́ я́ко ученику́ тебе́, Тимофе́е, хва́льнаго возвеща́я Бо́га и препросла́вленнаго.
И ны́не и при́сно и во ве́ки веко́в. Ами́нь.
Немощно́е пло́ти укрепля́ше благомо́щием души́: я́ко безтеле́сен бо, на земли́ ты́ жи́тельствовав, му́ченик бы́л еси́, во главу́ сокруша́емь, священноде́телю та́инств Бо́жиих, богоблаже́нне.
Песнь 8
Ирмос: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.
Припев: Святы́й апо́столе Тимофéе, моли́ Бо́га о нас.
Стоя́ния а́нгельскаго сподобля́емь, показа́лся еси́, Тимофе́е блаже́нне, небе́сных чино́в, научи́вся бо преесте́ственно, све́тлости си́х подража́л еси́, му́дре. С ни́миже воспева́еши, веселя́ся: да благослови́т тва́рь вся́ Го́спода и превозно́сит во вся́ ве́ки.
Сла́ва Отцу́ и Сы́ну и Свято́му Ду́ху.
Си́лою оде́явся с небесе́, я́ко апо́стол, яви́лся еси́, богому́дре, наше́дшею страннообра́зно ученико́м Сло́ва и самови́дцем, о Тимофе́е! С ни́миже воспева́еши, ра́дуяся: да благослови́т тва́рь вся́ Го́спода и превозно́сит во вся́ ве́ки.
И ны́не и при́сно и во ве́ки веко́в. Ами́нь.
Ста́л еси́ жела́ния я́ве, всеблаже́нне, кра́йнейшаго, я́ко дости́гл до́брых, Тимофе́е богопропове́дниче, всегда́ осия́емь све́том Тро́ическим я́сно, и ны́не воспева́еши, веселя́ся: да благослови́т тва́рь вся́ Го́спода и превозно́сит во вся́ ве́ки.
Песнь 9
Ирмос: О́браз чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.
Припев: Святы́й апо́столе Тимофéе, моли́ Бо́га о нас.
Рече́ние Дави́дово испо́лнися, я́ко бо мо́лния, вселе́нней яви́лся еси́, пропове́данием озаря́я концы́, всеприснопа́мятне блаже́нне Тимофе́е, те́м тя́, богоявле́нне, непреста́нно велича́ем.
Сла́ва Отцу́ и Сы́ну и Свято́му Ду́ху.
Заре́ю светонача́льною, прему́дре, Богонача́льным Трисо́лнечным осия́нием насыща́яся и чи́сто наслажда́яся, пою́щия тя́, блаже́нне, спаса́й от мра́ка прегреше́ний, священнотаи́нниче всече́стне.
И ны́не и при́сно и во ве́ки веко́в. Ами́нь.
Ра́вна Тя́ Отцу́ и Ду́ху, Единоро́дне, пра́ве му́дрствующе, сла́вим, уче́ньми апо́столов Твои́х, Влады́ко, утвержда́еми, Па́вла, пропове́дника Твоего́ смотре́ния, и Тимофе́я богому́драго.
Светилен
Два́ свети́ла в ми́ре сия́ют светоно́сно, Тимофе́й же вели́кий во Христо́вых апо́столех и Анаста́сий му́ченик во единообра́зных, и́хже восхва́лим вку́пе.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Вси́ ве́рнии, Тя́ Хода́таицу ко из Тебе́ ны́не Ро́ждшемуся предлага́ем, Пресвята́я, мы́ же лу́чшаго ра́ди сраспина́емся Сему́. Те́мже не преста́й о на́с моля́щи.
