Минея, 4 Января, Кано́н апо́столов
Глас 4
Песнь 1
Ирмос: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Припев: Святи́и апо́столи, моли́те Бо́га о на́с.
Христо́вы ученицы́ бы́вше,/ нас ра́ди ве́щию теле́сного Я́вльшагося, всехва́льнии,/ просвети́сте мир весь заре́ю благоче́стия, тьму разори́вше безбо́жия.
Припев: Святи́и апо́столи, моли́те Бо́га о на́с.
Тле́нных оста́вльше оскверне́нное и нестоя́нное,/ Христу́ после́доваша Крисп, и Про́хор, и Андрони́к,/ Фадде́й и Никано́р,/ свети́льницы бы́вше Богови́днейшии.
Припев: Святи́и апо́столи, моли́те Бо́га о на́с.
Кре́пость губи́теля победи́сте, сла́внии, кре́постию Ду́ха,/ неи́стовством же безбо́жия коне́чне осла́бленныя кре́пости испо́лнисте/ и Боже́ственного разуме́ния.
Сла́ва Отцу́ и Сы́ну и Свято́му Ду́ху.
Пло́ти подо́бием я́вльшагося Го́спода Ампли́й пропове́да, Стахи́й и Фили́пп,/ я́ко апо́столи, я́ко Боже́ственнии иера́рси,/ я́ко вои́стинну служи́телие су́щих па́че ума́.
И ны́не и при́сно и во ве́ки веко́в. Ами́нь.
Богородичен: Боже́ственную Пала́ту Царе́ву почти́м,/ в Ню́же всели́ся, я́коже восхоте́, Неискусому́жную и Еди́ну Богоро́дицу,/ Ея́же ра́ди обожи́хомся, воспесносло́вим.
Песнь 3
Ирмос: Твоя песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Припев: Святи́и апо́столи, моли́те Бо́га о на́с.
Я́коже ре́ки, вас Сло́во посла́ во всю зе́млю,/ наполня́ющий сию́, всему́дрии, напое́нии Боже́ственнаго Ду́ха/ и пла́мень отъе́млющия безбо́жия благода́тию.
Припев: Святи́и апо́столи, моли́те Бо́га о на́с.
Воспои́м Ти́мона Боже́ственнаго,/ Си́лу же и Силуа́на/ и ве́рою восхва́лим Епене́та сла́внаго, и Урва́на, и Ага́ва,/ и́стинныя Христопропове́дники.
Сла́ва Отцу́ и Сы́ну и Свято́му Ду́ху.
Блаже́ни уже́ бы́вше, я́ко и́стинно блаже́ннаго Бо́га Учи́теля стяжа́вше,/ и́же пе́рвее окая́ныя, всему́дрии, прича́стники показа́сте Боже́ственнаго блаже́нства.
И ны́не и при́сно и во ве́ки веко́в. Ами́нь.
Богородичен: Чиста́ пре́жде рождества, и в рождестве́,/ и по рождестве́ воистинну Де́ва, Ма́ти, была́ еси́:/ Бо́га бо породила́ еси́,/ Его́же апо́столов сосло́вие пресве́тло пропове́да.
Седален, глас 3
Столпи́ непоколеби́мии Це́ркве,/ основа́ния благоче́стия бы́вше, ученицы́ Бо́га на́шего,/ соблюди́те сию́ невре́дну, отгоня́юще льсти́ваго собла́зны/ и моля́ще Христа́ Бо́га всегда́ дарова́ти нам ве́лию ми́лость.
Песнь 4
Ирмос: Неизсле́дный Бо́жий сове́т,/ е́же от Де́вы, воплоще́ния Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.
Припев: Святи́и апо́столи, моли́те Бо́га о на́с.
Мо́ре возмути́ша язы́ческое,/ в сие́ вше́дше, всему́дрии, я́коже ко́ни, Спа́совы ученицы́/ и ве́рныя спасо́ша водо́ю свято́ю и Ду́хом.
Припев: Святи́и апо́столи, моли́те Бо́га о на́с.
Облиста́ша, я́ко со́лнце на земли́,/ Пуд, Апе́ллий и Филоло́г,/ и Иродио́н, Руф же и Патро́в/ и ве́рный просве́ша, от тьмы неве́дения изба́вльше.
Припев: Святи́и апо́столи, моли́те Бо́га о на́с.
Напря́г, посла́ стре́лы вы я́ко изощре́нны Благоутро́бный,/ стре́лы, сокруша́ющия вражия и лю́те уя́звленныя, сла́внии,/ благода́тию Бо́жиею исцеля́ющия.
Сла́ва Отцу́ и Сы́ну и Свято́му Ду́ху.
Хвалу́ принесе́м Избави́телю, песносло́вяще Родио́на Богоглаго́ливаго,/ и Ерми́я сла́внаго, и му́драго Асинкри́та,/ Ли́на же Боже́ственнаго и Га́ия.
И ны́не и при́сно и во ве́ки веко́в. Ами́нь.
Богородичен: Тя блаже́ннейший дре́вле лик проро́чествующих Ду́хом/ Богоглаго́лании свяще́нными боголе́пно имену́ет, Всечи́стая,/ дверь же и го́ру приосене́нную.
Песнь 5
Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Припев: Святи́и апо́столи, моли́те Бо́га о на́с.
Вяза́ти же, всехва́льнии, и реши́ти я́ко апо́столи прии́мше вы власть,/ свя́занный злове́рия у́зами разреши́сте,/ те́мже ва́шу па́мять пра́зднуем, ве́рно лику́юще.
Припев: Святи́и апо́столи, моли́те Бо́га о на́с.
Боже́ственными Ариста́рх да почти́тся песнопе́ньми,/ Те́ртий, Иассо́н и Сосфе́н,/ Ке́сарь и Марк, Лука́, Сосипа́тр,/ Куа́рт и Боже́ственный Апе́ллий,/ Клим и Епафроди́т и всему́дрый Ера́ст.
Сла́ва Отцу́ и Сы́ну и Свято́му Ду́ху.
Вас, я́ко двана́десять, посла́ Госпо́дь, все искореня́ющия безбо́жие,/ всем челове́ком насажда́ющия зна́ние Боже́ственное све́тло, сла́внии апо́столи,/ моли́твенницы о душа́х на́ших.
И ны́не и при́сно и во ве́ки веко́в. Ами́нь.
Богородичен: О́чи просвети́, Де́во, се́рдца моего́,/ осия́й ми зарю́ покая́ния,/ тьмы мя изба́ви ве́чнующия, две́ре Све́та,/ христиа́н всех Прибе́жище, ве́рно воспева́ющих Тя.
Песнь 6
Ирмос: Боже́ственное сие́ и всечестно́е/ соверша́юще пра́зднество,/ Богому́дрии Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Припев: Святи́и апо́столи, моли́те Бо́га о на́с.
В весь мир кропи́те во́ду жи́зни спаси́тельную,/ о́блацы одушевле́ннии я́вльшеся, апо́столи,/ и ве́рных сердца́ ороси́сте.
Припев: Святи́и апо́столи, моли́те Бо́га о на́с.
Глаго́л Боже́ственных си́ла ва́ша ри́торов победи́ мно́гую лю́тость/ и нему́дрыя умудри́, объюроде́вшия ра́зумом пре́лести, всему́дрии.
Сла́ва Отцу́ и Сы́ну и Свято́му Ду́ху.
Боже́ственный Пуд и Трофи́м,/ Филимо́н сла́вный и Ариста́рх,/ Ониси́фор же и Тихи́к всеизря́днейший,/ я́ко ученицы́ Сло́ва да возвели́чатся.
И ны́не и при́сно и во ве́ки веко́в. Ами́нь.
Богородичен: Пою́ Тя, Еди́на Всепе́тая,/ сла́влю Тя, при́сно Богосла́вная,/ и блажу́ Тя, Ю́же ро́ди блажа́т родо́в,/ Де́во Бoгоблаже́нная.
Кондак, глас 2
Христо́вых ученико́в лик се́дмьдесят/ Боже́ственно, ве́рнии, в пе́снех восхва́лим,/ те́ми бо вси навыко́хом Тро́ицу почита́ти Неразде́льную,/ и пребыва́ют свети́льницы Боже́ственныя ве́ры.
Икос
Се́дмьдесяти апо́столов лик согла́сно, ве́рнии,/ свяще́нными песнопе́ньми да восхва́лим:/ Стефа́на, Про́хора же, и Си́лу, и Никано́ра,/ Ти́мона, и Ампли́я и Парме́на,/ Апе́ллия же, Иа́кова, Фили́ппа,/ Ариста́рха, и Ма́рка, и Матфи́я, и Иродио́на,/ Кри́скена и Фле́гонта,/ Варна́ву, Ли́на и Оли́мпа,/ Ана́нию, Луку́ и Асинкри́та и про́чия,/ пребыва́ют бо свети́льницы Боже́ственныя ве́ры.
Песнь 7
Ирмос: Не послужи́ша тва́ри Богому́дрни/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Припев: Святи́и апо́столи, моли́те Бо́га о на́с.
Улови́вше сло́вом, извлеко́сте из глубины́ безбо́жия язы́ки многоразсе́янныя,/ зна́меньми и чудесы́ утверди́вше мудрова́ния сих,/ му́дрии апо́столи, путевожди́ заблу́ждших.
Припев: Святи́и апо́столи, моли́те Бо́га о на́с.
Вше́дше в приста́нище тиша́йшее, волну́ющимся в мо́ри лю́тых спаси́телие яви́стеся/ и прави́телие му́дрии, воспева́юще:/ отце́в Госпо́дь и Бог, благослове́н еси́.
Припев: Святи́и апо́столи, моли́те Бо́га о на́с.
Вси Ево́да и Ка́рпа ублажи́м, и Тихи́ка, и Ки́фу,/ Иу́ста и Арте́му, Зи́ну же сла́внаго,/ я́ко Христо́вы ученики́, воспева́юще:/ отце́в Госпо́дь и Бог, благослове́н еси́.
Сла́ва Отцу́ и Сы́ну и Свято́му Ду́ху.
Молниезра́чнии Ду́хом бы́вше, Христо́вы апо́столи,/ одержи́мыя но́щию неве́дения изба́висте/ и к Све́ту жи́зни наста́висте, вопию́щия всегда́:/ Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Очисти́лище, Всенепоро́чная, была́ еси́ греша́щих при́сно,/ ро́ждши преесте́ственно ми́ра взе́млющаго грех Христа́, Ему́же зове́м:/ отце́в Госпо́дь и Бог, благослове́н еси́.
Песнь 8
Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Припев: Святи́и апо́столи, моли́те Бо́га о на́с.
Обно́вльше ра́зумы олядене́вшия ра́лом Сло́ва, всесла́внии,/ и в них спаси́тельная се́мена насе́ясте,/ и благоче́стия клас стори́чный пожа́сте – спа́сшихся мно́жество,/ Госпо́дни апо́столи все му́дрии.
Припев: Святи́и апо́столи, моли́те Бо́га о на́с.
Похвала́ми Иа́кова Боже́ственными,/ Клео́пу, Варна́ву же и Стефа́на,/ Нарки́сса всему́драго, Ма́рка, Аристову́ла и Апе́ллия/ почти́м, апо́столы Христо́вы, вопию́ще:/ Го́спода по́йте, дела́, и превозноси́те во вся ве́ки.
Сла́ва Отцу́ и Сы́ну и Свято́му Ду́ху.
Крест вме́сто броня́ нося́ще,/ ко всем му́жески ополчи́стеся полко́м зми́я, всему́дрии апо́столи,/ и, ты́я погуби́вше, я́же плени́ челове́ки, улови́сте ве́рою,/ и Жизнода́вцу приведо́сте Влады́це.
И ны́не и при́сно и во ве́ки веко́в. Ами́нь.
Богородичен: О, чу́до вы́шше чуде́с!/ Ка́ко ражда́еши и пребыва́еши де́вствующи, Всечи́стая Богоневе́сто?/ Сло́во бо родила́ еси́, Отцу́ Собезнача́льное,/ Ему́же вси пое́м:/ Го́спода по́йте, дела́, и превозноси́те во вся ве́ки.
Песнь 9
Ирмос: Всяк земноро́дный/ да взыгра́ется, Ду́хом просвеща́ем,/да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Припев: Святи́и апо́столи, моли́те Бо́га о на́с.
Исцели́ на́ша, Христе́, сокруше́ния серде́чная/ моли́твами возлюби́вших Тя и пропове́давших во всех язы́цех/ Бо́га ку́пно и Го́спода, Соде́теля всех,/ и и́дольское все омраче́ние отгна́вших све́том пропове́дания.
Припев: Святи́и апо́столи, моли́те Бо́га о на́с.
Я́коже мо́лния, мир освети́ша/ Лука́ вку́пе и Ерм,/ Марк и Ана́ния и с Матфи́ем свяще́нный Оли́мп/ и ве́рных исполне́ние я́ве просвети́ша,/ я́же ве́рою днесь почти́м свяще́нными и честны́ми песнопе́ньми.
Припев: Святи́и апо́столи, моли́те Бо́га о на́с.
Ста́нем благогове́йно в дому́ Бо́га на́шего/ И ублажи́м священнопропове́дники и учи́тели, и Ангелому́дрыя,/ и богати́тели, спаси́тели же, и защи́тники,/ и предста́тели всех су́щия, чту́щих их па́мяти.
Сла́ва Отцу́ и Сы́ну и Свято́му Ду́ху.
Озари́шася Све́том невеще́ственным Ду́ха/ Аки́ла, Ахаик, Луки́й сла́вный и Фуртуна́т/ с шестиюде́сять и шестию́ Христо́выми уго́дники и свяще́нными ученики́/ и сердца́ всех озаря́ют светоно́сную их па́мятию днесь.
И ны́не и при́сно и во ве́ки веко́в. Ами́нь.
Богородичен: Сия́ние блиста́ния Рождества́ Твоего́ просия́,/ и уясни́ всю подсо́лнечную,/ и предста́теля тьмы погуби́, Богороди́тельнице Всечи́стая,/ А́нгелов хвало́ и челове́ков всех спасе́ние,/ непреста́нными гла́сы восхваля́ющих Тя.
Светилен
Апо́столи всехва́льнии Христа́ всеще́драго, и ученицы́, и Богови́дцы,/ не премолчи́те, моля́ще о нас, любо́вию ва́шу па́мять соверша́ющих,/ да прегреше́ний оставле́ние и Боже́ственную обря́щем благода́ть в День Суда́
